Yesu la vana va linga laye ungende va pitĩla vo Yeriko okuti ocinãla caco, ungende weteke limosi woku pitĩla ko Yerusalãi. O Yeriko ya tepiwa volonepa vivali okuti, olupale luosimbu lu kasi ocinãla ci soka olokilometulu vivali lolupale luokaliye lua tungiwa vokuenda kuviali wo Roma. Osimbu Yesu kumue lowiñi va tunda volupale lumue oku loña volupale lukuavo, olomeke vivali vakuakupinga osimola vi yeva onjuvungo. Umue pokati kolomeke, onduko yaye Bartimeo

Eci va yeva okuti Yesu o kasi oku pita, Bartimeo lekamba liaye va fetika oku kaluka vati: “A Ñala, tu kuatele ohenda, Amõla a Daviti!” (Mateo 20:30) Vamue pokati kowiñi va va sapuila oco vohẽ, pole, kavali kavo va vokiyako vali oku kaluka. Eci Yesu a yeva onjuela, o talama kuenje o pinga kuava a kasi oku enda laye oco va vilikiye alume va kasi oku kaluka. Ovo va enda toke kalume olomeke kuenje va sapuila umue pokati kavo hati: “Kuata utõi! Votoka; eye wa ku vilikiya.” (Marko 10:49) Lesanju ulume omeke o lula ocikutu caye, o votoka kuenje enda toke ku Yesu.

Yesu o pula hati: “Nye vu yongola okuti oco ndu lingili?” Ovo va popia vati: “A Ñala, patulula ovaso etu.” (Mateo 20:32, 33) Yesu o va kuatela ohenda kuenje o lamba vovaso avo kuenda o sapuila umue pokati kavo hati: “Kuende. Ekolelo liove lia ku kayisa.” (Marko 10:52) Olomeke vivali vakuakupinga osimola vi fetika oku leta, kuenje va sivaya Suku. Alume olomeke okuti kaliye va lete, va fetika oku kuama Yesu.

Osimbu Yesu a pita vo Yeriko, owiñi walua u ñuala. Vosi va yongola oku tala una wa sakula olomeke. Omanu vosi vongolokela Yesu kuenje vamue ka va tẽla oku u mola. Umue pokati kavo Sangeo. Eye, usongui wa vakuakutambula elisimu kovaimbo o Yeriko. Omo okuti eye umbumbulu, ka tẽla oku mola eci ci kasi oku pita. Omo liaco, Sangeo o lupukila kovaso kuenje o londa vuti umue (ale ukuyu) u kasi vonjila mu pita Yesu. Kilu liuti, eye o mola ovina viosi. Eci Yesu a pitĩla ocipepi, o mola Sangeo kilu liuti yu u sapuila hati: “A Sangeo, loka kuenda yayulako, momo etaili ha sikĩla konjo yove.” (Luka 19:5) Sangeo o loka kuenda o yoloka oco a ka yolele ukombe waye olikasi.

Omanu poku mola eci ca kala oku pita, va fetika oku ñuñuna. Va sima okuti ka ca sungulukile Yesu oku sikĩla konjo yulume una ovo va tenda okuti ukuakandu. Sangeo wa linga ohuasi omo lioku kemba kuenda oku punda olombongo poku tambula elisimu.

Eci Yesu a iñila vonjo ya Sangeo omanu va popia vati: “Eye wa ka sikĩla konjo yulume umue  okuti ukuakandu.” Pole, Yesu o limbuka okuti Sangeo o pondola oku likekembela. Kuenje Yesu ka sumua. Sangeo o talama kuenje o sapuila Yesu hati: “A Ñala onepa yovipako viange ndi vieca kolohukũi, [cosi nda pundile komunu] umue, ndi ci tiula lukuãla.”—Luka 19:7, 8.

Eyi onjila yimue yiwa Sangeo a lekisa okuti wa likekembela lutima wosi! Citava okuti eye o pondola oku linga olokonda lekuatiso liulala wolombongo a soneha, oco a kũlĩhe ciñami a tambula ku va Yudea kuenje o likuminya oku vi tiula ci pitahãla olonjanja vikuãla. Eci ka ci sokisiwa leci ocihandeleko ca Suku ca kisikile. (Etundilo 22:1; Ovisila 6:2-5) Handi vali, Sangeo o likuminya oku tepa pokati ukuasi waye, oco a wece kolohukũi.

Yesu o sanjuka omo Sangeo a lekisa okuti wa likekembela kuenje o popia hati: “Etaili eyovo lieya vonjo yilo, momo eye omõlavo a Avirahama. Momo Mõlomunu weya oku sandiliya loku popela eci ca nyelile.”—Luka 19:9, 10.

Yesu ndopo a mala oku vangula catiamẽla kekalo liava va ‘nyelela’ poku tukula olusapo luomõla wa nyelile. (Luka 15:11-24) Kaliye o tukula ulandu womunu umue wa nyelile ocili kuenje wa sangiwa. Citava okuti asongui vetavo kumue lolondonge viavo, vi lisiõsiõla loku popia lãvi Yesu omo a kapako omanu ndeci Sangeo. Pole, Yesu amamako oku sandiliya loku tumbulula omãla va nyelela va Avirahama.