YOMARA kumue la mume waye Marcelo kuenda Hiver va kasi vimbo limue litito ko Guatemala. Yomara wa fetika oku lilongisa Embimbiliya Lolombangi Via Yehova noke mume waye wa fetikavo oku lilongisa. Pole, kua kala ocitangi cimue. Katatu kavo va kala olomeke kuenda ovo ka va tẽlele oku tanga obraile. Kuenje ulongisi wavo Wembimbiliya, wa sukilile oku va tangelako ovinimbu viocipama celilongiso kuenda ovinimbu Viembimbiliya.

Oku endaenda kolohongele ca kalavo ocitangi kokuavo. Lika liavo, ka va ponduile oku linga ungende usoka 40 kakukutu woku enda Konjango Yusoma. Pole, vamanji va linga esokiyo lioku va kuatisa oco va kale kolohongele viosi. Handi vali, eci va enda oku tambula olonepa violondonge kohongele yovokati kosemana, vamanji va enda oku va kuatisa oku patekela olonepa viavo.

Kosãi ya Kupemba 2019, olohongele viekongelo via fetika oku lingiwa vimbo liavo. Momo, ohueli yimue yakundi votembo yosi, ya ilukila vimbo liaco. Ohueli yaco ndaño okuti ka ya tẽlele oku tanga loku soneha obraile, ovo va yonguile oku longisa olondonge viaco olomeke oku ci linga. Kuenje ovo va sukilile oku sanga onjo yimue yalivulu kuenda oku kuata alivulu atiamẽla kobraile, oco va kũlĩhe ndomo va pondola oku longisa olomeke.

Vokuenda kuolosãi vitito, olondonge vitatu okuti olomeke ca lelukile kokuavo oku tanga obraile kuenda eci ca va kuatisa oku pamisa vali ukamba vakuatela Yehova. a Cilo, Yomara, Marcelo kuenda Hiver va kasi oku talavaya ndakundi votembo yosi. Marcelo o talavaya ndoñuatisi yekongelo. Olosemana viosi ovo va siata oku linga ovopange Wusoma. Omo liombili va kuete yoku vumba Yehova, ci kasivo oku vetiya vamanji vakuavo oku kuata ombili yimuamue.

Vamanji vatatu okuti olomeke, va pandula calua omo liekuatiso liwa ekongelo lia eca kokuavo. Yomara wa popia hati: “Eci Olombangi Via Yehova via sapela letu onjanja yatete, va tu lekisa ocisola Cakristão.” Marcelo wamisako hati: “Tu kuete akamba vawa vekongelo tu kasi kuenda tu kuete epata limue lilikuete omunga kocisola.” Yomara kuenda mume waye Marcelo va kasi oku lavoka eteke va ka mola ongongo oku pongoloka ocumbo celau.—Osa. 37:10, 11; Isa. 35:5.