ئوقۇرمەنلەرنىڭ سوئاللىرى
خۇدانى كىم ياراتتى؟
يەتتە ياشلىق ئوغلى بىلەن پاراڭلىشىۋاتقان بىر ئاتىنى تەسەۋۋۇر قىلىپ بېقىڭ. ئۇ ئۆز ئوغلىغا: «ئۇزۇن زامانلار ئىلگىرى، خۇدا يەر شارىنى ۋە ئۇنىڭدىكى بارلىق نەرسىنى ياراتتى. ئۇ قۇياش، ئاي، يۇلتۇزلارنى ياراتتى»،— دەيدۇ. بالىسى دادىسىنىڭ سۆزلىرى ئاڭلاپ، بىراز ئويلانغاندىن كېيىن ئۇنىڭدىن: «دادا، ئۇنداقتا خۇدانى كىم ياراتتى؟»— دەپ سورايدۇ.
دادىسى: «ئوغلۇم، ئۇنى ھېچ كىم ياراتمىغان. ئۇ ئەزەلدىن بار ئىدى»،— دەپ جاۋاب بېرىدۇ. بۇ ئاددىي جاۋاب بالىغا ھازىرچە يېتەرلىك. ئەمما، بالا چوڭ بولۇپ، يەنىلا شۇ سوئال ئۇنى قىزىقتۇرىدۇ. ئۇ ئۆز-ئۆزىدىن: «ھەممە نەرسىنىڭ، ھەتتا چەكسىز كائىناتنىڭمۇ باشلىنىشى بار تۇرسا، ئۇنداقتا خۇدا زادى قانداق پەيدا بولغان؟»— دەپ سوراپ، ئۇيان-بۇيان ئويلىنىپ قىينىلىدۇ.
مۇقەددەس كىتاب نېمە دەيدۇ؟ ئەسلىدە يۇقىرىدا تىلغا ئېلىنغان ئاتىنىڭ ئېيتقانلىرى مۇقەددەس كىتابتا يېزىلغانلارغا كۆپ جەھەتلەردىن ماس كېلىدۇ. مۇسا پەيغەمبەر مۇنداق دېگەن: «ئەي يەھۋا، . . . تاغلار تۇغۇلۇشتىن ئىلگىرى، يەر يۈزى ۋە مۇنبەت زېمىن ۋۇجۇتقا كېلىشتىن ئاۋۋال، ئەزەلدىن ئەبەدغىچە خۇدادۇرسەن» (زەبۇر 90:1، 2). يەشايا پەيغەمبەر بولسا: «سەن بىلمىدىڭمۇ؟ ياكى ئاڭلىمىدىڭمۇ؟ پۈتكۈل يەر يۈزىنىڭ ياراتقۇچىسى يەھۋا مەڭگۈلۈك خۇدادۇر»،— دېگەن (يەشايا 40:28). شۇنىڭغا ئوخشاش، مۇقەددەس يازمىلارنىڭ باشقا ئايىتىدە، خۇدانىڭ ئەزەلدىن تا ھازىرغىچە ۋە ئەبەدىل-ئەبەد ئىكەنلىكى ھەققىدە ئېيتىلغان.—يەھۇدا 24.
بۇ ئايەتلەر ئەلچى پاۋلۇس ئېيتقاندەك، خۇدانىڭ «مەڭگۈلۈك پادىشاھ» ئىكەنلىكىنى كۆرسىتىدۇ (1-تىموتىي 1:17). ئۆتمۈشكە قانچىلىك ئۇزاق نەزەر سالمايلى، بۇ خۇدانىڭ ئەزەلدىن بارلىقىنى بىلدۈرىدۇ. شۇنىڭدەك، ئۇ كېلەچەكتىمۇ ھەردائىم بار بولىدۇ (ۋەھىيلەر 1:8). دېمەك، ھەممىگە قادىر ئاللانىڭ ئەزەلدىن بار بولۇشى پەقەت ئۇنىڭغا خاس بىر ئاساسىي خۇسۇسىيەتتۇر.
نېمە سەۋەبتىن، بىز ئۈچۈن بۇ ئوي-پىكىرنى قوبۇل قىلىش قىيىن؟ ئۆمرۈمىز قىسقا بولغاچقا، بىزنىڭ ۋاقىت چۈشەنچىسىگە بولغان كۆز قارىشىمىز خۇدانىڭكىدىن كۆپ پەرقلىنىدۇ. ئاللا مەڭگۈلۈك ئىكەن، ئۇنىڭ ئۈچۈن مىڭ يىل بىر كۈندەكتۇر (2-پېترۇس 3:8). مەسىلەن، چېكەتكىلەرنىڭ بەزى تۈرلىرى 50 كۈنگىچە ياشايدۇ. ئاشۇ چېكەتكىلەر 70 ياكى 80 يىللىق ئۆمرۈمىزنى چۈشىنىپ يېتەلەمدۇ؟ تەسەۋۋۇر قىلىش تەس! بىراق، مۇقەددەس كىتابنىڭ چۈشەندۈرۈشىچە، ياراتقۇچىمىزغا سېلىشتۇرغاندا، بىز خۇددى چېكەتكىلەرگە ئوخشاش. ھەتتا ئوي-پىكىر قىلىش قابىلىيىتىمىزمۇ خۇدانىڭكىگە قارىغاندا، ئىنتايىن چەكلىك (يەشايا 40:22؛ 55:8، 9). شۇ سەۋەبتىن، ئىنسان ياراتقۇچى يەھۋانىڭ بەزى خۇسۇسىيەتلىرىنى تولۇق چۈشىنىپ يېتەلمەيدۇ.
گەرچە خۇدانىڭ ئەزەلدىن بارلىقىنى چۈشىنىش قىيىن بولسىمۇ، بۇ ئەقىلگە مۇۋاپىق. ئەگەر كىمدۇ-بىرسى خۇدانى ياراتقان بولسا، ئۇنداقتا ئاشۇ شەخسنى ياراتقۇچى دەپ قارىغان بولاتتۇق. بىراق، مۇقەددەس كىتاب «ھەممە نەرسىلەرنى [يەھۋا] ياراتتىڭ» دەيدۇ (ۋەھىيلەر 4:11). بۇنىڭدىن باشقا، بىز كائىناتنىڭ ئىلگىرى بىر زامانلاردا مەۋجۇت ئەمەسلىكىنى بىلىمىز (يارىتىلىش 1:1، 2). ئۇنداقتا ئۇ قانداق پەيدا بولغان؟ ئەلۋەتتە، بىر ياراتقۇچى ئۇنى بەرپا قىلغان بولۇشى كېرەك. ئۇنىڭدىن باشقا، خۇدا پەرىشتىلەر كەبى ياراتمىلاردىن ئاۋۋال بار ئىدى (ئايۇپ 38:4، 7؛ كولوسىلىقلار 1:15). ئېنىقكى، دەسلەپتە ئۇ يالغۇز مەۋجۇت بولغان. خۇدانىڭ يارىتىلغانلىقى مۇمكىن ئەمەس، چۈنكى ئۇنى ياراتقان ھېچ كىم يوق.
بىزنىڭ ۋە پۈتكۈل كائىناتنىڭ مەۋجۇت بولۇپ تۇرۇشى مەڭگۈلۈك خۇدانىڭ بار ئىكەنلىكىنى تەستىقلايدۇ. پۈتكۈل كائىناتنى ھەرىكەتكە كەلتۈرگەن ۋە ئۇنى باشقۇرۇش ئۈچۈن قانۇنلارنى ئورناتقان شەخس ئەزەلدىن بار بولۇشى كېرەك. پەقەت ھەممىگە قادىر ئاللا بارچە جان ئىگىلىرىگە ھايات نەپىسىنى بەرگەن.—ئايۇپ 33:4.
بۇلارغىمۇ قىزىقىشىڭىز مۇمكىن
مۇقەددەس كىتاب. سوئال-جاۋاب
خۇدا بارمۇ؟
مۇقەددەس كىتاب ئىشەنچىلىك بەش ئىسپات بىلەن تەمىنلەيدۇ.
مۇقەددەس كىتابنىڭ ئاساسىي تەلىملىرى
خۇدانىڭ ئىسمى بارمۇ؟
خۇدانىڭ نۇرغۇن ئۇنۋانلىرى بار. ئۇلارنىڭ بەزىلىرى: ھەممىگە قادىر، ياراتقۇچى ۋە رەب. لېكىن خۇدانىڭ خاس ئىسمى مۇقەددەس كىتابتا 7000 قېتىم ئۇچرايدۇ.
