Manji umue o tukuiwa hati Angela, a o kuete ci pitahãla 30 kanyamo, wa sumuile calua, kuenje, wa kala oku kevelela akulu vekongelo. Nye va sukilile oku u sapuila? Eye wa pumba olohongele vimue viekongelo, omo liekavo lioku talavaya calua kupange umue woku kuatisa vana va kuka. Handi vali, wa sumuilevo omo lia inaye wa kala oku vela.

Nda wa kuatele epuluvi lioku nyula manji Angela ‘wa sumua,’ elembeleko lipi nda wo wĩha? (Yer. 31:25) O lipongiya ndati oco o ka lembeleke manji umue wa sumua?

Olonjanja vimue vosi yetu tua siata oku kava omo liupange wetu woku sanda eteku, ale oku tẽlisa ovikele vietu vekongelo. Onjanja yimue, uprofeto Daniele wa ‘kavele calua,’ eci a tambula ocinjonde cimue okuti, ka kuatele elomboloko liaco. (Dan. 8:27) Pole, wa kuatisiwa eci ungelo Gabriel a molẽha kokuaye. Yehova wa tumĩle ungelo Gabriel ku Daniele oco o lomboluile ovina a mola loku u sapuila okuti, wa yeva olohutililo viaye. Ungelo wa sapuilavo Daniele hati, ‘ove umunu umue o soliwe’ la Yehova. (Dan. 9:21-23) Vepuluvi likuavo, uprofeto Daniele wa pamisiwa lolondaka viungelo ukuavo.—Dan. 10:19.

O pondolavo oku kuama onjila yimuamue poku nyula manji umue wa sumua okuti, osimbu kua ci lingile handi, o sokolola ekalo liaye. Ovitangi vipi a kasi oku liyaka lavio? Ocitangi caco ci kasi oku tepulula ndati esanju liaye?  Ovituwa vipi viwa a kuete? Manji Richard okuti tunde eci a linga ukulu wekongelo pa pita ale 20 kanyamo wa popia hati: “Ocimãho cange, oku pamisa vamanji. Osimbu sia endele oku ka va nyula, ndi sokolola ovina vi ka pamisa ekolelo liavo.” Nda wa enda lukulu ukuavo wekongelo, momo lie ka u kũlĩhĩsila kumosi ekalo lia manji yaco?

Ove o tava okuti, ka ca lelukile manji umue oku sapuila kukulu wekongelo ovisimĩlo viaye. Tu kũlĩhĩsi ulandu owu: Citava okuti manji umue o kuete osõi yoku sapula ovitangi viaye kakulu vekongelo veya oku u nyula. Nye o sukila oku linga oco u kuatise oku lianja? O pondola oku sapela laye olondaka vimue viu nenela esanju. Manji Michael okuti tunde eci a linga ukulu wekongelo pa pita ale ci pitahãla 40 kanyamo, poku nyula vamanji o fetika loku popia ndoco: “Oku nyula vamanji kolonjo viavo loku va kũlĩha ciwa, ci nena esanju. Etaili ndeya oku pasuisa vamanji.”

Poku nyula vamanji, citava okuti o fetika lohutililo. Paulu vohutililo a linga, wa tukula ekolelo kuenda epandi vamanji va lekisa. (1 Va Tes. 1:2, 3) Nda wa lomboluila vamanji okuti wa sanjukila ovituwa viavo viwa, o vetiya utima wavo, kuenda ci va kuatisa oku lianja poku sapela love. Olondaka viove vi pondolavo oku va vetiya. Manji Ray wa popia hati: “Olonjanja vimue, tu ivalako ovina viwa tua siata oku linga. Nda manji umue o tu ivaluisa ovina viaco, ci tu nenela esanju.”

O pondola oku ‘pamisa ekolelo’ lia vamanji poku tanga lavo ocinimbu cimue Cembimbiliya, ndeci Paulu a linga. (Va Rom. 1:11) Manji umue wa sumua, citava okuti o sima hati,  ka kuete esilivilo ndeci ca pita lukualosamo wa li sokisa ­‘locipa ca likonya omo lioku kapiwa vowisi.’ (Osa. 119:83, 176) Noke yoku tukula ovinimbu viaco Viembimbiliya, o pondola oku sapuila manji hati, ‘ka ivaleleko’ olonumbi via Suku.

O kuama ndati Embimbiliya oco o pamise ekolelo lia manji umue wa liwekapo oku endaenda kolohongele, ale wa tepulula ombili yaye kupange woku kunda? O pondola oku pamisa manji yaco poku tukula ulandu watiamẽla kukãi umue wa nyelisa olombongo viaye. (Luka 15:8-10) Citava okuti, olombongo viaco via nyelẽla, vi panga onepa kolomota viopalata. Nda wa tukula ulandu waco, ci kuatisa manji oku limbuka okuti, o kuete esilivilo vekongelo. Noke liombangulo yaco, o pondolavo oku u sapuila okuti, Yehova wa siata oku u tata ciwa ndeci a tata olomeme viaye.

Vamanji va siata oku sanjukila oku lombolola ovisimĩlo viavo viatiamẽla kovina va tanga Vembimbiliya. Yuvula oku vangula calua! Noke yoku tanga ocinimbu cimue Cembimbiliya, tukula lika etosi limosi liavelapo, kuenje pinga ku manji oco a lombololevo ovisimĩlo viaye. Noke yoku tanga elivulu lia 2 Va Korindo 4:16, ukulu wekongelo o pondola oku pula ndoco: “O tẽla hẽ oku limbuka ndomo Yehova a pondola oku pamisa ekolelo liove?” Nda wa ci linga, ci ku kuatisi oku “likolisa pokati.”—Va Rom. 1:12.

O pondola oku lomboluila ku manji ulandu umue u sangiwa Vembimbiliya okuti, u likuata lekalo liaye. Nda manji yaco wa sumua, citava okuti u lomboluila ulandu wa pita la Hana, ale Epafrodito vana va sumuile, pole, va soliwile calua la Suku. (1 Sam. 1:9-11, 20; Va Fil. 2:25-30) Momo lie ku lomboluila amue pokati kovolandu aco nda otembo yecelela?

O pondola oku kapako vamanji, poku va nyula kolonjo viavo. (Ovil. 15:36) Eci o mala oku pasuisa manji umue, citava okuti o linga esokiyo lioku enda kumosi laye kupange woku kunda. Ukulu umue wekongelo o tukuiwa hati Bernard, nda wa li sanga la manji umue a nyulile, u pulisa lutate eci catiamẽla konumbi yimue a ecele poku popia hati: “Ondaka yina tua sapelele wa yi kapako?” Nda wa kapako vamanji, ci ku kuatisa oku limbuka ekuatiso o pondola oku eca kokuavo.

Vamanji va sukila oku limbuka okuti, va kapiwako, kuenda va soliwe. (1 Va Tes. 5:11) Osimbu kua lingile epasu ku manji umue, kũlĩhĩsa lutate ekalo liaye. Kongela manji yaco volohutililo viove. Nõla ovinimbu Viembimbiliya vi likuata lekalo liaye. Nda wa ci linga, o sanga olondaka vi pamisa vamanji ‘va sumua’!