СӤЗЕМ музъемын еврей калыклэн выль арез кутске вал гырон но кизён вакытэ. Туэ со тупа куарусён — коньывуон толэзьёслы.

Толэзья чаклам аре пыре вал 12 толэзь, нош котькуд толэзе — 29 яке 30 нунал. Толэзья чаклам ар вакчигес вал шундыя чаклам арлэсь. Толэзья но шундыя чаклам календарьёс мед тупалозы шуыса, пӧртэм амалъёсты куто вал. Кылсярысь, куддыръя толэзьлы кӧня ке нуналъёс ватсало вал. Нош куддыръя арлы быдэс толэзь ватсало вал, ӵем дыръя арлэн кутсконаз. Солы луыса календарь шонер возьматэ вал мерттӥськон но емыш бичан вакытъёсты.

Нош Моисей улон нуналъёсы Инмар аслаз калыкезлы вераз, священной ар тулыс авив, яке нисан, толэзьысен кутскоз шуыса (Пот. 12:2; 13:4). Та толэзе ортчытӥськись праздник дыръя израиль калык Иеговалы нырысетӥ арам йыдызэ вае вал (Пот. 23:15, 16).

Эмиль Шюрер, история удысысь тодосчи, вера: «Эшшо одӥг толэзез ватсано-а, ӧвӧл-а, валаны секыт ӧй вал. Пасха, кудзэ пусъё вал нисан толэзе (14-тӥ нисанэ), ортчытӥськыны кулэ вал тыр толэзь дыръя, тулыс уй-нунал ӵошан бере. [...] Нош ар пумын адӟо вал ке, вуоно араз Пасха тулыс уй-нунал ӵошанлэсь азьло тупа шуыса, нисан азе ватсало вал эшшо одӥг [13-тӥ] толэзез» a.

Иеговалэн Адӟись-Ивортӥсьёсыз таӵе амалэз уже куто, валан понна, ку пусйиськоз Господьлэн ӝытанэз. Со ортчытӥське тулыс но еврейёслэн календарьзыя 14-тӥ нисанэ тупа. Та нунал сярысь вань кенешъёслы азьло ик верало b.

Но кызьы еврей калык тодэ вал, ку кутскоз выль толэзь? Туннэ ми календаре учкиськомы но сое тодӥськомы. Нош вашкала дыръя сое тодыны секытгес вал.

Ной улон нуналъёсы котькуд толэзе 30 нунал пыре вал (Ул.-выл. 7:11, 24; 8:3, 4). Но берлогес толэзьын ӧжытгес но нуналъёс луыны быгато вал. Еврейёслэн календарьзыя выль толэзь кутске вал инмын выль толэзь потэм бере. Соин ик со кыстӥськиз 29 яке 30 нунал.

Библиын вераське, кызьы огпол Давид но Ионафан выль толэзьлэн кутсконэз сярысь веразы. Давид шуиз: «Ӵуказе выль толэзьлэн потонэз», нош Ионафан шуиз: «Ӵуказе выль толэзь потон нунал» (1 Экс. 20:5, 18). Татысь адӟиське: асьме вакытлэсь азьло XI даурын азьло ик тодо вал ини, ку кутскоз выль толэзь. Кызьы огшоры адями тодыны быгатэ вал, ку кутскоз выль толэзь? Со сярысь вераське Мишнаын, кудаз гожтэмын иудейёслэн законъёссы но сям-йылолъёссы. Отын верамъя, израиль калык вавилон пленысь потэм бере выль толэзьлэсь кутскемзэ лыдъя вал Сӥнедрион (иудейёслэн вылӥ судзы). Израиль калыкын сизьым толэзьёс ӵоже праздникъёс ортчытъяськизы. Та толэзьёс пӧлысь котькуд толэзьлэн 30-тӥ нуналаз судьяос вазь ӵукна люкасько но валаны тыршо вал, ку кутскоз выль толэзь. Кызьы соос сое лыдъяло вал?

Иерусалим котырысь вырйылъёсын азьло ик чакласьёсты пуктылӥзы. Соос учкизы, ку инмын выль толэзь потоз. Сое адӟемзы бере соос соку ик Сӥнедрионлы верало вал. Куке судьяос валало вал, со озьы ик вань шуыса, толэзьлэсь 30-тӥ нуналзэ выль толэзьлэн нырысетӥ нуналэныз лыдъяло вал. Нош мар каро вал, куке пилемъёс яке бус сэрен толэзь ӧз адӟиськы? Соку веразы, та толэзьын 30 нунал шуыса, нош выль толэзь вуоно нуналысен кутскоз шуыса.

Мишнаын верамъя, Сӥнедрионлэн кутэм ужпумез сярысь Иерусалимын улӥсьёс тодо вал вырйылъёсын ӝуатэм тылъя. Сое ӝуато вал кар вӧзысь Елеон гурезь йылын. Со сярысь мукетъёсыз но мед тодозы шуыса, быдэс шаерысь вырйылъёсы  тыл поно вал. Берлогес та иворез ыстэм муртъёс вераллязы. Озьыен, кытын гинэ еврей калык медам улы, Иерусалимын яке мукет интыосын, со выль толэзьлэн кутсконэз сярысь тодыны быгатэ вал. Солы луыса котькуд аре пусйиськись праздникъёсты еврей калык одӥг дыре пусйыны быгатӥз.

Еврейёслэн календарьзы сярысь тросгес тодыны луэ таблицаысь.