«Библия мӧзмыт книга потоз, тон уд тодӥськы ке, кызьы сое лыдӟоно»,— вераз Уилл нимо пияш.

Потэ-а тодэмед, кызьы, Библиез лыдӟыку, шумпотон басьтоно? Соку та статья юрттоз тыныд.

•  Син азяд пукты

•  Эскерон ортчыты

•  Мар верало огъёзъёсыд

Тыршы шӧдыны сое, мар сярысь лыдӟиськод. Тон быгатӥськод уже кутыны таӵе амалэз:

1. Библиысь кыӵе ке люкетэз бырйы. Кылсярысь, бырйы Евангелиысь кыӵе ке учырез. Яке тон быгатӥськод бырйыны со люкетэз, кудӥз jw.org сайтысь «Библиез чеберлыко лыдӟон» люкетын вань.

2. Быръем люкетэз лыдӟы.Тон быгатӥськод ваньзэ ачид лыдӟыны яке семьяеныд но эшъёсыныд ӵош. Кин ке но лыдӟыны быгатэ авторлэсь кылъёссэ, нош кин ке но — мукет адямиослэсь кылъёссэс.

3. Уже кут та визь-кенешъёсты:

   • Лэсьты суредъёс. Кылсярысь, лэсьты огшоры суредъёс, кыӵе ке югдурлэсь мынэмзэ возьматон понна. Котькуд суред улын гожты, мар отын возьматэмын.

   • Лэсьты схемаос. Кылсярысь, Инмарлэн оскымон ужась-тыршисез сярысь лыдӟыкуд, возьматы, кызьы солэн сямъёсыз но ужъёсыз герӟаськемын соин, кызьы Иегова сое бакель кариз.

   • Ортчыты «Иворъёс» выллем программа. Вера Библиысь кыӵе ке югдур сярысь озьы, кызьы верасалзы сое со дыре улӥсь адямиос. Со адямиослэсь «интервью» басьты.

   • Малпаськы, кызьы кыӵе ке югдур мукет сямен йылпумъяськыны быгатысал. Адямиос, кудъёсыз сярысь тон лыдӟиськод, шонертэм ужпум кутӥзы ке, пукты син азяд, мар луысал, соос асьсэды мукет сямен возьысалзы ке. Кылсярысь, пукты син азяд, кызьы Пётр Иисуслэсь куштӥськиз (Марк 14:66—72). Мар карыны быгатэ вал Пётр, адямиослэсь кышканзэ вормон понна?

   • Мылкыдыд вань ке, Библиысь кыӵе ке учыр сярысь лыдӟыкуд, малпа, кызьы та учыр мукет сямен мыныны быгатысал. Эн вунэты вераны, малы тонэ дышетӥз та учыр (Римъёслы 15:4).

Тон эскерид ке малпанъёсты, кудъёсыз соку ик син азе уг йӧто, соку быгатод ватӥськем марӟанъёсты шедьтыны. Куддыръя одӥг-кык кыл но Библиысь быдэс учырез валаны юрттэ.

Кылсярысь, ӵошаты Матфейлэсь 28:7 но Марклэсь 16:7.

•  Куке Марк вераз, Иисус дышетскисьёсызлы возьматскоз шуыса, малы со озьы ик гожтӥз: «Пётрлы вералэ»?

• Юрттэт. Учырез, кудӥз сярысь та кылбуръёсын вераське, Марк ачиз ӧз адӟы. Со сярысь солы Пётр вераз, луоз.

• Мур малпан. Малы Пётрлэн мылкыдыз ӝутскиз, вылды, куке со тодӥз, Иисуслэн сое адӟемез потэ шуыса? (Марк 14:66—72). Малы вераны луоз, Иисус Пётрлы зэмос эш вал шуыса? Кызьы тон, Иисус сямен, оскымон эш луыны быгатӥськод?

Библиез лыдӟон тыныд тросгес шумпотон ваёз, куке тон лыдӟемдэ син азяд пуктод но сое эскерод!