Oco. Embimbiliya elivulu limue liolondonge, li tambulula apulilo avelapo atiamẽla komuenyo kuenda li pondola oku ku kuatisa oku kuata esanju. Tala apulilo amue okuti atambululo aco a sangiwa Vembimbiliya.

1. Kuli hẽ ululiki umue? Embimbiliya lipopia okuti Suku eye wa “lulika ovina viosi.” (Esituluilo 4:11) Omo okuti Suku eye ululiki wetu, wa kũlĩha ovina tu sukila oco tu kuate esanju komuenyo.

2. Anga hẽ Suku wa ndi kapako? Embimbiliya ka li popi okuti Suku o kasi ocipãla lomanu, pole, lipopia hati: “Eye ka kasi ocipãla letu.” (Ovilinga 17:27) Eye wa kapako ovina vi lipita love kuenda o yongola okuti o kuata esanju komuenyo.—Isaya 48:17, 18; 1 Petulu 5:7.

3. Oku kũlĩha Suku ci ndi kuatisa ndati oku kuata esanju? Suku wa tu lulika ‘lonjongole yoku lilongisa ovina viatiamẽla kokuaye.’ Etu tua citiwa ale lonjongole yoku kũlĩha elomboloko kuenda ocimãho comuenyo. (Mateo 5:3) Vonjongole yaco, mua kongela oku kũlĩha ululiki wetu kuenda oku kuata ukamba uwa laye. Suku o ka sumũlũisa alikolisilo ove oku u kũlĩha momo Embimbiliya li popia hati: “Amẽli ku Suku kuenje eye amẽla kokuene.”—Tiago 4:8.

Omanu valua va limbuka okuti oku kuata ukamba la Suku ca va kuatisa oku kuata esanju komuenyo. Ocili okuti oku kũlĩha Suku ka ci tetulula ovitangi viove viosi, pole, olondunge vi sangiwa Vembimbiliya vi pondola oku ku kuatisa.

•   Oku kuata esanju vepata

•   Oku kuata ukamba uwa la vakuetu

•   Oku liyaka lovitangi vikuavo, ndeci: Esumuo, ekambo liolombongo, kuenda uveyi una okuti ka u kuete ovihemba.

 Kuli atavo alua okuti va kuama Embimbiliya, pole, ka va pokola kovina olio li longisa. Ca litepa latavo aco, ceci okuti etavo liocili lina lia kapako ovina Embimbiliya li longisa, li ka ku kuatisa oku kũlĩha Suku.