OCIPAMA 25

Ndi yula ndati ocituwa coku litukusa kovimatamata viuyali?

“Nda fetika oku kuata ocituwa coku litukusa kovimatamata viuyali, eci nda kuanta anyamo ecelãla. Noke nda lilongisa ndomo Suku a tenda ocituwa caco. Nda enda oku kuata esumuo lialua olonjanja viosi ndi kuata vali onjongole yoku ci linga. Nda enda oku sima ndoco: ‘Suku o pondola oku sola ndati umunu umue ndame?’”—Luiz.

ECI omunu a pitĩla kutunga wovumalẽhe, onjongole yoku lipekela yi pondola oku livokiya. Omo liaco, amalẽhe va pondola oku kuata ocituwa coku litukusa kovimatamata viuyali. a Omanu valua, va sima okuti oku ci linga ekanduko. Va popia vati: “Eci ka ci koki ocitangi komunu umue.” Pole, kuli asunga awa lieci tu sukilila oku yuvula ocituwa caco. Upostolo Paulu wa soneha ndoco: “Ipayi ovimatamata vietimba liene. . . ndeci . . . oloñeyi viukahonga.” (Va Kolosai 3:5) Ocituwa coku litukusa kovimatamata viuyali, ka ci ipaya oloñeyi viukahonga ale oku vi tepulula pole, ci vetiya. Handi vali, kũlĩhĩsa ovina vikũaimo:

● Ocituwa coku litukusa kovimatamata viuyali, ci koka okuti omunu vocipikipiki o kuata onjongole yoku lipekela. Ndeci, eci omunu umue a kuete ocituwa coku litukusa kovimatamata viuyali, o tiamĩsila lika utima kolonjongole viaye muẽle.

● Ocituwa coku litukusa kovimatamata viuyali, ci koka okuti, omunu o tenda omanu vakuavo ndocimalẽho cimue coku papala, oco a tẽlise olonjongole viaye vioku lipekela.

● Ocituwa coku litukusa kovimatamata viuyali, ci koka okuti omunu o lisokolola eye muẽle kuenda ka ci leluka eye oku kuata esanju poku lipekela volohuela.

Oco ku ka tẽlise olonjongole vioku lipekela poku litukusa kovimatamata viuyali, likolisilako oku kuata ocituwa coku likandagiya. (1 Va Tesalonike 4:4, 5) Oco o ci linge, Embimbiliya li eca alungulo a ku kuatisa oku yuvula ovina vi pondola oku ku kokela onjongole yoku lipekela. (Olosapo 5:8, 9) Pole, nye ci popiwa nda wa linga upika wocituwa coku litukusa kovimatamata viuyali? Pamue wa seteka oku liwekapo, pole, kua ci tẽlele. Nda ca leluka oku sima okuti, ku kuete esilivilo kuenda ku tẽla oku kapako olonumbi via Suku. Eci oco umalẽhe umue o tukuiwa Pedro a simile. Eye wa popia hati: “Eci ocituwa caco ca enda oku tiuka nda enda oku sumua calua. Nda simile okuti lalimue eteke nda ponduile oku yula ocitangi caco. Ka ca lelukile oku likutilila.”

Nda oco o liyevite, ku ka sumue. Ku kasi lika liove. Amãlehe valua kuenda akulu, va tẽla oku yula ocituwa coku litukusa kovimatamata viuyali. Ove o pondolavo oku yula ocituwa caco!

Ndomo tu Yula Ovisimĩlo ka Via Sungulukile

Ndomo tua konomuisa, vana va kueta ocituwa coku litukusa kovimatamata viuyali, olonjanja vialua va kuatiwa lovisimĩlo ka via sungulukile. Ocili okuti, ‘esumuo li li kuata locipango ca Suku,’ li pondola oku vetiya omunu oku yula ocituwa caco. (2 Va Korindo 7:11) Pole, oku livetela evelo lonjila yimue ka ya sungulukile, ka ci kuatisa. Ci koka okuti omunu o kuata esumuo lialua toke petosi lioku liwekapo oku likolisilako oco o yule ocituwa caco.—Olosapo 24:10.

Omo liaco, likolisilako oco o tende ocitangi caco lonjila ya sunguluka. Ocituwa coku litukusa kovimatamata viuyali, ci panga onepa kevĩho. Ci koka okuti, ove o kala ‘upika voloñeyi viñi viñi’ kuenda o kuata ovisimĩlo ka via sungulukile. (Tito 3:3) Pole ocituwa caco, ka ci sokisiwa lekandu lioku linga evĩho liukahonga. (Yuda 7) Nda o kuete ocituwa coku litukusa kovimatamata viuyali, ku ka sime okuti, wa linga ekandu limue okuti ku sesamẽla oku eceliwa. O sukila oku panamala konjongole yaco kuenda lalimue eteke ku ka liwekepo oku yaka oco o yule!

Ca leluka oku sumua eci o kuata vali onjongole yoku ci linga. Eci ovina viaco vi lipita, ivaluka olondaka vi sangiwa kelivulu Liolosapo 24:16, viokuti: “Momo ukuesunga o pondola oku kupuka olonjanja epanduvali, kuenje o ka votoka vali, pole, ondingaĩvi yi ka lilondoka omo liohali.” Oku kuata vali onjongole yoku ci linga vokuenda kuotembo yimue, ka ci lomboloka okuti umunu umue ondingaĩvi. Omo liaco, ku ka liwekepo. Pole, kũlĩhĩsa apuluvi a koka okuti o kuata vali onjongole yoku ci linga kuenda seteka oku vi yuvula.

Sanda otembo yoku sokolola catiamẽla kocisola kuenda ohenda ya Suku. Ukualosamo Daviti okuti, wa liyakavo lapuluvi ehonguo, wa popia hati: “Ndeci isia umue a lekisa ohenda komãla vaye,haico Yehova a lekisa ohenda ku vana vo sumbila. Momo eye wa kũlĩha ciwa ndomo tua pangiwa,Ivaluka okuti, tuneketela. (Olosamo 103:13, 14) Ocili, Yehova wa wa kũlĩha okuti ka tua lipuile kuenda “wa likapelako oku ecela.” (Olosamo 86:5) Pole, eye o yongola okuti tu likolisilako oku yula ovituwa vĩvi. Ovina vipi o sukila oku linga oco o yule ocituwa caco cĩvi?

Kũlĩhĩsa olomapalo wa siata oku linga. Anga hẽ, wa siata oku tala olofilme, ovipama vio Televisãu ale vio internet, vi vetiya oku kuata onjongole yoku lipekela? Ukualosamo wa lekisa olondunge poku likutilila ku Suku hati: “Ku ka ecelele okuti ndi vanja kueci ka ci silivila.” b—Olosamo 119:37.

Tiamisila ovisimĩlo viove kovina vikuavo. Ukristão umue o tukuiwa William, wa eca elungulo liokuti: “Osimbu kua pekelele, tanga ocina cimue catiamẽla Kembimbiliya. Ci kuete esilivilo lialua okuti ,ocisimĩlo casulako keteke, ci kala ocina cimue catiamẽla Kembimbiliya.”—Va Filipoi 4:8.

Sapela lomunu umue catiamẽla kocitangi caco. Oku kuata osõi ci koka okuti ka ci leluka ove oku sapela lomunu umue catiamẽla kocitangi caco. Pole oku ci linga, ci pondola oku ku kuatisa oku yula ocituwa coku litukusa kovimatamata viuyali. Eci oco Ukristão umue o tukuiwa David a limbuka. Eye wa popia hati: “ Nda sapela la isiange. Lalimue eteke ndi ka ivalako ovina eye a popia. Loku yola, eye wa ndi sapuila hati: ‘Nda ku sanjukila calua!’ Eye wa kũlĩhĩle okuti nda kuata utõi woku vangula catiamẽla kondaka yaco. Ka kuli ondaka layimue yikuavo okuti, nda ya ndi sanjuisa calua loku ndi vetiya oku linga cosi ndi tẽla.

“Isiange wa ndi lekisa ovisonehua vimue vi ndi kuatisa oku limbuka okuti, sia lingile ekandu linene. Noke wa ndi lekisavo ovisonehua vikuavo, oco ndi kuate elomboloko liovina vĩvi nda linga. Eye wa ndi sapuila oco ndi likolisileko kuenda okuti, noke yotembo yimue tu sapela vali catiamẽla kondaka yaco. Wa ndi sapuilavo okuti, si sukila oku sumua nda okuti nda kuata vali onjongole yoku ci linga, pole, nda sukila oku pita otembo yimue okuti si tiamiksila utima kolonjongele viaco.” Nye Daviti a nõlapo oku linga? Eye wa popia hati: “Oku ecelela okuti omunu umue o kũlĩha ocitangi cange loku ndi kuatisa, oco ocina ca velapo nda linga.” c

KOCIPAMA CI KUÃIMO

Oku lipekela osimbu omunu ka kuelele, ekandu linene. Limbuka esunga liaco.

[Atosi Pombuelo Yemẽla]

 OCISONEHUA CA VELAPO

“Tila oloñeyi viovomalẽhe, sanda esunga, ekolelo, ocisola kuenda ombembua la vana va vilikiya Ñala lutima wa yela.”—2 Timoteo 2:22.

 ONUMBI

Likutilila osimbu olonjongole viaco ka via livokiyile. Pinga ku Yehova oco a ku ĩhe “unene wa piãla” okuti, o tẽla oku liyaka loseteko yaco.—2 Va Korindo 4:7.

 WA CI KŨLĨHA . . . ?

Omunu wosi wa hongua, o pondola oku yapuisiwa loloñeyi viaye vioku lipekela. Pole, ci kaile alume ale akãi, va sukila oku likolisilako calua oco va likandangiye ndaño ceci va kasi lika liavo.

CECI NDI PONDOLA OKU LINGA!

Ndi tiamisila utima kovina viwa nda okuti ame ․․․․․

Si tava oku yuliwa lolonjongole, pole, ․․․․․

Nda ayonguile oku pula kolonjali viange ovina evi viatiamẽla kondaka eyi ․․․․․

 O TAMBULULA NDATI?

● Momo lie ci kuetele esilivilo oku ivaluka okuti Yehova “wa likapelako oku ecela”?—Olosamo 86:5.

● Omo okuti Suku wa tu lulika lonjongole yoku lipekela, pole, wa popiavo okuti tu sukila oku likandangiya, ekolelo lipi eye a tu kuetele?

[Olondaka vi teta onimbu kemẽla 182]

Tunde eci nda yula ocituwa caco, ndi kuete utima wa yela kovaso a Yehova okuti, ocina cimue si piñainya locina cikuavo coluali lulo!’’—Sarah

[Ociluvialuvia kemẽla 180]

Oku kupuka vokuenda kuolupesi lumue, ka ci lomboloka okuti o sukila vali ku upisila. Cimuamue haico okuti, oku kuata vali onjongole yoku litukusa kovimatamata viuyali osimbu o kasi oku likolisilako oku yula ocituwa caco, ka ci tiukilisa konyima alikolisilo wa linga ale