Tiamisila Utima Kovina Yehova a Siata Oku ku Lingila

YESU noke yoku pinduiwa, olondonge viaye vivali via kala oku tunda ko Yerusalãi oku enda ko Emausi. Evanjeliu lia Luka, li lombolola okuti, ‘osimbu va kala loku vangula kuenda oku likumbolola, Yesu wa kokela ocipepi kuenje wa endela kumue lavo. Pole ovaso avo a sitikiwa okuti ka vo limbukile.’ Noke Yesu wa va pula hati: ‘Ondaka ye vu kasi loku vangula? Ovo va talama loku nyumãla.’ Momo lie va nyumãlela? Olondonge via kuatele elavoko liokuti Yesu o ka yovola va Isareli kuviali wa Vakualofeka, pole, eyovo liaco ka lieyile. Momo Yesu wa pondiwa. Eli olio esunga lieci va sumuĩla.—Luka 24:15-21; Ovil. 1:6.

Yesu wa fetika oku sapela lolondonge viaco. “Eye wa va lomboluila ovisonehua viosi via tiamela kokuaye, loku fetika levi via Mose kuenda evi viovaprofeto vosi.” Vokuenda kupange wa Yesu woku kunda, kua pita ovolandu alua a komohisa hao a pamisa ekolelo! Osimbu olondonge via kala oku yevelela elomboluilo lia Yesu, va pongolola ovisimĩlo viavo kuenje va fetika oku kuata esanju. Noke kuteke waco, va popia vati: “Ovitima vietu ka via tokotele hẽ osimbu a vangula letu vonjila, cina a tu situluila ovisonehua?” (Luka 24:27, 32) Ulandu wolondonge via Yesu u tu longisa nye?

Elavoko ka Lia Tẽlisiwile li Tepulula Ndati Ombili Yetu?

Olondonge vivali vina via kala oku enda ko Emausi via sumuile calua omo okuti, ovina va kala oku lavoka ka via tẽlisiwile. Ovo va liyaka locitangi ca sonehiwa kelivulu Liolosapo 13:12, ku popia hati: “Elavoko liosimbu li tepuluisa utima.” Cimuamue haico okuti, vamue pokati ketu, ca piãla enene vana va kasi ale oku vumba Yehova vokuenda kuanyamo alua, va yongola okuti ‘ohali ya piãla’ yiya lonjanga. (Mat. 24:21; Esit. 7:14) Ocili okuti, olonjanja vimue nda elavoko lietu ka li tẽlisiwa, tu sumua calua.

Ivaluka okuti, olondonge vina vivali via yeva lika esanju eci Yesu a va sapuila oco va tiamisile utima kovitumasuku vina via tẽlisiwa kotembo yavo. Nda tua kuama  ongangu yavo, tu pondolavo oku kuata esanju kuenda oku yuvula esumuo. Manji umue ukulu wekongelo o tukuiwa hati, Michael, okuti o kasi ale oku vumba Yehova anyamo alua, wa popia hati: “Ku ka tiamisile utima kovina Yehova ka lingile handi. Tiamisila utima kovina Yehova a siata oku linga.” Onumbi eyi yi kuete esilivilo liocili!

Ovina Yehova a Siata Oku Linga

Kũlĩhĩsa ovina vimue vi komõhisa Yehova a linga. Yesu wa popia hati: “U o ñolela, ovilinga ndingainga ovilingavo, kuenda o lingavo ovilinga via velapo vali okuti evi vi sule.” (Yoa. 14:12) Koloneke vilo, afendeli va Suku, va kasi oku tẽlisa upange umue wa kundikiwa Kakristão vosi. Ci pitahãla olohuluwa epanduvali komanu, va lavoka oku puluka kohali yapiãla. Ivaluka okuti, tunde kosimbu kilu lieve, ka kua la kala omanu valua va vumba Yehova lekolelo okuti va sangiwa kolofeka vialua ndeci ci kasi oku pita koloneke vilo. Yehova o kasi oku kuatisa afendeli vaye oku tẽlisa ‘upange wa velapo’ ndomo Yesu a ci popele.

Nye Yehova a siatavo oku tu lingila? Eye wa ecelela okuti vakuavitima via sunguluka, va tunda voluali lulo lũvi oco va iñile vocisoko caye mu sangiwa ombembua. (2 Va Kor. 12:1-4) Omo liaco, sanda otembo yoku sokolola ovina vimue viatiamẽla kekalo liaco liombembua li sangiwa vocisoko caco. Kũlĩhĩsa vociseleko cove calivulu ale vociseleko calivulu ci sangiwa Vonjango Yusoma. Tuvula velivulu Índice das Publicações da Torre de Vigia, ale sandiliya vo Biblioteca da Torre de Vigia. Yevelela ulandu umue wondalama Yembimbiliya. Sokolola ovisikilo kuenda ovina wa mola kohongele yofeka ya lingiwa ndopo. Sokololavo elitokeko tu kuete la vamanjetu Akristão koluali luosi. Yehova omo liocali caye, wa siata oku tu ĩha okulia kualua kuespiritu kuenda oku tu sumũlũisa lombembua!

Ukualosamo Daviti, wa popia hati: “A Yehova Suku yange, ovikomo wa linga, lovisimilo wa tu simila, via lua cimue.” (Osa. 40:5) Nda tua tiamisila utima kovina Yehova a siata oku tu lingila loku sokolola ovisimĩlo viocisola a tu kuetele, tu kuata ongusu yoku pandikisa lekolelo kupange wa Yehova Isietu wo kilu.—Mat. 24:13.

[Elitalatu kemẽla 31]

Yesu wa kuatisa olondonge viaye oku tiamisila utima kovina Yehova a va lingila

[Elitalatu kemẽla 32]

Sokolola ovisikilo kuenda ovina wa mola kohongele yofeka ya lingiwa ndopo