Yesu olonjanja vialua kupange waye woku kunda wa lombolola esilivilo lioku lekisa umbombe. (Luka 14:8-11) Eye o kasi oku likolisilako oku sandiliya alume lakãi va yongola oku vumba Suku lumbombe. Citava okuti vamue pokati komanu vaco va kũlĩhĩwa okuti vakuakandu.

Va Fareseo kuenda vakuavisonehua va limbuka okuti, vana ovo va tenda ndomanu vaño, ovo va tava kesapulo lia Yesu. Ovo va lisiõsiõla vati: “Ulume u o tambula vakuakandu kuenda o lia lavo.” (Luka 15:2) Va Fareseo la vakuavisonehua va litenda okuti va velapo kuenda va sokisa omanu vaño ndoneketela vemẽhi liolomãhi viavo. Asongui vetavo va lavisile omanu vaco, poku va tukula londaka kelimi lio Heveru hati, ‛am ha·’aʹrets, ‘ale omanu vofeka [vo posi].’

Pole, Yesu o tata omanu vosi lesumbilo, locisola kuenda ocikembe. Omanu valua okuti ambombe, oku kongelamo vamue va kũlĩhĩwa okuti vakuakandu, va yongola oku yevelela Yesu. Nye Yesu a linga eci a popiwa lãvi omo lioku kuatisa omanu vaco ambombe?

Tu limbuka eci Yesu a linga poku ta olusapo lumue lu komõhisa ndolu a tukula ndopo ko Kafarinau. (Mateo 18:12-14) Volusapo lua Yesu, va Fariseo va sokisiwa la vakuesunga va kolapo vocunda ca Suku, osimbu okuti, ambombe omanu vana va yapuka haivo va nyelela ndomo Yesu a ci lombolola volondaka vi kuãimo.

Yesu o popia hati: “Omunu upi pokati kene okuti o kuete 100 colomeme kuenje nda pa nyelela yimosi, ka si 99 vekalasoko kuenda o ka sandiliya yimosi ya nyelela toke eci a yi sanga? Kuenje eci a yi sanga, o yi kapa kapepe loku yolela. Eci a pitĩla konjo, o vilikiya akamba lomanu a lisungue lavo, loku va sapuila hati, ‘Yoleli lame, momo omeme yange ya nyelile nda yi sanga.’”—Luka 15:4-6.

Yesu o lombolola olondaka viaco hati: “Ndu sapuilivo siti, kilu ku kala esanju lialua eci umue ukuakandu a likekembela okuti 99 ya vakuesunga okuti ka va sukila oku likekembela, va sule.”—Luka 15:7.

Olondaka via Yesu viatiamẽla koku likekembela, vi sakalaisa va Fariseo. Ovo va litenda ndavakuesunga okuti ka va sukila vali oku likekembela. Eci vamue pokati kavo va popia lãvi Yesu omo lioku lia la vakuakutambula elisimu kuenda vakuakandu, okuti kotembo yaco kua pitile ale anyamo avali, eye o tambulula hati: “Sieyilile vakuesunga, pole, ndeyilila vakuakandu.” (Marko 2:15-17) Omo va Fariseo vakuakulitunula,  haivo ka va limbuka okuti va sukila oku likekembela, kilu ka ku kala esanju. Eci ca litepa calua nda umue ukuakandu o likekembela!

Yesu o tukula olusapo lukuavo oco a lekise okuti, eci umue ukuakandu a likekembela, kilu ku kala esanju lialua. Eye o tukula eci ci pita vonjo yimue hati: “Ukãi upi o kuete ovingangu ekũi violodracma, okuti nda o nyelisapo o dracma yimosi, ka miha ondiyelo loku komba onjo yaye oco a yi sandiliye lutate toke eci a yi sanga? Kuenje eci a yi sanga, o kovonga akamba vaye akãi la vana a lisungue lavo loku popia hati, ‘Yoleli lame, momo ocingangu cange co dracma ca nyelile nda ci sanga.’”—Luka 15:8, 9.

Yesu o lombolola olondaka via lisetãhala levi a tukula volusapo luomeme ya nyelela hati: “Ndu sapuilivo siti, pokati kovangelo va Suku pa kala esanju eci umue ukuakandu a likekembela.”—Luka 15:10.

Sokolola handi, ovangelo va Suku va yongola calua okuti vakuakandu va tiuka. Eci ci kuete esilivilo, momo vana va likekembela kuenje va sanga ocitumãlo cimue Vusoma wa Suku kilu, va ka kuata ocikele cimue ca velapo okuti covangelo ci sule! (1 Va Korindo 6:2, 3) Pole, ovangelo ka va kuata esepa. Oco hẽ tu liyeva ndati eci umue ukuakandu a likekembela kuenje o tiuka ku Suku?