Oco ocipuka cimue ci tẽle oku pãlala, oku tẽha kuenda oku lianja ci sukila oku yela. Ndeci, nda olombinga violonjinji via sĩla ci tepulula uloño woku li songuila oku sapela pokati kuenda oku limbuka elemba. Zoólogo Alexander Hackmann, wa popia hati, eli olio esunga liokuti lalimue eteke o ka sanga ocipuka cimue ca sĩla.” Eye wa amisako hati: “Ovio via limbuka ndomo vi tetulula ocitangi coku livĩhĩsa losi.”

 Kũlĩhĩsa ndoco: Hackmann kuenda vana va tangela kumosi, va lilongisa ovina olonjinji vimue (Camponotus rufifemur) vi talavaya lavio oco vi yelise olombinga. Ovo va limbuka ndomo olonjinji vi linga oco viupe alĩho a litepa kolombinga. Ovio vi ketika ovolu oco vi linge ocitokeko kuenje vi nalela ombinga lombinga vocitokeko. Olonepa vinene viocitokeko viupa olonepa vinene vielĩho. Olonepa vitito vielĩho viupiwa lopendu yimue ya pelevela yi kuete apuluvi amuamue oluveyi violombinga vialio. Ovinene vina okuti vitito calua (okuti vi kuete 1/80 ko diametro ndesinga liomunu,) viupiwa lovikolo vio ci yeliso cimue ca pelevela vali calua.

 Tala olunjinji lumue oku yelisa ombinga

 Hackmann locimunga caye va tava okuti onjila olonjinji vi talavaya lavio oco vi yelise olombinga yi pondola oku kuamiwa kolomakina vinene. Ndeci, olonjila vimuamue vioku yelisa vi pondola oku kapiwako oco ku yuvuiwe ovitangi vi kokiwa lovinene vokuenda kuokupanga ovikuata vimue vi talavaya lolusu kuenda ovina vi kuavo via leñela.

 Nye o sima? Uyelisi wolombinga violonjinji wa tu kulukaño? Ale wa lulikiwa?