1, 2. Omanu valua va tenda ndati upange wavo?

OMANU valua va sima okuti ka va kuete esilivilo ale ovopange va siata oku linga ka a kuetevo esilivilo. Kolofeka vimue, eci o yongola oku kũlĩha omunu umue ca sunguluka oku pula komunu waco ndoco: “Upange upi wa siata oku linga?”

² Olojanja vimue Embimbiliya li lombolola ovopange amue omanu va enda oku linga. Olio li tukula “Mateo ukuakutambula elisimu,” “Simono uyaveki,” kuenda “Luka ndotolo o soliwe.” (Mateo 10:3; Ovilinga 10:6; Va Kolosai 4:14) Olonjanja vikuavo, Embimbiliya li lombolola ovikele omanu va kuatele kupange wa Yehova. Sokolola eci catiamẽla ku Soma Daviti, ku profeto Eliya kuenda ku postolo Paulu. Alume vaco va velisilepo ovikele Yehova a ecele kokuavo. Cimuamue haico okuti, tu sukilavo oku velisapo ocikele tu kuete coku linga upange wa Yehova.

3. Momo lie akulu va sukilila oku pindisa amalẽhe? (Tala elitalatu kefetikilo liocipama.)

³ Tu sole oku fendela Yehova kuenda tua sanjukila ovikele  vietu. Valua pokati ketu tua sanjukila upange wetu kuenda tu yongola oku amamako oku likolisilako oku linga upange waco. Pole, ci sumuisa calua eci omunu a kuka, momo ka kuete vali epondolo liuku linga ovopange amue a enda oku linga eci a kala umalẽhe. (Ukundi 1:4) Ovina viaco, via siata oku nena ovitangi kafendeli va Yehova. Koloneke vilo, upange woku kunda u kasi oku amamako oku livokiya kuenda ocisoko ca Yehova ca siata oku talavaya lovoloño okaliye oco cecelele oku kundila olondaka viwa komanu vosi. Pole, olonjanja vimue ci tava okuti, ka ci leluka kakulu oku lilongisa ovoloño aco okaliye. (Luka 5:39) Handi vali, citava okuti ongusu yavo yi tepuluka osimbu va amamako oku kuka. (Olosapo 20:29) Omo liaco, ci kuete esilivilo lia velapo vana va kuka oku pindisa amalẽhe oco va tambule ovikele vikuavo vocisoko ca Yehova.—Tanga Osamo 71:18.

4. Momo lie komanu vamue va kuete omoko yoku songola ka ca lelukile oku eca ovikele? (Tala pokakasia losapi hati: “ Esunga Lieci ka ca Lelukile Oku Eca Ovikele.”)

⁴ Ocili okuti, olonjanja vimue ka ca lelukile komanu vana va kuete omoko yoku songola oku eca ovikele kamalẽhe alume. Ovina viaco vi pondola oku nena esumuo ku vamanji vaco eci va pumba ovikele va solele calua. Eci ci pondola oku va nenela esumuo oku siapo upange ulikasi va solele oku linga. Ale pamue va sima okuti, nda ovo ka va lingile upange waco, ka u ka lingiwa ciwa. Handi vali, va simavo okuti ka va kuete otembo yoku pindisa omanu vakuavo. Olonjanja vimue amalẽhe alume va sukila oku lekisa epandi eci ka va kasi oku tambula ovikele vikuavo.

5. Apulilo api tu konomuisa vocipama cilo?

⁵ Momo lie ci kuetele esilivilo lia velapo vana va oku kuatisa amalẽhe oku tambula ovikele vikuavo? Va pondola oku ci linga ndati? (2 Timoteo 2:2) Momo lie amalẽhe va sukilila oku kuata ovituwa via sunguluka eci va kasi oku lingila kumosi upange lakulu vana va loñoloha poku lilongisila kokuavo? Tu konomuisi ndomo Soma Daviti a pindisa omõleye kupange wa kuatele esilivilo lia velapo.

6. Nye Soma Daviti a yonguile oku linga? Nye Yehova o sapuila?

⁶ Vokuenda kuanyamo, Daviti wa lambalaliwile calua kuenda wa sukilile oku ilukila kovitumãlo vialua. Eci a tumbikiwa komangu yusoma, wa kala vonjo yimue ya posoka. Eye wa sapuila uprofeto Natana hati: “Tala, ame ñasi vonjo yovinendele, puãi ocikasa covisila via Yehova ci kasi ño vombalaka.” Daviti wa kevelela otembo yalua oco a tungile Yehova ombalaka yimue ya fina. Natana wo sapuila hati: “Linga cosi cili vutima wove momo Suku o kasi love.” Pole, eci hacoko Yehova a yonguile. Eye wa sapuila Natana oco a sapuile Daviti hati: “Ku ka nungile onjo yoku kalamo.” Ndaño okuti, Yehova wa likuminya ku Daviti okuti, wa laikele oku u kuatisa olonjanja viosi Pole, Daviti wa lilongisa okuti umue pokati komõlaye eye wa laikele oku tunga onembele. Ocituwa cipi Daviti a lekisa?—1 Asapulo 17:1-4, 8, 11, 12; 29:1.

7. Nye Daviti a yeva vutima poku kuama olonumbi via Yehova?

⁷ Ocili okuti, Daviti wa yonguile oku tunga onembele ya Yehova, citava okuti eye wa sumũile calua. Pole, wa kuatisa calua kupange  omõlaye Salomone a laikele oku songola. Daviti wa kuatisavo oku ongotiya olonalavayi loku ongolola utale, osipi, opalata, ulu kuenda avaya. Eye ka kuatele esakalalo poku kũlĩha omunu wa laikele oku kuata oluhimo omo lioku tunga onembele yaco, pole, noke yeya oku kũlĩhĩwa okuti onembele ya Salomone. Pole, Daviti wa vetiya Salomone poku popia hati: “Amolange, Yehova a kale love, oco o sumuluhe. Tunga onjo ya Yehova Suku yove, ndomo a ku ci popela.”—1 Asapulo 22:11, 14-16.

8. Momo lie Daviti a simĩle okuti Salomone ka kuatele epondulo lioku tunga onembele? Pole, nye Daviti a linga?

⁸ Tanga 1 Asapulo 22:5. Citava okuti Daviti wa simĩle okuti Salomone ka ponduile oku songola upange waco wa kuatele esilivilo lia velapo. Onembele yaco ya sukilile oku “posoka ca piala,” kuenda Salomone “umalehe handi, ka kolele.” Pole, Daviti wa kũlĩhĩle okuti Yehova wa ponduile oku kuatisa Salomone oku linga upange waco ulikasi. Omo liaco, Daviti wa likolisilako oco a kuatise kupange waco.

9. Vamanji vana va kuka nye va yeva vutima poku eca ovikele komanu vakuavo? Tukula ulandu umue.

⁹ Vamanji va kuka ka va sukila oku sumua eci ovo va eca ovikele kamalẽhe alume. Vosi yetu tua limbuka okuti, eci ci kuete esilivilo lia velapo koloneke vilo, upange wa Yehova. Oku pindisa amalẽhe oco va kuate ovikele ci ka va kuatisa oku tẽlisa upange waco. Sokolola kovina viaco. Eci wa kala omõla, citava okuti wa enda oku mola ndomo isia yove a enda oku endisa ekãlu liaye. Osimbu ove wa kala oku kula, eye wa ku lomboluila ndomo ovina vi lingiwa. Noke liotembo yimue, wa kuata ovikanda viove vioku endisa kuenda wa fetika oku endisa ekãlu. Pole, isia yove wa amamako oku ku ĩha alungulo. Olonjanja vimue wa enda oku ecelela okuti ove  endisa ekãlu liaye. Pole, eci eye a kuka olonjanja vialua ove wa enda oku endisa. Anga hẽ isia yove wa kuata esumuo? Sio, citava okuti eye wa kuata esanju lioku ku mola okuti ove o kasi oku endisa ekãlu. Cimuamue haico okuti, vamanji vana va kuka va kuete esanju poku mola amalẽhe vana va pindisa va pongiyiwa oco va tẽlise ovikele vocisoko ca Yehova.

10. Mose wa kala ndati eci a enda oku tambula esivayo kuenda omo lioku kuata omoko yoku songuila?

¹⁰ Tu sukila oku kuata utate oco ka tu ka kuate esepa omo liovikele omanu vakuavo va kuete. Tu pondola oku lilongisila kesanju Mose a yeva vutima eci va Isareli vamue va kala ndovaprofeto. (Tanga Atendelo 11:24-29.) Yehosua wa yonguile oku tateka va Isareli vaco pole, Mose wa popia hati: ‘O va kuetele esepa lame? Ciwa nda Yehova o kapa komanu vosi Espiritu liaye okuti va linga aprofeto.’ Mose wa kũlĩhĩle okuti, Yehova, eye wa kala oku songola upange waco. Mose ka sandele oku kuata esivayo, eye wa yonguile okuti afendeli vosi va Yehova va kuata ovikele. Nye ci popiwa catiamẽla kokuetu? Anga hẽ tu kuata esanju eci vakuetu va tambula ovikele kupange wa Yehova?

11. Nye manji umue a popia catiamẽla koku eca ovikele komanu vakuavo?

¹¹ Kuli vamanji valua va siata oku likolisilako oku linga upange wa Yehova kuenda oku u fendela vokuenda kuanyamo alua, kuenje va siata oku pindisa amalẽhe oco va tambule ovikele vikuavo. Tu konomuisi ulandu wa manji o tukuiwa hati, Peter. Vokuenda kueci ci soka 74 kanyamo a talavaya kupange wotembo yosi, wa talavaya eci ci soka 35 kanyamo kupange wo ko Betele yo cifuka co Europa. Vokuenda kuanyamo alua, eye wa talavaya ndu songui Voseketa Yupange. Noke, ocikele caco ca eciwa ku manji Paul umalẽhe umue wa pindisiwa la manji Peter. Anga hẽ manji Peter wa sumuile omo liepongoloko liaco? Sio. Eye wa popia hati: “Ndi kuete esanju lialua omo okuti vamanji vana va pindisiwa va tava oku tambula ovikele vikuavo kuenda va kasi oku tẽlisa ciwa upange waco.”

12. Nye tu lilongisa kulandu wa Rehovama?

¹² Eci omõla a Salomone, Rehovama a tumbikiwa komanu yusoma, wa sanda ekuatiso komanu va kuka, oco a tẽlise ocikele caye cokaliye. Noke eye wa likala oku pokola kalungulo avo! Eye wa pokola kelungulo liumalẽhe umue va kulila kumosi. Poku ci linga co nenẽla ovitangi. (2 Asapulo 10:6-11, 19)  Nye tu lilongisa kulandu waco? Ci kuete esilivilo lia velapo oku pinga ekuatiso komanu vana okuti va kuka kuenda va loñoloha calua okuti etu ci sule. Amalẽhe ka va pondola oku kuata ovisimĩlo viokuti va kasi oku kisikiwa oku linga ovina ndeci va lingaile kosimbu. Pole, ovo va sukila oku sumbila ovisimĩlo viomanu vana va kuka kuenda oku yuvula oku kuata ovisimĩlo viokuti onjila yavo yoku linga ovopange ka yi ka va kuatisa.

13. Amalẽhe va pondola oku talavayela ndati kumosi la vana va kuka?

¹³ Olonjanja vimue, amalẽhe va siata oku tambula ocikele coku songuila, okuti upange waco wa siata oku lingiwa la vamanji vana va kuka haivo va loñoloha. Ci kuete esilivilo lia velapo amalẽhe vaco oku lilongisila kakulu. Ulandu tua konomuisa kefetikilo liocipama cilo, wa lekisa okuti eci manji Paul a piñaliwa la manji Peter kupange umue woku songuila ko Betele, eye wa popia hati: “Oco ndi kapeko ekuatiso lia manji Peter, pa pita otembo yalua pole, cilo nda siata oku vetiya vamanji ndi talavayela kumosi lavo oco va tave kekuatiso liaco.”

14. Nye tu lilongisa konjila ndomo Timoteo kuenda Paulu va talavayela kumosi?

¹⁴ Ndaño okuti Timoteo eye wa kala umalẽhe la Paulu, pole, va lingila kumosi upange vokuenda kuanyamo alua. (Tanga Va Filipoi 2:20-22.) Paulu wa sapuila va Korindo hati: “Ndu tumisili Timoteo, momo omõlange wa soliwa vu Ñala, haeye nda kolela. Eye o wivaluisi olonumbi nda kuama kupange wa Kristu Yesu, lovina nda longaisa kovitumãlo viosi kuenda kakongelo osi.” (1 Va Korindo 4:17) Ulandu waco wa lekisa okuti Paulu la Timoteo va lingila upange kumosi kuenda va likuatisa pokati. Paulu wa sanda otembo yoku longisa Timoteo ‘olonumbi a kuama kupange wa Kristu,’ kuenda Timoteo wa lilongisa ciwa. Paulu wa solele calua Timoteo kuenda wa kolele okuti eye wa laikele oku tata ciwa vamanji vo ko Korindo. Akulu vekongelo va pondola oku setukula ongangu yupostolo Paulu poku pindisa alume vakuavo oco va songuile ekongelo.

15. Ukanda wa Va Roma 12:3-5 u pondola oku tu kuatisa ndati eci tu liyaka la pongoloko?

¹⁵ Tu kasi kotembo yimue yi komohĩsa. Ocisoko ca Yehova palo posi ci kasi oku livokiwa volonjila via litepa. Eci ci lomboloka okuti, ovina vialua vi ka amamako oku pongoloka. Amue pokati kapongoloko aco a pondola oku pita letu kuenda ka ci ka leluka oku pokola kapongoloko aco. Apongoloko aco a ka tu kuatisa lika nda tua lekisa umbombe kuenda tua tiamisila utima wetu kovina viwa viatiamẽla kupange Usoma okuti, kovina tu yongola ci sule. Eci tu linga ovina viaco tu likuata omunga. Paulu wa sonehela va Korindo va kala ko Roma hati: “Ndu sapuili vosi pokati kene okuti, ko ka simi okuti wa velipo, vakuene va sule, pole, sokololi oco vu kuati olondunge.” Eye wa lombolola okuti ndeci ovimatamata vietimba lietu vi linga  ovopange alitepa, omunu lomunu pokati ketu vekongelo o kuetevo ocikele cimue ca litepa.—Va Roma 12:3-5.

16. Nye Akristão vosi va sukila oku linga oco va amameko lombembua kuenda oku likuata omuga vocisoko ca Yehova?

¹⁶ Afendeli vosi va Yehova va yongola oku kuatisa Usoma kuenda oku tẽlisa ovina vi lavokiwa kokuavo. Vamanji vana va kuka va pondola oku pindisa amalẽhe. Vamanji amalẽhe va pondola oku tambula ovikele vikuavo, pole va sukila oku lekisa esuluviko kuenda esumbilo. Vamanji vakuele va siata oku kuata esanju eci akãi vavo va eca ekuatiso kokuavo eci ekalo liomuenyo li pongoloka. Akãi vaco, va siata oku setukula ongangu ya Prisila, okuti wa talavayela kumosi lulume waye Akuila.—Ovilinga 18:2.

17. Yesu wa pindisa olondonge viaye oku linga nye?

¹⁷ Yesu wa sia ongangu ya velapo yoku pindisa omanu vakuavo. Eye wa kũlĩhĩle okuti, omanu vakuavo va sukilile oku amamako oku linga upange waye. Ocili okuti, eye wa kũlĩhĩle okuti olondonge viaye ka via li puile. Pole, Yesu wa lekisa ekolelo kokuavo okuti va ponduile oku sandeka olondaka viwa koluali luosi. (Yoano 14:12) Eye wa va pindisa ciwa kuenda ovo va ponduile oku kundila kolofeka viosi va ponduile oku enda.—Va Kolosai 1:23.

18. Upange upi tu ka linga kovaso yoloneke? Upange upi tu kuete cilo?

¹⁸ Noke liolofa via Yesu, Yehova wo pindula loku u ĩha upange walua kuenda unene kuenje “wo kapa kilu liuviali wosi, lomoko yosi, lunene wosi, lusoma wosi.” (Va Efeso 1:19-21) Omo okuti tu afendeli va Yehova, ndaño okuti tu fa osimbu o Harmagedo ka yeyile, tua kolela okuti tu ka kala vali komuenyo kuenda tu ka kuata upange walua volulali luokaliye. Koloneke vilo, tu kuete ovolandu a komohĩsa atiamẽla kupange woku kunda olondaka viwa kuenda oku linga olondonge. Cikale okuti tu akulu ale tu amalẽhe, vosi yetu tua amamiko oku linga “vakuambili kupange wa Ñala.”—1 Va Korindo 15:58.