Ukundi 10:1-20
10 Ndeci olonyi via fa vi lingisa okuti ulela welemba liwa u nyõleha kuenda u lehã lãvi, cimuamue haico okuti, uveke utito u lema vali okuti, olondunge kuenda ulamba vi sule.+
2 Utima wukualondunge u songuila eye muẽle vonjila ya sunguluka,* pole, utima weveke u songuila eye muẽle vonjila ka ya sungulukile.*+
3 Vonjila yosi eveke liendela, olio ka li lekisa olondunge*+ kuenda olio li ecelela okuti, omanu vosi va kũlĩha okuti eveke.+
4 Nda onyeño* yombiali yimue ya ku wengukila, ku ka siepo ocitumãlo cove,+ momo oku likandangiya ku tulumũla akandu anene.+
5 Kuli ocina cimue ci sakalaisa nda mola vemẽhi liekumbi okuti, ekandu limue li lingiwa la vana va kasi kunene:+
6 Aveke va kapiwa polomangu vialua via velapo, pole, olohuasi* viamamako polomangu, vi sule.
7 Ame nda mola apika va kasi oku endela kolokavalu, pole, olombuale vi kasi loku endela posi ndapika.+
8 Una o fẽla ocitunu cimue, o pondola oku kupukilamo;+ kuenda una o teya ocimbaka cimue covawe o pondola oku lumaniwa lonyõha.
9 Una o fẽla ovawe o pondola oku lemẽhiwa lao kuenda una o teya olohũi o likapa eye muẽle kohele.*
10 Nda ocimalẽho cimue cutale ca kuna kuenda omunu umue ka lepika olongenge viaco, eye o ka sukila oku likolisilako calua. Pole, olondunge vi kuatisa oku kuata onima yiwa.
11 Nda onyõha yimue yi lumana osimbu ka ya pokuisiwile, ka ci kuata esilivilo kukuakupokuisa okuti, wa loñoloha.*
12 Olondaka vi tunda vomẽla wukualondunge vi nena ohenda,+ pole, omẽla weveke owo enyõleho liaye.+
13 Eci eye a vangula, olondaka viatete vi tunda vomẽla waye viuveke+ kuenda olondaka via sulako eye a vangula viuyui okuti, vi songuila kenyõleho.
14 Pole, eveke liamamako oku vangula.+
Omunu umue ka kũlĩhĩle eci ci ka pita; helie o pondola oku u lomboluila eci ci ka pita noke yolofa viaye?+
15 Upange walua weveke u kavisa eye muẽle, momo eye ka kũlĩhĩle ndaño muẽle ndomo a sanga onjila yaye yi loña volupale.
16 Cĩvi calua kofeka yimue nda soma yaco umalẽhe+ kuenda olombuale vi fetika oku linga ocipito cavo komẽle!
17 Ya sumũlũha ofeka yina okuti osoma yaco omõla wa vana va kemãla kuenda olombuale vi lia votembo ya sokiyiwa, oco vi kuate vali ongusu okuti, halokukoluako!+
18 Nda omunu umue ukuawesi walua, avaya a kasi kolusoka luaye a kupuka kuenda nda ovaka aye ka a lingi lacimue, ovava a ka iñila vonjo yaye pocakati colusoka.+
19 Ombolo* yi pangiwa oco yi nene esanju kuenda ovinyu yi sanjuisa omuenyo;+ pole, olombongo vi tẽlisa asukila osi.+
20 Ndaño muẽle vovisimĩlo viove* ku ka siñale soma+ kuenda ku ka siñale ohuasi vohondo yove yoku pekela; momo onjila yimue* yi pondola oku ambata ocileñi condaka* yove, ale onjila yimue yitito* yi pondola oku pitulula eci wa popia.
Atosi Pombuelo
^ Lit., “u kasi peka liaye liondio.”
^ Lit., “u kasi peka liaye liepĩli.”
^ Lit., “utima waye wa kamba.”
^ Lit., “espiritu; efuimo.”
^ Ale “va loñoloha.”
^ Ale pamue, “o sukila oku kuata utate lavio.”
^ Lit., “cime celimi.”
^ Ale “Okulia.”
^ Ale pamue, “pula wove.”
^ Lit., “ociluvo cimue ci palãla co kovailu.”
^ Ale “esapulo.”
^ Ale “ociluvo cimue ci kuete avava.”
