O Estados Unidos leci ci soka 30 kalupale o ko Europa va pisa lungangala elambalalo kuenda oku kangisiwa Kuolombangi Via Yehova ko Rusia. Esapulo liaco lia lingiwa vokuenda kuohongele ya lingiwa Locisoko Ceteyuile kuenda Cekuatiso ko Europa keteke 23 Yevambi wo 2020.

Ukãi umue ukuakueca alungulo o tukuiwa Lane Darnell Bahl, wa popia kovaso yolombiali hati: “O Estados Unidos kuenda omanu vakuavo va kasi vohondo yilo, va vangula kuenda va kasi oku amamako oku vangula catiamẽla kovolandu wungangala akuenje velombe va linga, oku kapiwa vokayike, ovicapa vioku kapa omanu vokayike ci soka anyamo epandu kuenda ekangiso Liolombangi Via Yehova li lingiwa lolombiali vio ko Rusia.”

Olombiali via sakalalele calua capiãla enene leci si soka 100 kolonjo Violombangi Via Yehova okuti va vi tuyuila ko Voronej. Ukãi o tuiwa hati ukuakueca alungulo wa popia hati: “Oku kangisa ocimunga cimue cetavo okuti vakuambembua, ci sumuisa calua.”

Usongui wo ko Reinos Unidos, Nicola Murray, wa lombololavo okuti, “oku livokiya kuetendelo lioku kũlĩhĩla, oku kongelamo oku tuyuila olonjo, ku lekisa okuti kua lingiwa esokiyo limue lioku lambalala Olombangi Via Yehova.” Nicola Murray wamisako hati: “Uvangi wa kuamiwa la vakuakukonomuisa mua kongela oku lambalalava Olombangi Via Yehova.”

Handi vali, Lane Bahl wa situlula ovohembi olombiali vio ko Voronej vina via enda oku lundila Olombangi Via Yehova hati, “vi kuete eko omo liovilinga viavo vietombo.” Vovilinga viaco, mua kongela oku soleka ovolandu volotelefone kuenda ovicapa vikuavo, oku sokiya ovimunga, loku talavaya lolotelefone oco va linge olohongele viavo. Lane Bahl wa popia hati, elinga eli liolombiali vio ko Rusia “lĩvi kuenda li kutisa osõi.” Eye wa popiavo hati: “Nda siatavo oku linga ovina viaco, va tukula vati, ‘ovilinga vietombo,’ oloneke viosi.” Eye hati vana va kuete omoko yoku sombisa ko Russia okuti va kala kohongele ya lingiwa lolotelefone, va “kuetevo eko omo lioku kuama onjila yaco.”

Vulandu umue ci soka 27 komanu vo ko União Europeia leci ci soka omanu ecẽlãla va tiamẽla ko (EU) va popia vati: “Tua yeva eci Ombonge yavelapo yo ko Russia ya popia olonjanja vialua catiamẽla Kelungulo Liotembo Yosi ndomo Olombangi Via Yehova vi kasi, oku linga olohongele viavo kuenda omoko yelianjo lietavo liavo ya eciwa luviali wo Federação Russa. Ndaño ndoco, tu lete ovolandu alua a lekisa oku tuyuiwa kuolonjo, oku kapiwa volokayike kuenda oku konomuisa lungangala Olombamgi Via Yehova. Eci ca litepa calua leci Ombonge yavelapo yo ko Russia yi popia.”

Ombonge ya velapo yo ko União Europeia (EU) ya popia yiti: “Omanu vosi oku kongelamo Olombangi Via Yehova, va pondola oku kuatisiwa locisoko cekanga ci teyuila ekalo liomanu lonjila yimue ya suapo, oku kongelamo omoko yelianjo liefendelo liavo, elianjo lioku linga olohongele, oku kuata ukamba wombembua, elianjo lioku vangula, oku yuvula olonepele ndomo ca handelekiwa Luviali wo Federação Russa kuenda esokiyo o Russia ya linga ko OSCE, lakisika avo ndomo ci likuata lovihandeleko viofeka.”

Nicola Murray wa malusula epingilo lia lingiwa lo Reino Unido poku pinga okuti o Russia yi malako elambalalo lia siala oku lingiwa Kolombangi Via Yehova.

Lane Bahl wa pinga ko Russia oco (1) yi maleko akonomuiso ungangala a lingiwa Kolombangi Via Yehova, (2) oco yi tiuwiye Ombetele Yolombangi Via Yehova kuenda (3) oku yovola lonjanga Olombangi viosi Via Yehova vi kasi vokayike.

Eyi hayoko onjanja yatete ocisoko colofeka ci pisa o Russia omo lioku tata lungangala Olombangi Via Yehova. Ocisoko colofeka ci lete ndomo Olombangi Via Yehova vi kasi oku lambalaliwa lungangala ko Russia kuenda va yi lemela ale. Ca velapo ceci okuti Yehova wa o letevo ovitangi viosi vamanji va kasi oku liyaka lavio ko Russia (Osamo 37:18) Isietu ukuacisola, o kamamako oku sumũlũisa vamanjetu oco vamameko lekolelo liavo, utõi kuenda epandi.—Osamo 37:5, 28, 34.