Ove hẽ wa tanga lutate ovolandu Utala Wondavululi wunyamo ulo? Omo liaco, likolisilako oku tambulula apulilo akuaimo ndeci:

Ongangu yipi Yehova a eca konjila ndomo akãi va sukila oku tatiwa?

Eye ka va tati locame kuenda eye ka kapeleko lika alume okuti akãi ci sule. Yehova o va yevelela, o sakalala lekalo liavo ndomo va liyevite kuenda ovitangi va kasi oku liyaka lavio. Yehova o kolela okuti ovo va pondola oku tẽlisa ocikele cosi va tambula.—w24.01, kem. 15-16.

Tu kapako ndati ukanda ku Va Efeso 5:7 ku popia hati: “Ko ka kuati ukamba lavo?”

Upostolo Paulu wa kala oku tu vetiya oco ka tu ka livale ukamba lomanu vana va tu vetiya oku sinĩla olonumbi via Yehova. Eci ci kapiwako poku pita otembo lomanu polo la polo, kuenda pocakati co Internet.—w24.03, kem. 22-23.

Kasapulo api esanda tu sukila oku li teyuila?

Tu sukila oku yuvula asapulo a tumisiwa la vamanji ale lakamba okuti ka a kũlĩhĩsiwile, asapulo ana a tumiwa lomanu vana ka tua kũlĩhĩle kuenda ana a tunda kolonanguluke va likembisa okuti va kapako ocili Cembimbiliya.—w24.04, kem. 12.

Nye tua kũlĩha kuenda nye ka tua kũlĩhĩle ndomo Yehova a ka sombisa Soma Salomone lomanu va fa ko Sodoma lo Gomora kuenda Ketande?

Ka tua kũlĩhĩle lonjila ya suapo nda Yehova wa pisila omanu vaco kekundu ka li pui. Pole, tu cĩ okuti, eye wa kũlĩha ovovangi osi kuenda ukuahenda yalua.—w24.05, kem. 3-4.

Ekolelo lipi tu pondola oku kuata omo lia Suku oku sokisiwa lo “Handa?” (Esin. 32:4)

Tu pondola oku sanda ocitililo ku Yehova. Eye wa koleliwa kuenda ololonjanja viosi o tẽlisa olohuminyo viaye. Ekalo liaye kuenda ocipango caye lalimue eteke ci pongoloka.—w24.06, kem. 26-28.

Nye ci pondola oku tu kuatisa oku likisa vekongelo liokaliye?

Kolela okuti Yehova o ka ku kuatisa ndeci a kuatisa afendeli vaye kosimbu. Yuvula oku sokisa ekongelo liokaliye leli liosimbu. Tiamisila utima kovopange ekongelo kuenda likolisilako oku linga akamba vokaliye.—w24.07, kem. 26-28.

Ovina vipi tu lilongisila kalusapo atatu a sangiwa ku Mateo ocipama 25?

Olusapo luolomeme kuenda luolohombo lu lekisa esilivilo lioku kala ukuekolelo kuenda ukuacili. Olusapo luafeko vosombo kuenda luaveke lu situlula okuti, tu sukila oku lipongiya loku lavulula. Olusapo luolotalendo u lekisa esilivilo lioku likolisilako oku talavaya kuenda oku linga eci ca velapo.—w24.09, kem. 20-24.

Upi wa Kala Oku Lepa Kuocindumba Conembele ya Salomone?

Kelivulu lia 2 Asapulo 3:4, oviña vimue viosimbu, vi lombolola okuti “120 kovikeya”, ale 53 kolometulu koku lepa. Pole, ovinimbu vikuavo via koleliwa vi popia okuti, “20 kovikeya,” ale 9 kolometulu koku lepa, ci molẽha okuti ci likuata ciwa lupamo wovimano vionembele.—w24.10, kem. 31.

Nye ci lomboloka onuatisi yimue yekongelo oku kala ‘ulume wukãi umosi?’ (1 Tim. 3:12)

Ci lomboloka okuti, eye o kuele lika ukãi umosi kuenda oku yuvula oku linga evĩho liukahonga. Handi vali, eye ka ka lekise onjongole yoku kuela ukãi umue wiñi.—w24.11, kem. 19.

Momo lie tu popela okuti elivulu lia Yoano 6:53 ka lia tumbikile ocihandeleko cimue catiamẽla Kondalelo ya Ñala?

Elivulu lia Yoano 6:53 li lombolola esukila liokulia etimba lia Yesu kuenda oku nyua osonde yaye. Yesu wa vangula olondaka viaco kunyamo wa 32 K.K. ko Galilea ku va Yudea vana ka va kuatele ekolelo kokuaye. Pole, Ondalelo ya Ñala ya tumbikiwa noke yoku pita unyamo umosi ko Yerusalãi. Vepuluvi liaco Yesu wa vangula la vana va ka kala laye kilu.—w24.12, kem. 10-11.