OCIPAMA 13
Timoteo wa Yonguile Oku Kuatisa Omanu
Timoteo wa kala umalẽhe umue wa yonguile oku kuatisa omanu. Eye wa endele kovitumãlo vialua oco a kuatise omanu. Omo liaco, wa kuata esanju lialua komuenyo. Ove hẽ, o yongola oku yeva ulandu waco?—
Timoteo wa kulila volupale lumue lu tukuiwa hati, Lustra. Osimbu a kala oku kula, inakulu yaye Loisi kumue la inaye Eunike, vo longisa eci catiamẽla ku Yehova. Eci Timoteo a kula, wa kuatisa omanu oku lilongisa catiamẽla ku Yehova.
Eci Timoteo a kala umalẽhe, Paulu wa pinga kokuaye oco va ka kundile kovitumãlo vikuavo. Kuenje, Timoteo wa tambulula hati: ‘Citava!’ Eye wa tava oku enda oku kuatisa omanu.
Timoteo wa endele la Paulu volupale lumue ko Makedonia lu tukuiwa hati, o Tesalonike. Oco va pitĩle volupale luaco, va enda ocinãla cimue posi, kuenje, va linga ungende ukuavo locimbaluku. Eci va pitĩla, va kuatisa omanu valua oku lilongisa catiamẽla ku Yehova. Pole, omanu vamue va va kuatela onyeño, kuenje, va yonguile oku va tipula. Pole, Paulu la Timoteo, va tila noke, va ka kundilile kovitumãlo vikuavo.
Timoteo wa kuata esanju komuenyo
Noke yolosãi vimue, Paulu wa pinga ku Timoteo oco a tiukile ko Tesalonike oku kũlĩhĩsa ndomo vamanji va kasi. Oco a tiukile volupale luaco lu koka ohele, wa sukilile oku kuata utõi walua! Pole, Timoteo wa endele volupale luaco momo, wa yonguile oku kũlĩha ndomo vamanji va kasi. Eci a tiuka ku Paulu, wa nena esapulo liwa. Momo, vamanji ko Tesalonike va kala ciwa!
Timoteo wa talavaya kumue la Paulu vokuenda kuanyamo alua. Onjanja yimue, Paulu wa sonehele okuti, Timoteo eye omunu wa velapo a pondola oku tuma, oco a pamise akongelo. Timoteo wa solele Yehova kuenda omanu.
Ove hẽ, o sole omanu, kuenda o yongola oku va kuatisa oku lilongisa catiamẽla ku Yehova?— Nda wa cilinga, o kuata esanju komuenyo ndeci ca pita la Timoteo!
