ONUMBI YEMBIMBILIYA: “Ko ka sakalali lomuenyo wene.”—Mateo 6:25.

Olondaka evi vi lomboloka nye? Yesu wa tukula olondaka evi Vohundo yaye a lingila Komunda. Ondisionaliu yimue Yembimbiliya yi lombolola okuti, ondaka “oku sakalala,” yi lomboloka “ocituwa omunu a lekisa poku liyaka luhukũi, onjala, kuenda ovitangi vikuavo vieteke leteke.” Voku sakalala, olonjanja vimue mua kongela oku sokolola ovina vi ka pita kovaso yoloneke. Ca sunguluka oku sakalala lovina tu sukila, kuenda oku kapako ekalo liomanu vana tu kuetele ocisola. (Va Filipoi 2:20) Pole, olondaka via Yesu viokuti “ko ka sakalali,” wa vi tukula oco a lungule olondonge viaye okuti, ka vi sukila oku sakalala lovina vi keya eteke likuavo. Momo, vi pondola oku tepulula esanju komuenyo wavo.​—Mateo 6:31, 34.

Anga hẽ elungulo liaco li kuete esilivilo koloneke vilo? Nda tua kapako elungulo lia Yesu, tu kuata olondunge. Momo lie? Momo, alivulu amue a lombolola okuti, nda omunu o sakalala calua utima waye u sakalavo, kuenje cu kokela ovovei amue ndeci, apute vomela, uvei wutima, kuenda esuka.”

Yesu wa lekisa esunga lieci tu sukilila oku yuvula oku sakalala, momo ka ku kuete esilivilo. Eye wa pula hati: “Helie pokati kene okuti omo lioku sakalala o tẽla oku vokiya ekukutu limosi komuenyo waye?” (Mateo 6:27) Oku tiamisila utima kasakalalo etu, ka ci vokiya omuenyo wetu vekukutu limosi, ale oku kuata ekalo liwa. Olonjanja vimue ovina ka vi kala ndomo tu yongola. Ulume umue onoño wa popia hati: “Oku salala lovina vi keya kovaso yoloneke, ka ci kuete esilivilo. Usumba tu kuetele ovina vi keya kovaso yoloneke, u pondola oku tu kokela ovitangi. Momo, pamue ovina viaco ka vi kala ndomo tua sima.”

Tu pondola oku yuvula ndati asakalalo? Catete, kolela ku Suku. Nda Suku wa siata oku eca okulia kolonjila, kuenda o walisa olonelẽho vio vusenge oco vi posoke, omanu vana va pitisa kovaso efendelo liaye ka eci hẽ kokuavo ovina va sukila komuenyo wavo? (Mateo 6:25, 26, 28-30) Cavali, kapako lika ovina o sukila veteke limosi. Yesu wa popia hati: “Ko ka sakalali leteke likuavo, momo eteke liya li kuete esakalalo liayo.” Ove hẽ ku tava okuti “eteke leteke li kuete ohali yalio”?—Mateo 6:34.

Nda tua kapako elungulo lia Yesu tu yuvula ovitangi vi kapa ekalo lietu kohele. Nda tua ci linga, tu kuata ombembua yo vutima yina Embimbiliya li tukula hati: “Ombembua ya Suku.”—Va Filipoi 4:6, 7.