Omõlove wa ku sapuila okuti o kasi oku sanumuiiwa kosikola. Nye o pondola oku linga? O kisika hẽ okuti omunu waco o kangisiwa lusongui wokosikola? O longisa hẽ omõlove oku fetuluinya? Osimbu handi kua nõlele onjila o kuama, konomuisa ovina vimue via kongela koku sanumuiwa. a

•  Nye ndi sukila oku kũlĩha catiamẽla koku sanumuiwa?

•  Ekuatiso lipi ngeca?

 Oku sanumuiwa ku lomboloka nye? Oku sanumuiwa ceci omunu a vetiwa ale a popiwa lãvi okuti ka lingile cimue ale o lipita lovitangi viaco olonjanja vialua. Pole, eci ka ci lomboloka okuti cosi cĩvi omunu a lingila ukuavo oku sanumula.

 Momo lie ci kuetele esilivilo oku kũlĩha eci ci lomboloka oku sanumuiwa? Omanu vamue va tukula ondaka oku “sanumuiwa” oco va yi tiamisile kovituwa viosi ka va sole, ndaño kovina vitito. Pole, nye ci pita nda olonjali vi sumua omo liovina vimue ño vi pita lomãla vavo? Ocituwa caco ci pondola oku kokisa omãla oku sima okuti ovo ka va tẽla oku potolola ocitangi caco lika liavo. Ocituwa caco, ci pondola oku va kuatisa cilo kuenda eci va kula.

 Onumbi Yembimbiliya: “Ku ka teme lonjanga.”—Ukundi 7:9.

 Nye wa nõlapo oku linga: Ocili okuti, olonjanja vimue o sukila oku kuatisa omõlove. Pole, kapuluvi akuavo, ecelela okuti omõlove o yula ovitangi viaco lika liaye.—Va Kolosai 3:13.

 Pole, nye o linga nda omõlove wa ku sapuila okuti o kasi oku sanumuiwa?

•   U yevelela lepandi. Seteka oku kũlĩhĩsa (1) Eci ci kasi oku lipita laye kuenda (2) esunga lieci omõlove a kasilili oku sanumuiwa. Ku ka linge cimue osimbu kua kũlĩhĩsile ovina viosi via kongelamo. Lipula ndoco: ‘Anga hẽ kuli cimue sia kũlĩhĩle vulandu waco?’ Oco o kũlĩhe ovina viosi via kongelamo, pamue o sukila oku sapela lulongisi womõlove ale lonjali yomõla ukuavo.

  Onumbi Yembimbiliya: “Nda umue o kumbulula osimbu ka yevele ciwa, wa linga uveke kuenje cu kutisa osõi.”—Olosapo 18:13.

• Nda omõlove o kasi oku sanumuiwa ocili, u kuatisa oku limbuka okuti ovituwa a lekisa vi pondola oku tepulula ale oku vokiya ocitangi caco. Ndeci, Embimbiliya li popia hati: “Etambululo liombembua li tulumũla ocikumbiti, ondaka ya kãla puãi yi wengula onyeño.” (Olosapo 15:1) Ocili okuti oku fetuluinya ci pondola oku vokiya ocitangi caco coku sanumuiwa.

  Onumbi Yembimbiliya: “Ko ka fetuluinyi ũvi lũvi, ale esepu lesepu.”—1 Petulu 3:9.

• Lekisa komõlove okuti oku yuvula oku fetuluinya ka ci lomboloka ekambo liutõi, ale usumba. Esunga liaco, lieli okuti eye ka ecelela okuti omunu ukuavo o lava eci a linga. Lonjila eyi omõlove o ka yula ukuakusanumula okuti ka fetuluinya.

  Oku ci linga ci kuete esilivilo lialua momo cu kuatisa, nda o kasi oku sanumuiwa vo internet. Oku litambolola vo internet ci koka okuti ukuakusanumula amamako oku ci linga kuenda ci koka okuti umue o lundila omõlove okuti ukuakusanumula! Omo liaco, oku uhã olio etambululo liavelapo. Ocituwa cimue ci tulumuisa okuakusanumula okuti omõlove o tẽla oku potolola ocitangi caco.

  Onumbi Yembimbiliya: “Pa kamba olohui ondalu yima.” —Olosapo 26:20.

• Olonjanja vimue citava okuti omõlove o yuvula omanu vana nda vo nenela ovitangi kuenda ovituwa nda via koka oku sanumula. Nda eye wa kũlĩha ocitumalo omanu ale ocimunga cimue va siata oku kala, o sukila oku yuvula oku pita pocitumãlo caco omanu vaco va kasi oco ayule ovitangi.

  Onumbi Yembimbiliya: “Omunu wa lunguka o mõla ũvi kuenje o lisalamisa; omunu wa kamba olondunge enda ño kuenje o yambuka.”—Olosapo 22:3.

Seteka ndoco: Konomuisa lomõlove olonjila a sukila oku kuama kuenda u kuatisa oku limbuka asumũlũho eyililako. Ndeci:

• Nye ci pita nda wa yuvula oku tambulula ukuakusanumula?

• Nda lutõi walua wa sapuila ukuakusanumula oco a liwekepo?

• Anga hẽ o sukila oku sapuilako ulongisi waye eci ci kasi oku lipita laye?

• Anga hẽ o ka tẽla oku “yula” ukuakusanumula nda wa lekisa esanju kuenda oku likandangiya?

Ivaluka okuti kakuli onjila ya suapo yi nõliwa; momo oku sanumuiwa ci lingiwa volonjila via litepa. Omo liaco, kuatisa omõlove oco a tẽle oku potolola ovitangi. U sapuila okuti o pondola oku u kuatisa otembo yosi.

Onumbi Yembimbiliya: “Ekamba li sola olonjanja viosi, kuenje li linga manjove koloneke viohali.”—Olosapo 17:17.