VOLUALI luosi, muli atavo alua, ovisoko viopulitika, vakualomĩlu okuti, va kuete ovituwa via litepa, ovimãho kuenda ovisimĩlo. Pole, kuli ocisoko cimue ca litepa lovisoko viosi. Ondaka ya Suku yi tukula ocisoko caco okuti, Olombangi Via Yehova. Momo ovo va kuama olonumbi Viembimbiliya kovina viosi va linga.

² Tua sanjuka omo ove o kasi vocisoko ca Yehova. Ove wa limbuka ocipango ca Suku kuenda cilo o kasi oku linga ocipango caye. (Os. 143:10; Rom. 12:2) Ove wundingupange yimue yi vumbila kumosi longongela ya vamanji voluali. (2 Va Kor. 6:4; 1 Pet. 2:17; 5:9) Ndomo Ondaka ya Suku yi likuminya, oku ci linga ci nena asumũlũho kuenda esanju. (Olos. 10:22; Mar. 10:30) Poku linga lutima wosi ocipango ca Yehova cilo, ove o kasi oku pongiyiwila elavoko limue li komohĩsa halio li kala otembo ka yi pui.—1 Tim. 6:18, 19; 1 Yoa. 2:17.

³ Ululiki Wetu wa Velapo o kuete ocisoko cimue voluali ka ci sokisiwa, ci songuiwa lolonumbi viaye. Eci ci lomboloka okuti, ci songuiwa la Yehova, Utue wa vosi. Tua kolela kokuaye lutima wosi. Eye Onganji yetu, Upopeli wetu kuenda o Soma yetu. (Isa. 33:22) Omo okuti Hasukuko yombuanja, eye o kuete ocisoko cimue ci tu ecelela ‘oku talavayela kumosi laye,’ loku tẽlisa ocipango caye.—2 Va Kor. 6:1, 2.

 ⁴ Osimbu tu panda kesulilo lioluali lulo, etu tu kasi oku amamako oku songuiwa la Soma wa nõliwa, Kristu Yesu. (Isa. 55:4; Esit. 6:2; 11:15) Yesu, eye wa sapuilile olondonge viaye okuti via laikele oku linga ovina via velapo okuti, evi eye a linga eci a kala palo posi vi sule. (Yoa. 14:12) Olondaka evi nda via tẽlisiwa omo okuti, etendelo liolondonge lia laikele oku livokiya kuenda vokuenda kuotembo yalua, nda va kundila kolonepa viosi violuali. Ovo va laikele oku kunda olondaka viwa Viusoma toke kesulilo lioluali.—Mat. 24:14; 28:19, 20; Ovil. 1:8.

⁵ Eci ci kasi loku tẽlisiwa. Pole, ndomo Yesu a ci popia, upange woku kunda olondaka viwa u ka sulila kotembo Yehova a sokiya. Ovitumasuku Viondaka ya Suku vi lekisa okuti tu kasi ocipepi leteke linene lia Yehova, hailio li yokokisa.—Yoeli 2:31; Sof. 1:14-18; 2:2, 3; 1 Pet. 4:7.

⁶ Omo okuti tua limbuka ale ocipango ca Yehova koloneke vilo via sulako, tu sukila oku likolisilako oku linga eci Suku a yongola. Oco tu ci linge, tu sukila oku kũlĩha ciwa ndomo ocisoko ca Yehova ci talavaya kuenda oku kuama olonumbi viaco. Ovina viosi ocisoko ca Suku ci linga, via kunamẽla Kondaka Yaye, oku kongelamo olonumbi, ovihandeleko kuenda alongiso aye.—Os. 19:7-9.

⁷ Eci afendeli va Yehova va li kolisilako oku kapako olonumbi viaco, va likuata omunga poku talavayela kumosi kuenda va kuata ombembua. (Os. 133:1; Isa. 60:17; Rom. 14:19) Nye ca siata oku pamisa omunga yi kasi pokati ka vamanjetu va sangiwa kolonepa viosi violuali? Ocisola. Tua siata oku vetiyiwa kuenda oku songuiwa locisola. (Yoa. 13:34, 35; Kol. 3:14) Omo liomunga  Suku a siata oku tu ĩha, ci tu kuatisa oku kuama onepa yokilu yocisoko ca Yehova.

⁸ Uprofeto Isaya, Esekiya kuenda Daniele, va kuata ovinjonde vionepa yokilu yocisoko ca Yehova. (Isa. ocip. 6; Esek. ocip. 1; Dan. 7:9, 10) Upostolo Yoano wa kuatavo ocinjonde cimue; kelivulu Liesituluilo eye o tu sapuila eci catiamẽla kocinjonde caco. Eye wa mola Yehova kocalo ci kola okuti, o kasi lovangelo loku popia vati: “O kola, o kola, o kola Yehova Suku, Ukuonene Wosi, una wa kala, o kasi kuenda iya.” (Esit. 4:8) Yoano wa molavo “kocalo kameme” okuti, Kameme ka Suku, Yesu Kristu.—Esit. 5:6, 13, 14; Yoa. 1:29.

⁹ Onjila ndomo ocinjonde ca lekisa Yehova wa tumãla kocalo, ci lomboloka okuti eye o kasi oku Songuila ocisoko caco. Catiamẽla kokuaye kuenda kocikele caye ca velapo, elivulu Liatete Liasapulo 29:11, 12 li popia ndoco: “A Yehova, unene, lupami, lunumbu, leposo kuenda ulamba viove, momo ovina viosi vi kasi kovailu kuenda posi viove. Usoma wove, a Yehova. Wa li lingisa ove muẽle utue womanu vosi. Ovokuasi lulamba vi tunda kokuove kuenje ove o viala ovina viosi kuenda peka liove pali unene lupami kuenje eka liove li tẽla oku lingisa omunu wosi unene loku eca ongusu ku vosi.”

¹⁰ Yesu Kristu ondingupange ya Yehova, o kuete ocikele cimue ca velapo kilu kuenda wa tambula unene walua. Suku, “wa pokuisavo ovina viosi vemẽhi liolomãhi viaye kuenje wo lingisa utue wovina viosi viekongelo.” (Va Efe. 1:22) Upostolo Paulu wa popia eci catiamẽla  ku Yesu hati: “Omo liaco, Suku wo kemainyisa komangu yimue ya velapo kuenda wo wĩha onduko ya velapo olonduko viosi, okuti vonduko ya Yesu ku kekamẽla olongolo viosi viava va kasi kilu, lava va kasi posi, levi viava vio vemehi liongongo kuenda alimi osi a limbuka okuti Yesu Kristu eye Ñala o muisa Suku Isia ulamba.” (Va Fil. 2:9-11) Omo liaco, tu kuete esunga lioku kolela kupange wa Yesu Kristu woku songola.

¹¹ Uprofeto Daniele wa mola vocinjonde cimue, “Ukuasimbu” wa tumala kocalo Caye kilu kuenda wa molavo okuti, olohulukãi vialua [viovangelo] viamamako oku u vumba kuenda olohuluwa vialua via talama kovaso yaye.” (Dan. 7:10) Embimbiliya li tukula olohuluwa viaco viovangelo okuti “oviluvo viespiritu koku linga upange u kola, haivo va tumiwa oku kuatisa vana va piñala eyovo.” (Va Hev. 1:14) Ovangelo vaco vosi, va lipongiyila oku linga ‘upange vocisoko ca Suku.’—Va Kol. 1:16.

¹² Eci tu sanda otembo yoku sokolola kovina viatiamẽla konepa yokilu yocisoko ca Yehova, tu pondola oku kuata elomboloko ndomo Isaya a kala eci a mola ocinjonde ca Yehova, “wa tumãla kocalo ca kemãla haico ca lepa kilu liaye kua kala va Serafi.” Isaya hati: “Noke nda popia siti: “Ngongo yange we! Oku popia muẽle ocili, nda fa ale, momo ndimunu umue ukuamẽla wa vĩha;  kuenda ndi kasi pokati komanu vakuavimẽla via vĩha; Momo ovaso ange a mola Soma okuti, Yehova ukualohoka!” Ocili okuti, Isaya wa komõha calua kuenda wa liyeva okuti utito poku kuata elomboloko lioku velapo kuocisoko ca Yehova. Ulandu owu wa kuata esilivilo lialua kokuaye momo, eci kilu kua tunda elaleko limue liupange umue u likasi woku sandeka asombiso a Yehova, eye hati: “Ame ulo! Va nume ño!”—Isa. 6:1-5, 8.

¹³ Oku kuata elomboloko liunene wocisoko ca Yehova, loku lekisa olopandu kocisoko caco, ci vetiya afendeli Vaye oku lingavo cimuamue. Osimbu ocisoko camamako, tu sandi oku ci kuama. Tu likolisiliko oku kolela kocisoko ca Yehova koloneke vilo.

¹⁴ Ocipama 1 cocitumasuku ca Esekiele, ci situlula okuti Yehova o kasi oku endisa ekãlu linene lio kilu. Ekãlu liaco li komohĩsa, li lomboloka onepa ka yi muiwa yocisoko ca Yehova. Eye endisa ekãlu liaco locisola kuenda o talavaya lalio ndomo ci likuata locipango caye.—Osa. 103:20.

¹⁵ Elola lelola liekãlu liaco, li kuete elola likuavo lia lisoka vokati kalio. Eli olio esunga lieci tu popela okuti alola aco “poku enda, a ponduile oku enda kolonele viosi vikuãla.” (Esek. 1:17) Alola aco a pondola oku enda kolonele viosi lonjanga yalua. Pole ekãlu liaco ka li pondola oku enda okuti ka li songuiwa. Yehova ka ecelela okuti ocisoko caye cenda kolonele viosi ca panga. Elivulu lia Esekiele 1:20 ku popia hati: “Oviluvo viaco, via enda oku enda kuosi espiritu lia va tuma okuti, kuosi oku  espiritu li enda.” Omo liaco, Yehova pocakati cespiritu liaye, eye ecelela okuti ocisoko caye cenda kuosi eye a panga. Tu sukila oku lipula ndoco: ‘Ñasi hẽ oku kuama olonumbi viocisoko caco’?

¹⁶ Voku kuama ocisoko ca Yehova, mua kongela ovina vialua okuti oku enda lika kolohongele loku kunda ci sule. Tete, mua kongela oku kula loku amamako konepa yespiritu. Etu tua “kũlĩha ovina via velapo” kuenda tu kuete okulia kuespiritu. (Va Fil. 1:10; 4:8, 9; Yoa. 17:3) Handi vali, tu sukila oku ivaluka okuti, kuosi kuli ocisoko cimue, kuli eliongotiyo liwa kuenda oku talavayela kumosi. Omo liaco, tu sukila oku ivaluka okuti, ci kuete esilivilo oku talavaya ciwa lotembo yetu, ongusu, ovoloño kuenda ovina Yehova a tu ĩha, oco upange waye u tẽlisiwe. Osimbu tu kuama ekãlu lio kilu lia Yehova, tu sukila oku lekisa ovituwa vi likuata lesapulo tu kunda.

¹⁷ Lekuatiso liocisoko ca Yehova, etu tuamamako oku linga ocipango caye. Ivaluka okuti, Yehova eye o kasi oku Endisa ekãlu liokilu. Omo liaco, eci tu kuama ekãlu liaco, tu lekisa okuti tua sumbila Yehova kuenda tua kolela ku Handa yetu. (Osa. 18:31) Embimbiliya li likuminya ndoco: “Yehova o ka eca ongusu komanu vaye. Yehova o ka sumũlũisa omanu vaye lombembua.” (Osa. 29:11) Omo okuti koloneke vilo tu kasi vocisoko ca Yehova, tu tambula ongusu yaye kuenda tu kuete ombembua a siata oku sumũlũisa layo afendeli vaye. Ocili okuti, tu kamamako oku kuata asumũlũho alua osimbu tu linga ocipango ca Yehova cilo kuenda kovaso yoloneke.