مۇقاۋىدىكى ماۋزۇ | نېمە ئۈچۈن مۇقەددەس كىتابنى ئوقۇش كېرەك
نېمە ئۈچۈن مۇقەددەس كىتابنى ئوقۇش كېرەك؟
«مەن مۇقەددەس كىتابنى چۈشىنىش قىيىن دەپ ئويلىدىم».—جۇۋېي.
«ئۇنى ئوقۇش ماڭا زېرىكىشلىك تۇيۇلغان ئىدى».—كۋىنى.
«مۇقەددەس كىتابنىڭ شۇنچە كۆپ بەتلىك كىتابلىقىنى كۆرۈپ، ئوقۇش ئىستىكىم يوقالدى».—ئەزەكىيال.
مۇقەددەس كىتابنى ئوقۇشنى ئويلىغاندا، سىزدىمۇ شۇنداق ھېس-تۇيغۇلار پەيدا بولغانمۇ؟ نۇرغۇن ئادەملەر بۇ كىتابنى ئوقۇش قولۇمدىن كەلمەيدۇ دەپ ئويلىشىدۇ. لېكىن، مۇقەددەس كىتاب سىزنىڭ تېخىمۇ خۇشال-خۇرام ۋە قانائەتلىنەرلىك ھايات كەچۈرۈشىڭىزگە ياردەم بېرەلىسىچۇ؟ ئۇنىڭدىن باشقا، ئۇنى ئوقۇشنىڭ تېخىمۇ قىزىقارلىق بەزى ئۇسۇللىرىنى تاپقان بولسىڭىزچۇ؟ مۇقەددەس كىتابنى ئوقۇشنىڭ سىز ئۈچۈن قانداق پايدىسى بارلىقىنى بىلىشنى خالامسىز؟
كۆپلىگەن كىشىلەر مۇقەددەس كىتابنى ئوقۇپ، قانداق پايدىسىنى كۆرگەن، كېلىڭ ئۇلاردىن بىر قانچىسىنىڭ نېمە دېگەنلىكىنى كۆرۈپ باقايلى.
20ياشلاردىكى ئەزەكىيال مۇنداق دەيدۇ: «ئىلگىرى نەگە كېتىۋاتقانلىقىنى بىلمەيدىغان شوپۇرغا ئوخشايتتىم. بىراق، مۇقەددەس كىتابنى ئوقۇش مەنىلىك ھايات كەچۈرۈشۈمگە ياردەم بەردى. بۇ كىتابتا كۈندىلىك تۇرمۇشۇمغا ياردەم بېرىدىغان ئەمەلىي مەسلىھەتلەر بار».
20ياشلاردىن ئاشقان فرىدا ئىسىملىك بىر ياش قىز مۇنداق دەيدۇ: «قېنىم قىزىق ئىدى. مۇقەددەس كىتابنى ئوقۇشنىڭ ياردىمىدە ئۆزۈمنى كونترول قىلىشنى ئۆگەندىم. باشقىلار بىلەن چىقىشىپ ئۆتۈش ئاسانراق بولدى ۋە ھازىر كۆپ دوستلىرىم بار».
50تىن ئاشقان يۇۋنەس ئىسىملىك بىر ئايال بولسا، مۇقەددەس كىتاب ھەققىدە مۇنداق دەيدۇ: «مۇقەددەس كىتابنى ئوقۇش يامان ئادەتلىرىمنى تاشلاپ، ياخشىراق ئادەم بولۇشۇمغا ياردەم بەردى».
يۇقىرىدا تىلغا ئېلىنغان كىشىلەر ۋە باشقا مىليونلىغان ئىنسانلار ئۆز ھاياتىدا كۆز يەتكۈزگەندەك، مۇقەددەس كىتابنى ئوقۇش سىزگىمۇ مەنىلىك ھايات كەچۈرۈشىڭىزگە ياردەم بېرىدۇ (يەشايا 48:17، 18). بۇ كىتابنىڭ ياردىمىدە، سىز (1) توغرا قارارلارنى چىقىرالايسىز، (2) ھەقىقىي دوستلارنى تاپالايسىز، (3) بېسىملارغا قارشى كۈرەش قىلالايسىز ۋە ئەڭ مۇھىمى، (4) خۇدا توغرىسىدا بىلىم ئالالايسىز. مۇقەددەس كىتابتىكى مەسلىھەتلەر خۇدادىن كەلگەچ، سىز ئۇلارغا ئەمەل قىلسىڭىز، بۇنىڭغا ھېچقاچان ئۆكۈنمەيسىز. خۇدا ھېچقاچان يامان مەسلىھەت بەرمەيدۇ.
ئەڭ مۇھىمى — ئوقۇشنى باشلاشتۇر. قانداق ئەمەلىي قەدەملەر مۇقەددەس كىتابنى ئوقۇشنى ئاسانراق باشلاشقا ۋە تېخىمۇ قىزىقارلىق ۋە كۆڭۈللۈك ئوقۇشقا ياردەم بېرىدۇ؟
