Olombanjaile vimue vi kuete esilivilo omo okuti via eciwa lomunu umue o kuete ocikele ca velapo ale omunu umue tua kapako calua. Olombanjaile vikuavo ndaño ka via landiwile lolombongo vialua pole, via kapiwako omo via eciwa lomunu umue o soliwe vepata ale lekamba limue lia koleliwa. Eci oco ca pita lombanjaile Russell a eca ku Jordan, wa tukuiwa vocipama catete. Ombanjaile yaco yi sokisiwa ndati locisembi?

Catete, Embimbiliya li popia hati: “Suku wa tuma Omõlaye wongunga voluali okuti tu kuata omuenyo mekonda liaye.” (1 Yoano 4:9) Olondaka evi vi eca uvangi wokuti, ombanjaile yaco yi kuete esilivilo lia velapo. Kakuli omunu umue o kuete unene wa velapo okuti Suku ci sule. Catiamẽla kombanjaile yaco, ukualosamo wa popia hati: “Onduko yove Yehova, ove, lika wove, Tõlo koluali luosi.” (Osamo 83:18) Ka kuli ono yikuavo tu pondola oku tambula ombanjaile yaco.

Cavali, Suku eye ‘Isietu.’ (Isaya 63:16) Ndamupi? Eye wa tu ĩha omuenyo. Handi vali, wa siata oku tu tata nda isia umue o tata omãla vaye locisola. Eci a sapela lafendeli vaye kosimbu ndeci Efarimi, Suku wa pula hati: “Efarimi hẽ, hamõlangeko wa soliwa? . . . Oco utima wange wu kuetele ongeva, kuenje ndu linga ohenda.” (Yeremiya 31:20) Suku o kuete ovisimĩlo vimuamue viatiamẽla kafendeli vaye koloneke vilo. Eye Ululiki wetu ukuonene wosi, kuenda Isietu ukuahenda haye Ekamba lietu. Olondaka evi ka vi tu vetiya  hẽ oku tenda ombanjaile yi tunda kokuaye ndocina cimue ci kuete esilivilo?

Olombanjaile vimue vi kuete esilivilo momo ka via eciwile omo lioku kisikiwa, pole via eciwa locisola cocili. Omunu eca lutima wosi ka lavoka oku u tiuwila cimue omo liocali a linga.

Suku wa tu ĩha omõlaye omo liocisola a tu kuetele. Embimbiliya li popia hati: “Ocisola ca Suku ca situluiwa ndoco kokuetu okuti, Suku wa tuma Omõlaye wongunga.” Locimãho ci pi? Locimãho cokuti, “tu kuata omuenyo mekonda liaye.” (1 Yoano 4:9) Anga hẽ Suku wa kisikiwa oku ci linga? Sio! “Ocisembi ca eciwa la Kristu Yesu,” ocindekaise ‘cohenda ya piãla’ ya Suku.—Va Roma 3:24.

Momo lie ombanjaile ya eciwa la Suku yi lombolokela “ohenda ya piãla?” Embimbiliya li popia hati: “Puãi Suku wa tu muisa ocisola caye okuti, osimbu tua kala vakuakandu oco Kristu a tu fila.” (Va Roma 5:8) Ocisola cocili ca Suku ci lekisiwa oco ci kuatise ava va hongua, vana ka va kuete u o va teyuila kuenda vakuakandu. Etu ka tu kuete ocisola caco kuenda ka tu pondola oku yi tiuwila. Ombanjaile yaco, oyo ocindekaise ca velapo coku lekisa ocisola voluali.

Olombanjaile vimue vi kuete esilivilo momo ocindekaise cokuti omunu wa yeca wa likolisilako calua. Eci omunu umue a kuata ocina cimue ci kuete esilivilo kuenje o tu ci ĩha, tu ci tenda ndombanjaile yimue ya velapo omo liocilumba.

Suku “wa eca Omõlaye wongunga.” (Yoano 3:16) Eye nda ka tu ĩhile omunu umue wa velapo kokuaye. Vokuenda kuotembo Suku a lulika oluali, Yesu wa talavaya kumue laye kuenda wo ‘sanjukilile.’ (Olosapo 8:30) Yesu eye ‘omõla wa soliwa’ wa Suku kuenda “esetahãlo lia Suku una ka muiwa lovaso.” (Va Kolosai 1:13-15) Lalimue eteke kua kaile ukamba umue wa soka ndowu pokati komanu vavali.

Pole, Suku “ka likalele oku eca Omõlaye.” (Va Roma 8:32) Yehova wa eca kokuetu ocina ca velapo a kuata. Ocisembi oco ombanjaile ya velapo Suku a eca.

Olombanjaile vimue via velapo momo vi yimula esukila limue velivala limue ku sukiliwa ekuatiso. Ocili okuti, ove nda wa eca olopandu omo liomunu umue wa lieca olumue oco a popele omuenyo wove vosipitali poku feta olombongo vimue okuti nda kua tẽlele oku vi feta! Ku tava hẽ okuti nda ya linga ombanjaile yimue yi komõhisa?

“Momo, ndeci vosi va fila ku Adama, haico vosi va muila omuenyo vu Kristu.” (1 Va Korindo 15:22) Omo okuti tucitumbulukila ca Adama, vosi yetu tu ‘fa,’ ka tu tẽla oku puluka kovoveyi, kolofa ale oku linalisa la Suku oco ka tu ka kuate eko kovaso aye. Omo liaco, ka tu tẽla oku li yovola etu muẽle, ale oku yovola ‘omunu’ ukuavo. Embimbiliya li popia hati: “Lomue omunu o tẽla oku liyovola, ndaño oku iha Suku ocisembi . . . lalimue eteke [ci] li soka.” (Osamo 49:7, 8) Tu sukila lonjanga ekuatiso omo ka tu tẽla oku feta ondando yocisembi. Nda tua kaile lika lietu, nda ka tu kuete elavoko.

Yehova omo liocisola caye ca piãla, wa feta ovihemba “tu sukila” okuti, lekuatiso lia Yesu ‘vosi tu kuata omuenyo ko pui.’ Ci tẽlisiwa ndati locisembi? “Osonde ya Yesu Omõlaye yi yelisa akandu etu osi.” Oku kolela kosonde ya Yesu ceca epuluvi lioku tambula ongecelo yakandu kuenda oku kuata omuenyo  ko pui. (1 Yoano 1:7; 5:13) Nye ocisembi ci ka lingila vangandietu tu sole okuti, va fa? “Momo ndeci oku fa kueya omo liomunu umosi, epinduko liava va fa, lieyavo omo liomunu umosi, [Yesu.]”—1 Va Korindo 15:21. *

Kakuli ombanjaile layimue ya tunda kono ya velapo ale ya vetiyiwa locisola cocili okuti ocilumba ca Yesu ci sule. Pokati komanu vosi, lomue wa tu lingila ocina ca velapo ndeci Yehova Suku. Layimue ombanjaile yikuavo ya imula esukila limue linene ndeci ocisembi ca tu yovola kekandu kuenda kolofa. Ocili okuti, kakuli ombanjaile layimue yi li kuata locisembi.