NGA hẽ omunu umue nda wamamako oku kolela ku Suku nda wa kapiwile voseteko toke kesulilo liomuenyo waye kuenda nda epokolo ka lia nenele onima layimue? Epulilo eli lia votuiwa—kuenda lia potoluiwa—eci kua pita ocitangi culume umue o tukuiwa Yovi.

Eci va Isareli va kala handi Kegito, ulume umue Yovi okuti wa kala epata lia Avirahama, wa kala kofeka yina etaili yi tukuiwa okuti, ko Arábia. Eteke limue, ovangelo va liongoluile kovaso ya Suku kuenda Satana ukuesino wa kalavo pokati kavo. Vokuenda kuohongele yaco ya lingiwa kilu, Suku wa popia eci catiamẽla kekolelo ufendeli waye Yovi ukuacili o kuetele. Ocili okuti, Yehova wa popia okuti, ka kua kaile omunu laumue wa kuatele ekolelo ndeli lia Yovi. Pole, Satana wa popia okuti, Yovi wa kala ño oku vumba Suku omo okuti, wa kala oku u sumũlũisa loku u teyuila. Satana handi wa popiavo okuti, ovina viosi Yovi a kuete nda vo viupa, wa laikele oku siñala Suku.

Suku wa ecelela okuti, Satana o upa tete ovokuasi aye kuenda omãla vaye, kuenje wo upavo uhayele waye. Yovi ka kũlĩhĩle okuti Satana eye wa kala oku u kokela ovitangi viaco kuenda ka kuatele elomboloko lieci Suku a kalela oku ecelela okuti, eye o liyaka loloseteko viaco. Ndaño lovina viaco, eye lalimue eteke a yandulukile Suku.

Akamba vatatu vesanda va nyula Yovi. Volondaka vialua vi sangiwa velivulu lia Yovi, alume vaco va seteka oku vetiya Yovi oku tava okuti, Suku eye wa kala oku u kangisa omo liakandu a linga vuyombeki. Va popiavo okuti, Suku ka sanjukila afendeli vaye kuenda ka va kolelele. Yovi ka tavele kovisimĩlo viavo viesanda. Lutõi walua, eye wa popia okuti, o kamamako lekolelo toke kolofa!

Pole, Yovi wa linga ekandu lioku lisakalaisa calua oco a li teyuile. Umalẽhe umue o tukuiwa Elihu wa yevelela olombangulo viosi kuenje, wa fetika oku vangula. Elihu wa pisa Yovi omo ka kapeleko okuti, omoko ya Yehova Suku yoku viala, ya velapo okuti yomanu ci sule. Handi vali, wa pisa lutõi walua akamba vesanda va Yovi.

Noke Yehova Suku wa vangula la Yovi poku mioñolola onjila yaye yoku sokolola. Oco Yovi a kuate elomboloko liokuti omanu va sule calua poku va sokisa la Yehova Suku, eye wo vetiya oku tiamisila utima koviluvo vialua vi komõhisa. Yovi wa tava lumbombe oku penguluiwa la Suku. Omo okuti Yehova “ukuacisola calua haeye ukuahenda,” wa tumbulula uhayele wa Yovi, wa eca luvali ovokuasi a kuatele osimbu kuenda wo sumũlũisa poku wĩha omãla ekũi. (Tiago 5:11) Yovi poku amamako oku lekisa ekolelo ku Yehova poku liyaka loloseteko via kãla, wa eca etambululo kelundi lia Satana liokuti, omanu ka va pondola oku amamako oku lekisa ekolelo ku Suku nda va setekiwa.

​—Lia kunamẽla kelivulu lia Yovi.