Tu Yoleli!

KOLONEKE vilo, ka ca lelukile oku kuata esanju lonjolela. Omanu valua ka va siatele oku kuata ovisimĩlo via sunguluka viatiamẽla ku vakuavo. Omanu vana va kasi valupale anene, vamue pokati kavo ka va yongola oku kuata ukamba la vakuavo.

Ulume umue o tukuiwa hati, Alberto Oliverio, ukuakulongisa uloño woku sakula omanu va vela uyui, wa popia hati: “Valupale anene, omanu ka va lianjele la vakuavo. Omo liocituwa caco, pamue ka va kapiko vana va talavaya lavo kupange umuamue, omanu va kasi posongo yavo, kuenda ka va sumbilile olonalavayi violovenda va siata oku landa ovina va sukila.” Ocituwa caco ca siata oku sumuisa omanu.

Pole, Akristão va kuete ovituwa via litepa lomanu vaco. Upostolo Paulu wa soneha ndoco: “Sanjuki olonjanja viosi.” (1 Va Tes. 5:16) Kuli ovina vialua vi tu vetiya oku amamako oku kuata esanju lonjolela. Omo okuti tuafendeli va Yehova, Suku Tõlo, tu kuete  elomboloko liesapulo Liembimbiliya, lelavoko lioku popeliwa, oco tu kuate omuenyo ko pui. Tu pondolavo oku kuatisa omanu oco va tambule asumũlũho aco.​—Osa. 106:4, 5; Yer. 15:16; Va Rom. 12:12.

Oku kuata esanju lonjolela, oyo ondimbukiso Yakristão vocili. Eli olio esunga lieci Paulu a sonehela va Filipoi ndoco: ‘Nda sanjuka, kuenje ndi kuete onjolela kumosi lene vosi. Lenevo sanjuki, loku yolelela kumosi lame.’ (Va Fil. 2:17, 18) Olondaka Paulu a tukula vovinimbu evi vivali, vi lomboloka okuti, kuli olonjila vialua vi tu kuatisa oku sanjuka loku yolela kumue la vakuetu.

Akristão va sukila oku lavulula oco ka va ka kuate ocituwa coku yuvula oku kala la vakuavo. Vana va kuete ocituwa caco, ka va pondola oku sanjuka kumue la vamanji. Tu kuama ndati elungulo lia Paulu lioku ‘amamako oku sanjukila vu Ñala,’ kumosi la vamanjetu?​—Va Fil. 3:1.

Tu Sanjukili Kumue la Vamanji

Eci Paulu a sonehela ukanda va Filipoi, citava okuti wa kala vokayike ko Roma omo liupange woku kunda. (Va Fil. 1:7; 4:22) Osimbu a kala vokayike, ka tepuluile ombili yaye yoku kunda. Pole, wa sanjukilile oku vumba Yehova kuenda wa likolisilako oku ‘lieca olumue ndocilumba ci kola.’ (Va Fil. 2:17) Ocituwa ca Paulu, ci lekisa okuti esanju ka li tundi kekalo liomuenyo omunu a kuete. Momo, ndaño okuti Paulu wa kala vokayike, wa popia hati: ‘Nda amamako oku lekisa esanju.’​—Va Fil. 1:18.

Paulu wa sovola ekongelo ko Filipoi, kuenda wa lekisa ocisola ku vamanjaye. Eye wa kũlĩhĩle okuti, oku va sapuila esanju li tunda koku vumba Yehova, ci pondolavo oku pamisa ekolelo liavo. Kuenje wa soneha ndoco: ‘A vamanji, njongola oku ku sapuili oco vu kũlĩhi okuti eci ca pita lame camisako ocili ondaka yiwa, Cilo, akuenje velombe vosi la vakuavo vosi va kũlĩha okuti nda yikiwila Kristu.’ (Va Fil. 1:12, 13) Eci Paulu a lombolola ulandu waye, co kuatisa oku sanjukila kumue la vamanji. Kuenje, va Filipoi va sanjukila kumosi la Paulu. Ovo va yuvula esumuo omo liovitangi Paulu a liyaka lavio. Omo liaco, va sukilile oku kuama ongangu yaye. (Va Fil. 1:14; 3:17) Handi vali, va Filipoi va sukililevo oku amamako oku kongela Paulu volohutililo viavo, loku eca kokuaye ekuatiso.​—Va Fil. 1:19; 4:14-16.

 Anga hẽ tua siata oku lekisa esanju ndeci Paulu a linga? Tu kasi hẽ oku likolisilako oku linga ovina via sunguluka komuenyo wetu, kuenda kupange woku kunda? Eci tu kala la vamanji, tu sukila oku vangula ovolandu awa tua siata oku sanga kupange woku kunda. Ka tu vangula lika lavo eci tu kuata ulandu umue wa velapo. Citava okuti tu lombolola ndomo tua fetika ombangulo lomanu poku va kundila esapulo Liusoma ale ndomo tua va vetiya poku sapela lavo. Pamue, tua sapela ciwa lomunu umue tua sanga konjo, poku u lekisa ocinimbu cimue Cembimbiliya. Ale onjanja yimue, eci tua endele kupange woku kunda, omanu va limbuka okuti, Tulombangi Via Yehova, kuenje, tua kuata epuluvi lioku va kundila. Oku vangula ovina viaco la vakuetu, ci tu nenela esanju.

Afendeli valua va Yehova, va siata oku likolisilako oku kunda. Vamanji vamue va kasi kupange wakundi votembo yosi, olomitavaso vi nyula akongelo, vana va talavaya ko Betele, olomisionaliu, kuenda olondingupange kolofeka viosi, va siata oku lieca olumue kupange waco, kuenje, ci va nenela esanju lialua. Tua siata hẽ oku sanjukila kumue lavo loku lekisa onjolela? Omo liaco, tu pondola oku eca olopandu loku sanjukila ‘upange wusoma wa Suku’ va kasi oku linga. (Va Kol. 4:11) Eci tu enda kolohongele viekongelo, ale kolohongele vinene, tu pondola oku pamisa ekolelo liavo. Tu sukila oku kuama ongangu yavo yoku lekisa ombili. Tu pondola oku sokiya ‘otembo’ yoku va laleka konjo yetu oco tu yevelele ovolandu avo, loku sapela ovina vi va vetiya, osimbu tu lia lavo.​—Va Fil. 4:10.

Tu Sanjukili Kumue la Vamanji va Tala Ohali

Upostolo Paulu poku pandikisa kelambalalo toke eci a yula ovitangi, co kuatisa oku lekisa ekolelo ku Yehova. (Va Kol. 1:24; Tia. 1:2, 3) Paulu omo lioku kũlĩha okuti vamanji ko Filipu va kalavo oku liyaka lovitangi ndevi viaye, kuenda epandi liaye lia va vetiya oku pandikisa kovitangi, co kuatisa oku sanjukila kumue lavo. Eye wa soneha ndoco: “Oku kolela Kristu hakuoko lika kua eciwa kokuene. Kokuene kua eciwavo oku u talela ohali. Vu kasi vuyaki una wa muili kokuange, kuenda cilo haiwo u njevitili.”​—Va Fil. 1:29, 30.

Koloneke vilo, Akristão va siatavo oku liyaka lalambalalo omo liupange woku kunda. Olonjanja vimue va siata oku tipuiwa, pole, olonjanja vikuavo, elambalalo liaco liya vuyombeki. Citava okuti elambalalo liaco li tunda komanu vana va siata oku lingila usuanji efendelo lia Yehova, ku vangandietu, ale tu sepuiwa lakamba vo kupange kuenda vo kosikola. Yesu wa tu lungula oco ka tu ka yokokele ovitangi viaco. Pole, eci tu liyaka lovitangi, tu sukila oku lekisa esanju. Yesu wa popia hati: ‘Nda omanu vo njimbuili loku vu fũkĩlisila loku vu ndundilila ovina viosi vĩvi, wa sumũlũhi. Sanjuki, yoleli calua, momo onima yene kilu yalua.’​—Mat. 5:11, 12.

Nda vamanji kolofeka vimue va kasi oku liyaka lelambalalo, ka tu ka kuati usumba. Pole, tu sanjukili epandi liavo. Tu pondola oku likutilila loku pinga ku Yehova oco va kuate ekolelo lepandi. (Va Fil. 1:3, 4) Nda ka tu tẽla oku kuatisa vamanji yaco, tu sukila oku va kongela volohutililo vietu. Tu pondolavo oku kuatisa vamanji va sangiwa vekongelo okuti, va kasi oku liyaka lovitangi. Omo liaco, tu lekisi ocisola kokuavo loku va kuatisa. Citava okuti tu sanjukila kumue lavo poku va laleka Kefendelo lietu Liepata, oku enda lavo kupange woku kunda, kuenda oku linga lavo ovitalukilo.

Tu kuete ovina vialua vi tu vetiya oku sanjukila kumosi la vamanji! Omo liaco, ka tu ka yuvuli oku kuata ukamba la vamanji ndeci omanu vamue va siata oku linga. Nda tua ci linga, ci tu kuatisa oku vokiya ocisola, loku likuata omunga vekongelo, kuenda tu kuata esanju la Vamanji voluali luosi. (Va Fil. 2:1, 2) Tu amamiko oku kuama elungulo lia Paulu wa tu vetiya hati: “Sanjukili vu Ñala olonjanja viosi. Mopia vali siti, Sanjuki”!​—Va Fil. 4:4.

[Elitalatu lia eciwa kemẽla 6]

Globe: Courtesy of Replogle Globes