Olonjali ka vi sukila oku sakalala oco vi kũlĩhe nda ca sunguluka okuti omõla wavo wa tundisiwa vekongelo o tumãla lavo Vonjango Yusoma ale sio. Utala ulo Wondavululi u lekisa okuti, nda citava, olonjali Akristão vi sukila oku sandiliya ovipama vimue valivulu etu, oco vi kuatise omõla wavo wa tundisiwa vekongelo okuti o kasi handi konjo yavo. Ndomo ca lekisiwa Vutala Wondavululi 15 ya Kuvala, yunyamo wo 1988, kemẽla 19 toke 20, citava okuti olonjali vi longisa Embimbiliya komõla wavo utito wa tundisiwa vekongelo. Momo, o sukila oku tambula olonumbi viu kuatisa oku yuvula onjila yĩvi a nõla. a

Ca sunguluka okuti, omõla wa tundisiwa vekongelo o tumala lolonjali viaye Vonjango Yusoma. Omo okuti ka kuli onumbi yi lekisa nda omunu wa tundisiwa vekongelo o sukila oku tumala kolomangu vio konyima, olonjali vi pondola oku nõla omangu vi tumãla lomõla wavo. Omo okuti olonjali vi kuete ocikele coku kuatisa omõla oco a pamise ekolelo liaye, vi sukila oku kũlĩha nda o kasi oku yevelela lutate ovipama violohongele. Nda omõla wa tundisiwa vekongelo o tumala lolonjali viaye o kuatisiwa.

Nye olonjali vi sukila oku linga nda omõla wavo wa tundisiwa vekongelo ka kasi vali konjo yavo? Citava hẽ okuti ka tumala lolonjali viaye Vonjango Yusoma? Kosimbu, Utala Wondavululi wa lekisile onumbi yokuti, olonjali vi sukila oku lavulula oco ka vi ka kuate ukamba lomõla wavo wa tundisiwa vekongelo okuti, ka kasi vali konjo yavo. b Pole, oku tumala Vonjango Yusoma la umue ukuepata wa tundisiwa vekongelo vokuenda kuolohongele, ca litepa loku kuata laye ukamba. Vakuepata va sukila oku lekisa ocituwa ca sunguluka poku kala la umue ukuepata liavo wa tundisiwa vekongelo. Ovo va ci linga poku pokola kolonumbi Viembimbiliya vi lekisa ndomo va yuvula oku kuata ukamba laye, oco ka va ka kokele ocilondokua ku vamanji.—1 Va Kor. 5:11, 13; 2 Yoa. 11.

Nda omunu wa tundisiwa vekongelo o tumala la umue ukuepata, ale o kala ocipepi la manji umue vekongelo, manji yaco ka sukila oku sakalala, nda omunu wa tundisiwa o lekisa ovituwa viwa. Nda tua tumbika onumbi yokuti, omunu wa tundisiwa vekongelo o sukila oku tumala komangu yimue ya nõliwa, ci nena ovitangi. Nda vamanji vosi kumue lolonjali va pokola kolonumbi Viembimbiliya viatiamẽla kuava va tundisiwa vekongelo, ka ci va kokela ocilondokua, kuenda ka va sakalala loku nõla omangu ku tumãla umue wa tundisiwa vekongelo. c