1, 2. Көп адәмләрниң ишиға болған көзқариши қандақ?

КӨП адәмләр қилған ишиға бағлиқ өзини йә муһим, йә муһим әмәс һис қилиду. Бәзи мәдәнийәтләрдә бирси билән тонушқанда, адәттә: «Сиз ким болуп ишләйсиз?»,— дәп сорайду.

² Муқәддәс китапта бәзи адәмләрни тәсвирләш үчүн уларниң кәспи һәққидә йезилған. Мәсилән, «селиқчи Мәтта», «терә әйлигүчи Симун» вә «сөйүмлүк тевип Луқа» охшаш адәмләр тилға елинған (Мәтта 10:3; Әлчиләр 10:6; Колосилиқларға 4:14). Шуниң билән Муқәддәс китапта бәзи адәмләрниң Йәһваға хизмәт қилип, қандақ вәзипиләрни атқурғанлиғи йезилған. Мәсилән, Давут падиша, Илияс пәйғәмбәр вә әлчи Паул. Бу әр кишиләр Йәһвадин алған вәзипилирини қәдирлигән. Шуниңға охшаш бизму Йәһваға болған хизмитимиздики һәрбир вәзипини қәдирлишимиз керәк.

3. Немишкә йеши чоңлар яшларға көпирәк вәзипиләрни орунлашқа ярдәм бериши керәк? (Мақалиниң бешидики рәсимгә қараң.)

³ Биз Йәһва Худаға хизмәт қилишни яхши көримиз вә вәзипилиримизни қәдирләймиз. Биз хизмитимизни  шунчилик яхши көримизки, уни мүмкинқәдәр узақ қилишни халаймиз. Әпсуски, йешимиз чоң болғансири, яш чеғимизда қилғанларни орунлалмаймиз (Вәз 1:4). Бу Йәһваниң хизмәтчилири үчүн алаһидә бир қийинчилиқни туғдуриду. Бүгүнки күндә вәз ишиниң көләми кәңәймәктә һәм Йәһваниң тәшкилати хуш хәвәрни көпирәк адәмләргә йәткүзүш үчүн заманивий технологияләрни қолланмақта. Лекин бәзи чағларда йеши чоңларға йеңи нәрсиләрни үгиниш тәс болуши мүмкин (Луқа 5:39). Адәттә адәмләрниң йеши чоңайғансири, күч-қувитиму азийиду (Пәнд-нәсиһәтләр 20:29). Шуниң үчүн йеши чоңларниң яшларни Йәһваниң тәшкилатида көпирәк вәзипиләрни елишқа үгәткәнлири меһир-муһәббәт вә зерәкликниң ипадиси (Зәбур 71:18ни оқуң).

4. Немишкә бәзи бурадәрләр үчүн башқиларға вәзипиләрни тапшуруш қийин болуши мүмкин? («Вәзипиләрни тапшуруш немишкә қийин болуши мүмкин?» намлиқ рамкиға қараң.)

⁴ Җавапкарлиққа егә болған бәзи бурадәрләр үчүн яш бурадәрләргә вәзипиләрни тапшуруш оңай әмәс. Өзлири яхши көргән җавапкарлиқни бирсигә бериш уларниң көңлини йерим қилиши мүмкин. Бәлким, улар бу вәзипини өзлиригә охшаш башқа һечким орунлалмайду дәп ойлайдиғанду. Йә болмиса, башқиларни үгитишкә вақтим йоқ дәп ойлайдиғанду. Яшлар болса, көпирәк вәзипиләргә еришкичә, сәвир-тақәтлик болуши һаҗәт.

5. Бу мақалидә қандақ соалларни қараштуримиз?

⁵ Ундақта йеши чоңларниң яшларға көпирәк вәзипиләрни орунлашқа ярдәм бериши немишкә шунчилик муһим? Улар буни қандақ қилалайду? (Тимотийға 2-хәт 2:2). Яшлар йеши чоң тәҗрибилик бурадәрләр билән хизмәтдаш болуп, улардин үгәнгәндә немә үчүн тоғра көзқарашта болуши керәк? Авал, келиң, Давутниң өз оғлини бәк муһим бир ишқа қандақ тәйярлиғанлиғини қараштурайли.

6. Давут падиша немә қилишни халиған, бирақ Йәһва униңға немә ейтқан?

⁶ Жиллар давамида Давут тәқипкә дуч келип, бир җайдин башқа җайға көчүшкә мәҗбур болған. Кейин падиша болғанда, у қолайлиқ өйдә яшиған. Шуңа у Натан пәйғәмбәргә: «Мана мән кедир яғичидин ясалған өйдә олтиримән, лекин Худавәндиниң әһдә сандуғи бир чедирниң тегидә туриду»,— деди. Давут Йәһва Худа үчүн чирайлиқ бир ибадәтханини қурушқа тәшна еди. Натан пәйғәмбәр униңға: «Берип, көңлүңдә һәрнемә болса қилғин, чүнки Худа сән биләндур»,— дәп җавап қайтурди. Лекин бу Йәһваниң ирадиси әмәс еди. У Натанға Давутқа мундақ ейтишқа буйриди: «Сән маңа бир олтиридиған өйни ясимайсән». Йәһва һәрдайим униң билән болидиғанлиғини вәдә қилсиму, Давут ибадәтханини оғуллириниң бири салидиғанлиғини билди. Давут қандақ инкас қайтурди? (Тарихнамә 1-язма 17:1—4, 8, 11, 12; 29:1).

7. Давут Йәһва Худаниң рәһбәрлигигә қандақ инкас қайтурди?

⁷ У Йәһва үчүн ибадәтханини өзи селишни интайин халиған, шуңа униң көңли йерим болғанду. Буниңға  қаримастин, оғли Сулайман башқуридиған қурулуш ишини пүтүнләй қоллиған. Давут ишчиларни һәм керәклик төмүр, мис, күмүч, алтун вә яғачни жиғишқа ярдәм бәрди. Қурулған ибадәтхана Давутниң әмәс, Сулайманниң ибадәтханиси дәп аталған, лекин Давут үчүн ибадәтханини селиш үчүн кимниң шан-шәрәпкә еришидиғанлиғи муһим әмәс еди. Әксичә, у Сулайманниң роһини көтирип, униңға: «Әнди әй оғлум, Худавәндә сән билән болғай. Сән раваҗлиқ болуп, сән тоғрилиқ ейтқинидәк Тәңриң Худавәндиниң бәйтини ясиғайсән»,— дәп ейтқан (Тарихнамә 1-язма 22:11, 14—16).

8. Давут немә сәвәптин Сулайманниң ибадәтханини қурушқа тәйяр әмәс дәп ойлиши мүмкин еди? Лекин Давут немә қилди?

⁸ Тарихнамә 1-язма 22:5ни оқуң. Бәлким, Давутниң ойичә, Сулайман шунчилик муһим ишни башқурушқа тәйяр әмәс еди. Ибадәтхана «наһайити чоң» болуши керәк еди, лекин Сулайман «яш туруп, назук» болған еди. Шундақ болсиму, Давут Йәһваниң Сулайманға бу алаһидә ишни орунлишиға ярдәм беридиғанлиғини билгән. Шуңа Давут оғлиниң бу зор ишни орунлашқа тәйярлиниши үчүн қолидин кәлгинини қилип, ярдәм бәрди.

9. Йеши чоң бурадәрләр вәзипилирини башқиларға тапшурғанда қандақ хошал болалайду? Мисал кәлтүрүң.

⁹ Йеши чоң бурадәрләр вәзипилирини яшларға тапшуруш һаҗәт болса, чүшкүнләккә чүшмәслиги керәк. Бүгүнки күндә әң муһими Йәһваниң иши екәнлигини һәммимиз яхши чүшинимиз. Яш бурадәрләрни вәзипилирини орунлашқа үгитиш арқилиқ бу ишқа һәссә қошалаймиз. Мону һәққидә  ойлап беқиң: Сиз кичик болғанда, дадиңизниң машина һайдиғанлиғини көргәнсиз. Сиз чоңайғансири, у сизгә машинини қандақ һайдаш керәклигини көрситип, чүшәндүрди. Вақит өтүп, сизму шоферлуқ гуванамиңизни елип, өзүңиз машина һайдашни башлидиңиз. Шундақ болсиму, дадиңиз бәзидә мәслиһәт берәтти. Бәзидә новәт билән һайдидиңиз, лекин дадиңизниң йеши чоңайғансири, сиз көпирәк һайдайдиған болдиңиз. Дадиңиз буниңға хапа болдиму? Яқ, у сизниң уни керәк йәргә апарғанлиғиңизға хошал болған еди. Шуниңға охшаш, йеши чоң бурадәрләрму өзлири үгәткән яшларниң көпирәк вәзипиләрни елишқа тәйяр болғанлиғини көрүшкә хошал.

10. Мусаниң аброй билән шан-шәрәпкә егә болушқа тегишлик көзқариши қандақ болған?

¹⁰ Биз башқиларниң вәзипилиригә көрәлмәслик қилмаслиғимиз керәк. Исраиллиқларниң бәзилири пәйғәмбәрләрдәк һәрикәт қилишни башлиғанда, Муса қандақ йол тутқанлиғидин савақ алалаймиз (Санлар 11:24—29ни оқуң). Йәшуа уларниң тохтишини халиған, лекин Муса униңға: «Немишкә мән үчүн мундақ әндишә қилисән? Кашки Худавәндиниң һәммә хәлқи пәйғәмбәр болуп, Худавәндә өз Роһини уларниң үстигә салса еди»,— деди. Муса Йәһваниң рәһбәрлик бериватқанлиғини билгән еди. Өзигә шан-шәрәп издәшниң орниға, у Худаниң хизмәтчилириниң һәммисиниң вәзипиләргә егә болушини халиған. Биз һәққидә немә дейишкә болиду? Башқиларниң вәзипиләргә еришкәнлигини көргәндә, улар үчүн хошал болимизму?

11. Вәзипиләрни башқиларға тапшуруш һәққидә бир бурадәр немә деди?

¹¹ Аримизда көп жиллар давамида Йәһваға берилип хизмәт қилған һәм яш бурадәрләрни көпирәк вәзипиләрни елишқа тәйярлиған бурадәрләр аз әмәс. Уларниң бири Питер исимлиқ бурадәр. Толуқ вақитлиқ хизмәттә өткүзгән 74 жилниң 35 жилини у Европидики филиалда хизмәт қилди. Узун вақит давамида у Хизмәт бөлүминиң назарәтчиси болған. Кейинирәк болса, бу вәзипә у тәйярлиған Пол исимлиқ бурадәргә тапшурулди. Шу чағда Питер хапа болдиму? Яқ. У мундақ дәп бөлүшти: «Көпирәк вәзипиләрни елиш үчүн тәйярланған вә хизмәтни шунчилик яхши атқуридиған бурадәрләрниң барлиғиға интайин хошалмән».

12. Реһабеамниң үлгисидин қандақ савақ алалаймиз?

¹² Сулайманниң оғли Реһабеам падиша болғанда, йеши чоң әр кишиләрдин бу йеңи вәзипини қандақ атқурушқа тегишлик мәслиһәт сориған. Лекин уларниң мәслиһитини рәт қилди! Уларға қулақ селишниң орниға, у өзи билән биллә чоң болған яш әрләрниң мәслиһитигә қулақ салди. Буниң ақивети бәк ечинишлиқ болди (Тарихнамә 2-язма 10:6—11, 19). Бу мисалдин қандақ савақ алалаймиз? Биздин йеши чоңирақ һәм тәҗрибиси көпирәк бурадәрләрдин мәслиһәт сориғанлиғимиз яхши. Яш бурадәрләр һәммисини чоқум бурундин тартип қоллинилған усулда қилиш керәк дәп ойлимаслиғи лазим. Шундақ болсиму, улар йеши чоң бурадәрләрниң пикрини чин жүрәктин һөрмәтләп, уларниң дегәнлири үнүмлүк болмайду дәп ойлашқа алдиримаслиғи керәк.

13. Яш бурадәрләр йеши чоң бурадәрләр билән қандақ хизмәтдаш болалайду?

¹³ Бәзидә яш бурадәрләргә йеши чоң тәҗрибилик бурадәрләрниң ишини башқуруш тапшуруғи берилиши мүмкин. Улар бу тәҗрибилик бурадәрләрдин көп нәрсигә үгинәләйду. Жуқурида кәлтүрүлгән мисалдики Пол Питер бурадәрниң орниға Хизмәт бөлүминиң назарәтчиси болуп тайинланған. У мундақ деди: «Мән вақит бөлүп, Питер билән мәслиһәтләштим вә бөлүмдики башқа бурадәрләрниму шундақ қилишқа дәвәт қилдим».

14. Тимотий билән Паулниң хизмәтдаш болушидин қандақ савақ алалаймиз?

¹⁴ Тимотий Паулдин қанчилик кичик болсиму, иккиси көп жил давамида хизмәтдаш болған (Филипиликләргә 2:20—22ни оқуң). Паул Коринттики бурадәр-қериндашларға: «Силәргә Тимотийни әвәтиватимән, чүнки у мениң Һакимдаримиз йолидики сөйүмлүк һәм садиқ пәрзәндим. У силәргә мән Мәсиһ Әйсада қоллинилидиған усуллиримни есиңларға салиду, мән һәммә йәрдә барлиқ җамаәтләрдә шундақ тәлимат беримән»,— дәп язған (Коринтлиқларға 1-хәт 4:17). Бу сөзләрдин улар қанчилик яхши хизмәт қилғанлиғи вә бир-бирини қоллиғанлиғи көрүниду. Паул Тимотийға Әйса Мәсиһниң йолидики усулларни үгитишкә вақит бөлгән, Тимотий болса, уларниң һәммисини яхши чүшәнгән. Паул Тимотийни яхши көргән вә униң Коринттики бурадәр-қериндашларға яхши ғәмхорлуқ қилидиғанлиғиға ишәнчи камил болған. Паул ақсақаллар үчүн немә дегән әҗайип үлгә! Улар җамаәттики бурадәрләрни җавапкарлиқни қолиға елишқа тәйярлайду.

15. Римлиқларға 12:3—5тики сөзләр өзгиришләрни қобул қилишимизға қандақ ярдәм берәләйду?

¹⁵ Биз алаһидә вақитта яшаватимиз. Шуңа Йәһва тәшкилатиниң йәрлик қисми тәрәп-тәрәптин гүлләнмәктә. Демәк, нәрсиләр дайим өзгирип туриду. Бу өзгиришләрниң бәзилири шәхсий бизгә тәсир қилиду вә уларни қобул қилиш оңай әмәс болуши мүмкин. Кичик пеил болуп, алди билән өзүмизниң әмәс, Падишалиқниң мәнпәитини ойлисақ, өзгиришләрни қобул қилиш асанирақ болиду. Шу чағда өмлүгимиз бузулмайду. Әлчи Паул Римдики мәсиһийләргә: «Һәрбириңларға ейтимәнки, өзүңлар һәққидә артуқчә ойлимаңлар»,— дәп язған. Андин кейин у тәнниң һәрбир әзаси һәр түрлүк хизмәт атқуридиғанлиғиға охшаш, җамаәтниң һәрбир әзасиниңму өз роли барлиғини чүшәндүргән (Римлиқларға 12:3—5).

16. Һәрбир мәсиһий Йәһваниң тәшкилатиниң тинчлиқ билән өмлүгигә қандақ қилип һәссисини қошалайду?

¹⁶ Җамаәттики орнумиз қандақла болмисун, биз Падишалиқ ишини қоллашни халаймиз. Йеши чоң бурадәрләр яшларни тәйярлиса болиду. Яш бурадәрләр болса, көпирәк вәзипиләрни алғанда, кичик пеиллиқ билән һөрмәт көрситәләйду. Өйләнгән бурадәрләр һәтта вәзийәтләр өзгәргән чағда, аялиниң қоллишини қәдирләйду. Аяллар болса, Акилани садақәтмән қоллиған Прискилаға тәқлит қилалайду (Әлчиләр 18:2).

17. Әйса шагиртлирини қандақ ишни орунлашқа тәйярлиған?

¹⁷ Әйса башқиларни үгитишкә тегишлик әҗайип үлгә қалдурди. У башлиған ишни башқилар давамлаштуридиғанлиғини билгән. Әлвәттә, у шагиртлириниң намукәммәл екәнлигини билгән. Лекин уларниң хуш хәвәрни өзигә қариғанда аллиқанчә кәң көләмдә җакалайдиғанлиғиға ишәнчиси камил болған (Йоһан 14:12). Шагиртларни бу вәзипигә яхши тәйярлиғанлиқтин, улар баралиған һәрбир әлдә вәз қилған (Колосилиқларға 1:23).

18. Келәчәктә биздә қандақ иш болиду? Һазир биз қандақ тапшуруқни орунлимақта?

¹⁸ Әйса өлгәндин кейин, Йәһва Худа уни тирилдүрүп, буруңқидинму көп иш тапшурди вә уни «һәрқандақ һөкүмәттин, һакимийәттин, күчтин, һөкүмранлиқтин вә һәрқандақ исимдин» үстүн қоюп, һоқуқ бәрди (Әфәсликләргә 1:19—21). Бизму Һар-Магедонғичә Йәһваға садиқ болуп, көз жумсақму, қайта тирилип, йеңи дунияда көплигән мәналиқ иш атқуримиз. Һазир һәммимизниң вәз билән шагирт тәйярлаш тапшуриғимиз бар. Шуңа яш-қери болушимиздин қәтъийнәзәр, һәрқайсимиз «Пәрвәрдигарниң хизмитидә көп» ишләйли! (Коринтлиқларға 1-хәт 15:58).