1, 2. а) Малы ми Иеговалы оскымон луыны кулэ? б) Мае ми эскеромы таяз статьяын?

 МАЛЫ ми Иеговалы оскымон луыны кулэ? Солы оскымон луимы ке, визьмо луэммес возьматомы, малы ке шуоно Иегова самой кужмо, визьмо но яратӥсь. Со кадь нокин ӧвӧл ни. Кинлэн со палан луэмез ӧй потысал? (Пс. 95:4—6). Озьы ке но Иеговалэн куд-ог ужась-тыршисьёсыз палэнскизы солэсь.

² Та статьяын ми эскеромы соослэсь примеръёссэс, кинъёс верало вал, Иегова палан шуыса, но со дыре ик лэсьто вал сое, мар Иеговаез сантэма вал. Со примеръёс вылын малпаськон юрттоз милемлы вань лулынымы-сюлмынымы Иеговалы оскымон луыны.

3. Мар Иегова вераз Каинлы но малы?

³ Нырысь вераськомы Каин сярысь. Со мукет инмаръёслы ӧз йыбыртъя, Иеговалы гинэ йыбыртъяз. Озьы ке но солэн йыбыртъямез Иеговалэн син азяз ярамон ӧй вал. Малы? Иегова адӟиз, Каинлэн сюлмаз сьӧлыко  малпанъёс вордӥсько шуыса (1 Иоанн 3:12). Иегова вераз Каинлы: «Ӟеч уж лэсьтӥськод ке, малы йырдэ ошыса возиськод? Нош ӟеч уж уд ке лэсьтӥськы, ӧс выжыын сьӧлык кылле, со тонэ ас дораз ӧте, но тон солы сётӥськытэк, сое вормыса ул» (Ул.-выл. 4:6, 7). Мукет кылъёсын вераса, Иегова солы шуиз: «Тон ӧпкелид но юн мылкыдын мон пала кариськид ке, мон но тон палан луо».

4. Мар кариз Каин, куке солэн луонлыкез вал Иегова пала султыны?

⁴ Каин аслэсьтыз малпанъёссэ воштысал ке, Иегова солэсь йыбыртъямзэ выльысь ярамон лыдъясал. Но Каин Инмарлэсь визь-кенешсэ санэ ӧз поны. Шонертэм малпанъёслы но ас мыл потонъёсызлы сётскыса, со сьӧлыказ (Иак. 1:14, 15). Егитгес дыръяз Каин ӧз но малпа, луоз, одӥг пол со Иеговалы пумит мыноз шуыса. Но аръёс ортчыса, со туж секыт сьӧлык лэсьтӥз — со Инмарлы пумит султӥз но аслэсьтыз вынзэ вииз!

5. Малы ми Иеговалы ярамон луэмысь дугдыны быгатомы?

⁵ Каин сямен ик, асьме нуналъёсы христиан мурт шонертэм сюрес вылэ султыны быгатэ но вераны, со Иеговалы ужа-тырше шуыса (Иуда 11). Кылсярысь, сыӵе христиан мурт ялан тодытон уже пыриське но пумиськонъёсы ветлэ. Но со дыре ик со быгатэ азон-калгон сярысь, ваньбур люкан сярысь малпанъёслы сётскыны но огъя оскисьсэ адӟемпотостэм карыны (1 Иоанн 2:15—17; 3:15). Сыӵе малпанъёс сьӧлыке пыртыны быгато. Нокин уг но тоды, вылды, мар со каре но мар сярысь малпаське. Сое Иегова гинэ тодэ. Иегова ваньзэ адӟе но тодэ. Со тодэ, вань сюлмынымы-а ми со пала пыриськомы яке ум-а. (Лыдӟе Иеремиялэсь 17:9, 10.)

6. Кызьы Иегова юрттэ милемлы сьӧлыко мыл потонъёсмес вормыса улыны?

⁶ Но, ми янгышаськомы ке но, Иегова уг дырты ми палась берытскыны. Куке ми султӥськомы сюрес вылэ, кудӥз Иегова дорысь палэнтыны быгатоз, со милемлы вера: «Мон пала берытске, соку Мон тӥ пала берытско» (Мал. 3:7). Иегова тодэ, милям тырмымтэосмы вань шуыса, но солэн потэ, ми соосын мед нюръяськомы но сьӧлыклы медам сётске шуыса (Ис. 55:7). Соку со ми палан луоз, со юрттоз милемлы но кужым сётоз, ми сьӧлыко мыл потонъёсмес вормыса улыны мед быгатомы шуыса (Ул.-выл. 4:7).

7. Кызьы Соломон Иеговаен кусыпъёссэ сӧриз?

⁷ Ми тросэзлы дышетскыны быгатӥськомы, Соломон эксэйлэн примерез вылын малпаськыса. Егит дыръяз солэн Инмарен матысь кусыпъёсыз вал. Иегова солы трос визьлык сётӥз но Иерусалиме бадӟым чебер храм пуктыны косӥз. Но бератаз Соломонлэн Инмарен кусыпъёсыз сӧриськизы (3 Экс. 3:12; 11:1, 2). Инмарлэн Законаз верамын вал: «Эксэйлэн укыр трос кышноосыз луыны кулэ ӧвӧл,— сюлмыз соин медаз сӧриськы» (К. Зак. 17:17). Соломон та косонлэсь ӧз кылзӥськы. Солэн 700 кышноез но 300 ляльчи кышноосыз вал (3 Экс. 11:3). Кышноосыз пӧлысь тросэз израиль калыкысь ӧй вал. Соос зэмос  луисьтэм инмаръёслы йыбыртъяло вал. Озьы Соломон эшшо одӥг косонэз тӥяз на: мурт кунъёсысь кышноос басьтӥз (К. Зак. 7:3, 4).

8. Кыӵе сьӧлыкъёс лэсьтӥз Соломон?

⁸ Соломонлэн Иеговалэсь законъёссэ яратонэз пумен сӥяз но, со туж секыт сьӧлыказ. Со зэмос луисьтэм инмаръёслы курбон сётон интыос лэсьтӥз, кылсярысь, Астарталы но Хамослы. Кышноосыз кадь ик, Соломон зэмос луисьтэм инмаръёслы йыбыртъяны кутскиз. Курбон сётон интыосты со Иерусалим азьысь гурезь йылэ лэсьтӥз, отчы, кытчы со Иеговалы храм пуктӥз вал! (3 Экс. 11:5—8; 4 Экс. 23:13). Оло нош, Соломон ассэ пӧя но малпа вал, со Иеговалы храмын курбонъёс сётъя бере, Иегова солэн кылзӥськымтэезлы синзэ ворсалоз шуыса.

9. Кытчы вуттӥз Соломонлэн Инмарлэсь кылзӥськымтэез?

⁹ Но Иегова сьӧлыкъёс шоры синзэ ноку но уг ворса. Библиын верамын: «Соку Кузё-Инмар Соломонлы туж вожзэ поттӥз аслэсьтыз сюлэмзэ кык пол солы возьматскылэм... Кузё-Инмарлэсь палэнтэмез понна, солы курон-косон сётӥз вал, мурт инмаръёслэн сюрес кузязы медаз ветлы шуыса, нош со Кузё-Инмарлэсь курон-косонзэ ӧз быдэсты». Озьы Соломон Инмарлы ярамон луэмысь дугдӥз, но Инмар солы ӧз юртты ни. Бератаз Израиль эксэйлык люкиськиз.  Соломонлэн нылпиосыз но нылпиосызлэн нылпиосыз эксэйлыкезлэн ог люкетэныз гинэ кивалтӥзы но дауръёс ӵоже трос курадӟонъёс адӟоно луизы (3 Экс. 11:9—13).

10. Мар Инмарен матысь кусыпъёсмес сӧрыны быгатоз?

¹⁰ Кызьы адӟиське Соломонлэн учырысьтыз, Инмарен кусыпъёсмылы тужгес но бадӟым кышкытлык вайыны быгатэ сыӵе адямиосын эшъяськон, кудъёсыз Иеговалэсь эсэпъёссэ уг гажало но соосты санэ уг поно. Сыӵе адямиос пӧлын луыны быгато соос, кинъёс кенешлэн пумиськонъёсаз ветло, но Инмарен матысь кусыпъёс уг возё, яке милям ӵыжы-выжыосмы, бускельёсмы, ӵош ужасьёсмы но ӵош дышетскисьёсмы, кудъёсыз Иеговалы уг йыбыртъяло. Соосын дырмес ортчытъямы ке, Инмарен кусыпъёсмы пумен сӧриськыны быгатозы.

11. Мар юрттоз валаны, кулэ ӧвӧл-а кинэн ке дырмес ӧжытгес ортчытъяны?

¹¹ Лыдӟе 1 Коринфъёслы 15:33. Тросэзлэн адямиослэн умой сямъёссы вань, но тросэз Адӟись-Ивортӥсь луисьтэм адямиос номыр уродзэ уг лэсьто. Оло нош, тӥляд но сыӵе тодмоосты вань. Но быгато-а соос тӥледлы умой эшъёс луыны? Юалэ асьтэлэсь: «Мон соосын эшъяськи ке, кызьы со мынам Иеговаен кусыпъёсы вылын шӧдӥськоз? Мон Инмарлы матэгес карисько-а? Мар со адямиослэн сюлмазы? Мар сярысь соос ӵемгес верасько: чебер дӥськут, коньдон, дуно электрон тӥрлыкъёс яке шудон-шулдыръяськонъёс сярысь? Уг шӧдӥськы-а соослэн вераськемысьтызы, соос мукетъёссэ серекъяло яке ултӥяло шуыса?» Иисус юнме ӧз вера: «Сюлэм пачылмыку, кыл вера» (Матф. 12:34). Тӥ шӧдӥськоды ке, со яке та адямиен эшъяськон тӥлесьтыд Иеговаен кусыпъёстэс сӧрыны кутске шуыса, соку ик мар ке но каре, кылсярысь, соин дырдэс ӧжытгес ортчытъялэ яке кусып воземысь ик дугдэ (Мад. 13:21).

12. а) Мар вераз Иегова израиль пиослы ӝоген Египетысь потэмзы бере? б) Мар вераз израиль калык, куке кылӥз, Иегова солы гинэ оскымон луыны косэ шуыса?

¹² Нош али вераськомы со сярысь, мар луиз ӝоген израиль калык Египетысь потэм бере. Соос Сӥнай гурезь доры люкаськизы, но Иегова калыклы паймымон амалэн возьматскиз. Израиль пиос адӟизы пеймыт пилемез, чилекъямез, ӵынэз но кылӥзы гудыръямез но кужмо дугдӥсьтэм гумы куаралы укшась куараез (Пот. 19:16—19). Собере Иегова ялӥз, со солы аслыз гинэ оскымон луыны косэ шуыса. Иегова оскытӥз израиль пиосты, соос сое яратӥзы но солэсь курон-косонъёссэ быдэсъязы ке, со соосты гажалоз-жалялоз шуыса (Лыдӟе Потонэз 20:1—6.) Мукет кылъёсын вераса, Иегова аслаз калыкезлы шуиз: «Тӥ мон палан луиды ке, мон но тӥ палан луо». Мар тӥ верасалды, кылысалды ке, ачиз Иегова тӥледлы озьы вера шуыса? Тӥ но израиль калык сямен верасалды, дыр. Библиын гожтэмын: «Вань калык одӥг кылысь-ымысь ответ сётыса шуиз: „Ваньзэ, мар вераз Кузё-Инмар, быдэстомы“» (Пот. 24:3). Но ӝоген соослэн оскымон луэмзы эскеремын вал.

13. Кызьы израиль калыклэн Иеговалы оскымон луэмез эскериськиз?

 ¹³ Пеймыт пилемез, чилекъямез но Инмарлэсь мукет сямен кужымзэ возьматэмзэ адӟыса, израиль калык кышкатскиз. Соин ик со куриз, Моисей Сӥнай гурезьын соос но Инмар вискын кусып возись мед луоз шуыса. Моисей соглаш луиз (Пот. 20:18—21). Гурезь вылысь Моисей кема васькытэк улӥз. Кылиз-а израиль калык луоё кыр дуннее аслаз кивалтӥсезтэк? Израиль пиос ортчыт трос оскиськизы, шӧдске, Моисейлы, музъем вылысь кивалтӥсьсылы. Соос сюлэмшугъяськыны кутскизы но Ааронэз косӥзы: «Милемлы инмар лэсьты, со милям азьтӥмы мед мыноз, асьмеды Египет музъемысь поттэм Моисей шуон адямиен мар луиз, ум тодӥське ук» (Пот. 32:1, 2).

14. Кызьы израиль калык ассэ пӧяса улӥз но кызьы со шоры учкиз Иегова?

¹⁴ Израиль калык тодэ вал, сульдэр-идолъёслы йыбыртъян со Иеговалы пумит йыруж шуыса (Пот. 20:3—5). Озьы ке но соос зарни ошпилы йыбыртъяны кутскизы! Соос Иеговалэсь курон-косонзэ тӥязы, но асьсэды пӧяса возизы, соос Иегова палан на шуыса. Ошпилы йыбыртъянэз Аарон «Кузё-Инмарлэн праздникез» шуыса ик ялӥз! Кызьы Инмар со шоры учкиз? Со лыдъяз, сое куштӥзы шуыса. Иегова Моисейлы вераз: «Калыкед йӧнтэмъяськыны кутскиз; макем ӝог соос Мынам курон-косон сюрес вылысьтым мыдлане кожизы». Иегова сокем вожзэ поттӥз, музъем вылысь выль кылдытэм Израиль калыкез быдтыны ик малпа вал (Пот. 32:5—10).

15, 16. Кызьы Моисей но Аарон вань лулынызы-сюлмынызы Иегова палан луэмзэс возьматӥзы? (Учке статья кутсконысь суредэз.)

¹⁵ Но Иегова ас калыксэ быдтыны малпанэзлэсь куштӥськиз. Солэн гажась-жалясь луэменыз, оскымон ужась-тыршисьёсызлэн луонлыксы кылдӥз юн мылкыдын со пала кариськыны (Пот. 32:14). Калыклэсь зарни ошпи азьын кесяськемзэ, кырӟамзэ но эктэмзэ адӟыса, Моисей ошпи сульдэрзэс кутӥз но, тылэ куштыса, сутӥз, пеньлы пӧрмытозяз, пыргытъяз. Собере со бадӟым куараен вераз: «Кузё-Инмарлэнэз адямиос, лыктэ мон доры!» Соку «Левийлэн вань пиосыз со котыре люкаськизы» (Пот. 32:17—20, 26).

¹⁶ Аарон сульдэр-идол лэсьтӥз ке но, со мукет левитъёсын ӵош ӧпкелиз но Иегова пала кариськиз. Та оскымон ужась-тыршисьёс, Иегова пала султэм сяна, сьӧлыкам адямиослэсь палэнскизы на. Соос визьмо ужпум кутӥзы: со нуналэ ог куинь сюрс израиль пиос виемын вал, кудъёсыз сульдэр-идоллы йыбыртъязы. Нош соосты, кинъёс оскымон кылизы, Иегова бакель карыны кылзэ сётӥз (Пот. 32:27—29).

17. Малы дышетэ милемыз со, мар гожтӥз Павел зарни ошпи сярысь?

¹⁷ Малы дышетэ милемыз та учыр? Апостол Павел шуиз: «Ваньмыз таос асьмеды алон понна вал: кызьы вашкала атайёсмы лулмугорлэн лекесь куронъёсызлы сётскыса улӥзы, асьмеос но лулмугорлэн лекесь куронъёсызлы сётскыса медам улэ вал шуыса. Соос пӧлысь куд-огъёсыз кадь тӥ но сульдэръёслы йыбыртъясьёс эн луэ... Ваньмыз таос... асьмелы, берпуметӥ аръёсы улыны кылемъёслы, алон  понна гожтэмын. Соин ик, кин ке но мон йыг-йыг сылӥсько шуыса малпа ке, чакласькы: медад усьы» (1 Кор. 10:6, 7, 11, 12). Кызьы пусйиз Павел, Иеговалэн оскымон ужась-тыршисьёсыз но сьӧлыканы быгато. Сыӵе муртъёс малпаны быгато, сьӧлыкамзы Иеговаен кусыпъёссы вылын ӧз шӧдӥськы шуыса. Но, Иеговалы ярамон луон понна, ми солы оскымон луиськомы но милям соин эшъяськеммы потэ шуыса, вераны гинэ ӧжыт (1 Кор. 10:1—5).

18. Малы ми Иеговалэсь палэнскыны быгатомы но кытчы со вуттыны быгатоз?

¹⁸ Кызьы израиль калык сюлэмшугъяськиз, куке Моисей кема гурезь вылысь ӧз васькы, озьы ик туннэ но куд-ог христианъёс сюлмасько но малпало, Иеговалэн судъян нуналыз ӝегатске но выль дунне кематэк уз вуы на шуыса. Соос малпамъя, со кыл сётонъёс кематэк уз быдэсме. Нош кин ке но малпа, быдэсмон понна, соос укыр умой шуыса. Сыӵе малпанъёсмес ӧм уллялэ ке, саклыкмес висъяны кутскомы солы, мар милям потэ, нош Иеговалэн эрикез кыкетӥ интые кошкоз. Дыр ортчемъя ми быгатомы Иеговалэсь палэнскыны но карыны сое, мар сярысь азьвыл ӧй но малпасалмы.

19. Мар сярысь милемлы ноку но вунэтоно ӧвӧл но малы?

¹⁹ Ноку но эн вунэтэ: Иегова возьма, ми солэсь кылзӥськомы но солы гинэ йыбыртъяломы шуыса (Пот. 20:5). Ми Иеговалэсь эриксэ ум ке быдэсъяське, соку ми Шайтанлэсь эриксэ быдэсъяськомы, нош со умое уз вутты. Тӥни малы Павел гожтӥз: «Уд быгатӥське огдыре Кузё-Инмарлэн чашаысьтыз, со дыре ик перилэн чашаысьтыз но юыны: уд быгатӥське огдыре ик Кузё-Инмарлэн но сиськоназ, периослэн но сиськоназы пыриськыны» (1 Кор. 10:21).

20. Кызьы Иегова юрттэ милемлы, куке ми янгышаськомы?

²⁰ Каинлэн, Соломонлэн но Сӥнай гурезь дорын люкаськем израиль пиослэн — ваньзылэн луонлыксы вал ӧпкельыны но сьӧлыкъёссылэсь куштӥськыны (Ап. уж. 3:19). Кызьы адӟиське, Иегова уг дырты берытскыны солэсь, кин янгышаз. Кылсярысь, со Ааронэз сьӧлыкамез понна простить кариз. Туннэ Иегова, милемыз сьӧлыклэсь утён понна, визь-кенешъёс сётэ Библия пыр, со вылэ пыкиськем публикациос пыр но вын-агайёс но сузэр-апайёс пыр. Ми со визь-кенешъёслэсь кылзӥськиськомы ке, оскыны быгатӥськомы, Инмар милемыз гажалоз-жалялоз шуыса.

21. Мар кароно милемлы, куке Иеговалы оскымон луэммы эскериське?

²¹ Иегова дэлетсэ юнме уг сёты (2 Кор. 6:1). Со асьмелы луонлык сётэ «сьӧлыклэсь кышкатэк улонлэсь, та дуннелэн куронъёсызлы тэрытскыса улонлэсь куштӥськыны». (Лыдӟе Титлы 2:11—14.) «Таяз улон даурын» ми пӧртэм югдуръёсы сюрыны быгатомы, кудъёсаз милям Иеговалы гинэ оскымон луэммы эскериськоз. Ойдолэ котьку юн сыломы Инмар палан но таӵе курон-косонлэсь кылзӥськомы: «Инмаредлэсь Кузё-Инмарлэсь курда, Солы гинэ ужаса-тыршыса ул, Со борды лулыныд-сюлмыныд лякиськы»! (К. Зак. 10:20).