Ulandu Womuenyo
Tua Sanga “Omota Yimue Yondongo ya Tĩla Calua”
WINSTON kuenda Pamela (Pam) Payne va kasi oku talavaya ko betele yo Australásia. Ovo va kuete omuenyo umue wesanju, pole, va kuetevo ovitangi. Vovitangi viaco mua kongela a pongoloko va sukilile oku linga oco va like lomanu vakuekova likuavo kuenda oku liyaka lesumuo omo lioku fisa oñaña. Ndaño lovitangi viaco, va amamako oku sola Yehova kuenda afendeli vaye, loku kuata esanju kupange woku kunda. Tua va pulisa oco va tu lomboluileko amue pokati kovolandu avo.
A Winston, tu lomboluileko ndomo wa kũlĩha Suku.
Ame nda kulila vocifuka co Queensland vofeka yo Australia ocipãla lolupale. Vepata liange lomue wa kala ukuetavo. Omo okuti, tua kala ocipãla, ca tĩlile oku li sanga lepata. Eci nda kuata 12 kanyamo nda fetika oku sanda Suku. Ndanda oku likutilila loku pinga oco ndi kũlĩhe ocili catiamẽla kokuaye. Noke nda siapo onjo yetu kuenda nda sanga upange kolupale luo Adelaide, Kombuelo yo Australia. Eci nda tẽlisa 21 kanyamo, nda kũlĩha Pam osimbu nda kala kepuyuko ko Sydney kuenda eye wa ndi sapuila eci catiamẽla kocimunga cimue cetavo ci tukuiwa hati, Bretanya-Isareli ovo va popia okuti va Bretanya ocikoti ca va Isareli. Ovo va litukulavo okuti apata ekũi, ana a pangele onepa Kosoma ya vialele konano yofeka yambatiwile kumandekua kocita ecelala O.Y.K. Eci nda tiukila ko Adelaide, nda sapuilako ekamba liange liokupange ovina nda pita lavio, eye wa kala ale oku lilongisa Embimbiliya Lolombangi Via Yehova. Noke lioku u lomboluilako ovina viaco votembo yimue, tua sapelavo eci catiamẽla kalongiso Olombangi Via Yehova kuenda nda limbuka okuti ohutililo nda lingile eci nda kala umalẽhe, ya tambuluiwa. Nda lilongisa eci catiamẽla Kululiki wange kuenda Kusoma waye! Nda sanga “omota yimue yondongo ya tĩla calua.”—Mat. 13:45, 46.
A Pam, ove wa fetikavo oku sanda omota eyi yondongo eci wa kala umalẽhe calua. Wa yi sanga ndati?
Nda kulila vepata limue okuti va kala vakuetavo, volupale luo Coffs Harbour ko Nova Gales do Sul. Olonjali viange kuenda olosekulu viange va tava kalongiso a va Bretanya-Isareli. Ame, lamanjange umalẽhe kuenda huvange ukãi oku kongelamo vapalume vange, tua kula locisimĩlo cokuti Suku o sumũlũisa lika omanu vakuacikoti co Bretanya. Pole, ame sia tavaile kovina viaco kuenda nda liyeva okuti ndi kasi ocipãla la Suku. Eci nda tẽlisa 14 kanyamo, ndandaile kolonembele vialua, ndeci, o Anglikana, o Batista kuenda Ondevedista Vakuesambata. Pole, olonembele viaco ka via ndi kuatisile oku kũlĩha Suku.
Epata liange noke lia ilukila ko Sydney, kuna nda kũlĩha Winston. Ndomo eye a ci popia, oku vangula ovina viatiamẽla ketavo via tu vetiya oku lilongisa Embimbiliya Lolombangi Via Yehova. Noke, ovikanda viosi Winston a numasaile via enda oku yuka lika lovisonehua! Kefetikilo ca enda oku ndi sakalaisa kuenda ndanda oku tema. Pole, vokuenda kuotembo nda limbuka okuti ovina a enda oku soneha, ocili catiamẽla ku Suku.
Kunyamo wo 1962, nda ilukila ko Adelaide oco ñale ocipepi la Winston. Eye wa ndi sapuilile okuti ndi sikĩla konjo ya Thomas Janice Sloman, ohueli yimue okuti Olombangi Via Yehova va kala kupange wumisionaliu ko Papua Nova Guiné. Ovo va lekisa ocisola calua kokuange. Kotembo yaco nda kuata 18 kanyamo kuenda va ñuatisa calua konepa yespiritu. Noke nda fetikavo oku lilongisa Embimbiliya kuenje vokatembo katito nda limbuka okuti nda sanga ocili. Kuenje ame la Winston tua likuela noke kavali ketu tua litumbika kupange wa Yehova, ndaño lovitangi ca tu kuatisa oku sanjukila omota yondongo tua sanga.
A Winston, tu sapuileko otembo wa fetika oku vumba Yehova.
A. O mapa yi lekisa ovongende etu kupange woku nyula akongelo
B. Alitalatu a lekisa ovifuka vimue. O Kiribati kuenda o Tuvalu tete via kũlĩhĩwile okuti ovifuka Gilbert kuenda Ellice
C. Ocifuka cimue ca posoka ko Funafuti ko Tuvalu. Cimue pokati kovifuka via nyuliwa lolomisionaliu vimue kosimbu
Noke lioku likuela la Pam, Yehova wa tu yuluila “epuluvi linene” oco tu linge upange walua. (1 Va Kor. 16:9) Epuluvi liatete tua kuata oco tu linge upange, ceci Manji Jack Porter a nyula ekongelo litito tua kala. (Cilo eye o panga onepa Kocisoko cakulu vo ko Betele yo ko Australasia.) Manji Jack kumue lukãi waye Roslyn va tu vetiya oku litumbika kupange wakundi votembo yosi, tua kuata esumũlũho lioku linga upange waco vokuenda kuanyamo atãlo. Eci nda kuata 29 kanyamo, ame la Pam tua lalekiwa oku nyula akongelo kovifuka kombuelo yo Pacífico, okuti yi songuiwa lofiliale yo Fiji. Ovifuka viaco vievi: Amerikana Samoa, Samoa, Kiribati, Nauru, Niue, Tokelau, Tonga, Tuvalu kuenda Vanuatu.
Kotembo yaco, omanu kovifuka vimue ka va solaile Olombangi Via Yehova kuenje tua sukilile oku lunguka kuenda oku kuata utate. (Mat. 10:16) Akongelo a kala atito kuenda vamue ka va kuatele ocitumãlo coku lala. Noke tua sandiliya ocitumãlo vimbo limue kuenda omanu vaco va tu tata ciwa.
A Winston, ove o sole upange woku pongolola alivulu. Nye ca ku vetiya oku kuata onjongole yaco?
Ko Samoa, oku songola osikola yakulu vekongelo
Kotembo yaco, vamanji kocifuka co Tonga va kuatele lika otuikanda kuenda otualivulu kelimi lio Tonga okuti elimi limue lio ko polinésia. Kupange woku kunda, poku songola elilongiso Liembimbiliya, va enda oku kuama elivulu A Verdade Que Conduz à Vida Eterna kongelesi. Vokuenda kuolosemana vikuãla kosikola yakulu, akulu vatatu vekongelo okuti ka va tẽla ongelesi va tava oku pongolola elivulu A Verdade kelimi lio Tonga. Pam wa enda oku soneha olokopia noke tu vi tuma kofiliale yo ko Estados Unidos, oco vi pangiwe alivulu. Upange waco oco u tẽlisiwe wambata eci ci soka ecelãla kolosemana. Ndaño okuti upopi waco ka wa lelukile, alivulu aco a kuatisa omanu valua va vangula o Tonga oku lilongisa ocili. Pam lame ka tua pangele onepa kupange woku pongolola alivulu, pole, poku mola upange waco ca tu sanjuisa calua.
A Pam, ekalo liomuenyo kovifuka li kasi ndati oku lisokisa leli lio ko Australia?
Yimue pokati kolonjo tua enda oku sikĩla eci tua nyula akongelo
Ekalo lia litepele calua! Kovitumãlo vimue, kua kala olohamue, ohuya, ombambi, olomuku, ovovei kuenda okulia kua kala kutito. Pole, kesulilo lieteke leteke, tu kuata esanju lialua poku luluvalela kokalunga oku upisa konjo yetu yoviti ya yambeliwa lowangu yi tukuiwa fale kelimi lio Samoa ko Polinésia. Olonjanja vimue kuteke osãi yi tua ciwa kuenje cecelela oku mola oviti viondende. Ovina viaco via tu kuatisa oku sokolola kovina via sunguluka okuti kovina vĩvi hakoko.
Tua solaile calua omãla, ovo va enda oku komõha poku tu mola etu tuvindele vofeka yavo. Osimbu tua kala oku nyula olupale luo Niue, kakuenje umue wa kuata kokuokuo kua Winston loku popia hati: “Ame ndi sole oluvi wokuokuo kuove.” Kakuenje kaco ka la mola laumue o kuete oluvi luaco kuenje ka kũlĩhĩle ndomo a ci tukula!
Tua sumuile calua poku mola omanu olohukũi kuenda ekalo liavo liomuenyo. Ovo va kuatele ocitumãlo ca posoka, pole, ka va kuatele uhayele uwa kuenda ovava ka a tatiwile ciwa. Ndaño lovitangi viaco, vamanji ka va lekisile esakalalo. Ovo ka va kapeleko ekalo liaco. Va sanjukilile oku kala lepata liavo kuenda oku kuata ocitumãlo coku fendela Yehova. Ongangu yavo ya tu kuatisa oku pitisa kovaso upange tua kala oku linga loku leluisa omuenyo wetu.
A Pam, olonjanja vimue ove wa sukilile oku tapa ovava kuenda oku teleka. Wa tẽla oku ci linga ndati?
Ko Tonga, Pam o kasi oku sukula uwalo wetu
Ame mandula isiange wa ndi pindisa. Eye wa ndongisa ovina vialua ndeci, oku teleka eci ci kasipo kuenda oku sanjuikila eci omunu a kuete. Poku nyula o Kiribati, tua kala vokanjo kamue katito koviti ka yambeliwa lowangu. Oco ndi teleke cimue, poku siakãla nda sukilile oku fẽla posi loku kapapo ovipeta violonendo oco vi kale olohũi. Nda enda oku tapa ovava pocisimo lakãi vovimbo. Oco va tape ovava, ca sukilile ociyenjo. Omo ocisimo caco citito, omunu lomunu wa kuata onjanja yaye yoku tapa. Eci ociyenjo ciyuka ci nãliwa. Ame nda simĩle okuti ca leluka oku ci linga, pole, eci onjanja yange ya pitĩlapo nda limbuka okuti, hacoko. Olonjanja viosi njimba ociyenjo ci telela lika kilu liovava! Eci vosi va liwekapo oku yola, ukãi umue weya oku nũatisako. Ovo olonjanja viosi va likapeleleko oku ñuatisa.
Kavali kene wa soli upange wa lingi vovifuka. O pondola hẽ oku tu sapuilako amue pokati kovolandu awa wa kuati?
Winston: Ca tĩlile kokuetu oku kuata elomboloko liovituwa vimue. Ndeci, eci vamanji va pongiya okulia kumue, ovo va tu ĩha okulia kuaco kuosi. Kefetikilo, ka tua kũlĩhĩle nda tu va silapo kamue ale ndati. Omo liaco, tua lia muẽle cosi va tu kapela! Kuenje eci tua kuata elomboloko liekalo liavo tua fetika oku va silapo okulia. Ndaño lovina tua enda oku linga, vamanji ka va tu temẽlele. Ovo va kuata esanju lialua poku tu mola vali noke liolosãi epandu eci tu nyula ekongelo liavo. Vimbo liaco, ka va la mola ombangi yimue ya Yehova yo kofeka yikuavo.
Kocifuka co Niue, la vamanji vakuavo va kasi oku enda kupange woku kunda
Upange wetu woku nyula akongelo wa ecavo uvangi uwa vimbo. Omanu vimbo liaco, va simĩle okuti vamanji ovo va sovola etavo liaco. Eci Winston la Pam, va nyula vamanji vimbo liaco, omanu vakuavo vimbo va limbuka okuti eli etavo liocili.
Pam: Ungende nda sola calua wo kocifuka co Kiribati, kuna kua kala lika vamanji vatito. Kua kala lika ukulu umosi wekongelo o tukuiwa Itinikai Matera, eye wa linga cosi citava oco a tu kuatise. Eteke limue, weya wa nena ekualu mua endela lika esala limosi. Kuenje wa popia hati: “Esala eli liene.” Ca tĩlile calua oku sanga asala votembo tua linga epasu. Ya kala ombanjaile yimue yitito, pole, ya vetiya utima wetu.
A Pam, noke yanyamo amue ove wa fisa oñaña. Nye ca ku kuatisa oku yula esumuo liaco?
Kunyamo wo 1973, nda mina eci ame kumue la Winston tua kala Kombuelo yo Pacifico. Etu tua nõlapo oku tiukila ko Australia, kuna okuti noke yolosãi vikuãla tua fisa oñaña yetu. Winston wa sumuile calua omo lioku fisa. Vokuenda kuotembo evalo liange lia tepuluka, pole, ka lia imuhĩle toke eci tua tambula Utala Wondavululi 15 ya Kupupu wo 2009. “Apulilo a Lingiwa la Vakuakutanga,” losapi hati: “Anga hẽ kuli elavoko liokuti oñaña ya fila vimo lia ina yaye yika pinduiwa?” Ocipama caco, ca lekisa okuti Yehova eye o nõla eci a linga kuenda olonjanja viosi o linga eci ciwa. Eye o ka malako ovina viosi vi koka evalo voluali lulo kuenje locisola eye wa nõla Omõlaye oco a ‘nyõle ovilinga via Satana.’ (1 Yoa. 3:8) Ocipama caco, ca tu kuatisavo oku sola calua “omota yondongo” tu kuete omo lioku kala afendeli va Yehova! Nda tua kala ndati nda ka tua kuatele elavoko Liusoma?
Noke lioku fisa oñaña yetu, tua litumbika vali kupange wotembo yosi. Tua talavaya oloneke vimue ko Betele yo ko Australia kuenje tua lalekiwa vali kupange woku nyula akongelo. Kunyamo wo 1981, noke lioku pita anyamo akuãla kolupale lumue lutito ko Nova Gales do Sul kuenda ko Sydney, tua tumiwa ko Betele yo ko Australia, oko tu kasi toke cilo.
A Winston, ovongende wa linga kovifuka vio kombuelo yo Pacifico a ku kuatisa ndati kupange wove ndukulu wo ko Betele ko Australasia?
Ca ñuatisa volonjila vialua. Catete, ko Australia nda nõliwa oco ndi songuile alimi o Samoa Americana kuenda o Samoa a kala oku pongoluiwa. Noke o Betele yo Nova Zelândia ya kongeliwa leyi yo ko Australia. Cilo, ocikanjo co Betele ko Australasia mua kongela o Austrália, o Samoa Americana kuenda o Samoa, ovifuka Cook, o Nova Zelândia, o Niue, o Timor-Leste, o Tokelau kuenda o Tonga, kuna nda kuata esumũlũho lioku kala onumiwa yo filiale. Oku talavaya la vamanji vakuekolelo kovifuka viaco, ca nuatisa calua okuti cilo tu kasi oku talavayela kumosi ko Betele.
Winston la Pam ko Betele yo Australasia
Ndi popia siti, upange tua linga la Pam, tua limbuka okuti akulukoño va sandiliya Suku. Amalẽhe va yongolavo ‘omota eyi yondongo ya tĩla calua’ ndaño okuti vamue vepata ka va lekisa onjongole. (2 Olos. 5:2, 3; 2 Asa. 34:1-3) Ocili okuti, Yehova o Suku yimue yocisola kuenda o yongola okuti vosi, cikale amalẽhe kuenda akulu va kuata omuenyo ko pui!
Ame la Pam, tunde eci tua fetika oku sanda Suku pa pita ale, 50 kanyamo ka tua kũlĩhĩle okuti tua laikele oku kuata asumũlũho a-a. Ocili Cusoma, ci sokisiwa muẽle lomota yondongo ya tĩla calua! Omo liaco, tua nõlapo oku tata ciwa omota yaco ya tĩla calua lutima wosi!
