Elivulu limue lia vana va kuete ocikele coku kuatisa akãi oku cita, lia lombolola ndoco: “Asenjele osema oku eca koloñaña, lalimue eteke a ka li soka lasenjele a tunda vavele liomunu.” Esunga limue lieci asenjele o vevele a kuetele esilivilo koñaña lieli okuti, asenjele aco a pongolola etimba ndomo ci likuata lesukila liaye.

 Kũlĩhĩsa: Asenjele a tunda vavele a pongoloka tunde kefetikilo toke kesulilo osimbu oñaña yi fetika oku lia ovina via litepa. Asenjele a tete a tunda vavele a kuete oloproteina vialua, olovitamina, olominerais kuenda ovava osimbu okuti, asenjele a sulako a kuete vali ulela walua, loku ecelela okuti, osimbu oñaña yi nyama ci mula onjala yaye. Handi vali, asenjele a ina a pongolola osimbu oñaña yi kula kuenda vapuluvi amue unyamo.

 Vasenjele a tunda vavele, etendelo lio lohormôniu vimue, ndeci o melatonina yi kuatisa omanu oku pekela, yi livokiya calua vokuenda kuteke osimbu okuti, olohormoniu vikuavo vi livokiya vokuenda kueteke. Catamba ño kelivala lieteke, apongoloko aco olohormoniu a kokela lioñaña oku pekela, ocina cimue ci kuatisa oñaña oku kuata ekalo liaco lioku pekela ale lioku vanja.

 Vokuenda kuoloneke viatete noke lioñaña oku citiwa, vavele a inaye mu tunda asenjele a kuete evala liungolo a tukuiwa okuti, kolostro. O kolostro yi puamo lonjanga vimo lioñaña kuenda yi kuete olonutriente vialua okuti, ndaño oñaña yi nyama citito cu kuatisa calua. O kolostro yi kuete esilivilo lialua momo yi teyuila oñaña oco ka yi ka kuatiwe lovovei amue.

 Va ina ka va sukila oku sakalala nda vavele mu ka tunda asenjele alua ndaño ceci va cita olonjamba, momo asenjele a livokiya nda ci sukiliwa.

 Nye o sima? Asenjele a tunda vavele a ina okuti a velapo, a tukuluka ño? Ale a lulikiwa?