Yehova wa eca ombanjaile yimue ka yi sokisiwa komanu, okuti uloño woku sapela laye kuenda oku situlula ovisimĩlo vietu kokuaye pocakati cohutililo. Uprofeto Daviti wa likutilila hati: “Ove, okuakuyeva ohutililo, kokuove ku kokela omanu vosi.” (Osamo 65:2) Pole, tu pondola oku likutilila ndati oco tu yeviwe kuenda oku sumuluisiwa la Suku?

Olohutililo o linga vi ku ecelela oku ‘Pesela utima wove ku [Suku]’ poku situlula ovisimĩlo viove viocili. (Osamo 62:8) Ukuonene Wosi o sanjukila olohutililo vi lingiwa lutima wosi.

Ndaño okuti Suku o kuete olonduko vilua viesumbilo, eye o kuete lika onduko yimosi. Eye hati, “Ame Yehova, oyo onduko yange.” (Isaya 42:8) Onduko Yehova yi molẽha Vovisonehua vi Kola ci soka 7.000 kolonjanja. Ovaprofeto valua va tukula Suku konduko. Avirahama hati: ‘A Yehova . . . ngecelele oku amamako oku popia love.’ (Efetikilo 18:30) Tu sukila oku tukula onduko ya Suku, Yehova, eci tu likutilila.

Suku wa kũlĩha ovisimĩlo vietu kuenda ovina tu yevite ndaño tu vangula elimi lia litepa. Ondaka yaye yi tu likuminya hati: “Suku hokuacameko, pole, volofeka viosi omunu una u sumbila loku linga ovina via sunguluka, o taviwa laye.”—Ovilinga 10:34, 35.

Pole, oco tu sumũlũisiwe la Suku, ka tu sukila lika oku likutilila. Vocipama ci kuãimo tu ka konomuisa eci tu sukila oku linga.