ECI omõlove a fetika oku enda, u teyuila hẽ kovina vi lemẽha? Citava okuti o sikilĩla ciwa olofiyu violusu, ovivela, o kapa ombindikiyo kosikata yo vonjo oco o teyuile omõlove.

Nda wa ci linga, oco lika o ka tẽla oku teyuila omõlove! Cilo, o sukila oku tambulula apulilo a ku sakalaisa, ndeci: ‘Omõlange o kuete hẽ ocituwa coku tala umbondo wukahonga?’ ‘Omõlange ukãi o tumaisa hẽ oviluvialuvia vi lekisa ovimatamata vietimba liaye votelefone, pamue vo Internet?’ Kuenda epulilo likuavo li sumuisa calua, lieli: ‘Anga hẽ omõlange o kasi ale vutunga woku lipekela?’

Olonjali vimue vi kuete ocituwa coku lavulula omãla vavo vokuenda kueteke liosi, poku kala ocipepi lavo. Pole, va limbuka okuti ‘oku lavulula’ kuaco, ku va tateka oku limbuka ovina omãla va lingainga vuyombeki. Noke omõla ulume ale ukãi, ka sapula vali ovituwa vina olonjali viaye ka vi sole.

Oku lavulula hayoko onjila ya velapo. Ocili okuti, Yehova Suku ka lavulula oviluvo viaye oco viu pokole. Omo liaco, onjali ka yi sukila oku ci linga. (Esinumuĩlo 30:19) Oco hẽ, o kuatisa ndati omõlove, oku nõla onjila ya sunguluka?—Olosapo 27:11.

Oku sapela olonjanja vialua lomãla vove tunde vutila wavo, oco ocina ca velapo. * (Olosapo 22:6) Omo liaco, amamako oku sapela lavo osimbu va kasi oku kula. Ove unjali, o sukila oku eca olonumbi via koleliwa komãla. Ufeko umue wo ko Bretanya londuko Alicia, wa popia ndoco: “Omanu valua va sima okuti oku vangula lakamba vavo ondaka yoku lipekela,  ci kutisa osõi, puãi eci haciliko. Etu tu sole calua olonumbi vi tunda kolonjali vietu. Momo via kũlĩha ovina vialua vioku tu sapuila okuti ka tua vi kũlĩhĩle.”

Osimbu omãla va kasi oku kula, va sukila oku kũlĩha ciwa ovina via kongela vondaka yoku lipekela, okuti ovina vikuavo viomuenyo ci sule. Va sukilavo “oku tepisa pokati keci ciwa leci cĩvi.” (Va Heveru 5:14) Ocili okuti, ovo va sesamẽla oku tambula olonumbi viwa, vina vi pamisa ekolelo liavo liatiamẽla kocituwa coku lipekela kuenda oku amamako oku vi kuama. Oco hẽ, o kuatisa ndati omãla vove oku kũlĩha olonumbi viaco?

Kũlĩhĩsa ovituwa viove muẽle. Ove wa kũlĩha okuti ukahonga—oku lipekela kuomanu vavali vana ka va likuelele—ekandu. (1 Va Tesalonike 4:3) Citava okuti, omãla vove poku kũlĩha ocisimĩlo cove catiamẽla kondaka eyi, va ka tẽla oku tukula ulandu umue Wembimbiliya u likuata lekolelo liove. Kuenje nda va pulisiwa, va ka tambulula lutõi okuti, oku lipekela kuomanu ka va kuelele, ekandu.

Pole, kuli ovina vialua vi sukiliwa. Elivulu, Sex Smart, lia lekisa okuti, pamue amalẽhe, va popia okuti va tava kovisimĩlo violonjali viavo viatiamẽla koku lipekela. Elivulu liaco li popia ndoco: “Amalẽhe vaco ka va tẽla oku lombolola ovisimĩlo viavo muẽle. Momo eci va pita locitangi ciya ño ocipikipiki, ka va ka tẽla oku nõla onjila va kuama yatiamẽla kovituwa viwa omo va kuete atatahãi.” Eli olio esunga lieci ci kuetele esilivilo oku kuata ovituwa viwa. O kuatisa ndati omãla vove oku kuata ovituwa viawa?

Lekisa ovituwa viwa.

O tava hẽ okuti ava va kuete lika omoko yoku lipekela vana va kuele? Olonjanja viosi, sapela ondaka yaco lomõlove. Vekonomuiso limue lia lingiwa, (Beyond the Big Talk,) lia lombolola hati, “vapata ana okuti, olonjali olondaka viavo vi pisa omãla oku vangula ondaka yoku lipekela, ka pa piti otembo yalua omãla vaco, va ka pekelisa.”

Ocili, ndomo ca lomboluiwa kefetikilo liocipama cilo, oku lekisa ovituwa viwa, ka ci lomboloka okuti omõlove ulume ale ukãi o ka nõlapo oku kuama ovituwa viaco. Pole, ovituwa viwa viepata, vi ka eca ociseveto ciwa komãla, okuti va kuatavo ovituwa viwa. Ovolandu a lekisa okuti olonjali vina via longisiwa ovituwa viwa tunde vutila, vi kuatisa omãla vavo oku kuatavo ovituwa viaco.

Longisa ocili catiamẽla kondaka yoku lipekela.

Alungulo a kuete esilivilo. (1 Va Korindo 6:18; Tiago 1:14, 15) Embimbiliya li tukula okuti oku lipekela ombanjaile ya tunda ku Suku, hanjanjoko ya Satana. (Olosapo 5:18, 19; Ocisungo ca Salomone 1:2) Oku sapuila lika omãla ovitangi vi tunda koku lipekela, ka ci va kuatisa oku kuata elomboloko liwa lieci ovisonehua vi popia kondaka yoku lipekela. Kafeko umue ko França londuko Corrina, wa popia ndoco: “Omo olonjali viange, via enda oku vangula calua ovitangi vi tunda kukahonga, nda kuata ovisimĩlo ka via sungulukile viatiamẽla kondaka yoku lipekela.”

Kũlĩhĩsa okuti omãla vove va kuete elomboloko liwa liatiamẽla kondaka yoku lipekela. Ukãi umue ko Mexiko londuko Nadia, wa popia hati: “Ame nda siata oku sandiliya apuluvi oku sapuila omãla vange okuti oku lipekela ca sunguluka, momo Yehova Suku, eye wa linga eliangiliyo liaco oco omanu va kuate esanju. Pole, citava lika oku lipekela noke yolohuela. Omo liaco, tu pondola oku kuata esanju ale esumuo, ca tamba ño kokuetu ndomo tu tenda elinga liaco.”

Kuatisa omõlove oku limbuka ovitangi.

Oco umalẽhe a tẽle oku nõla onjila yimue komuenyo, o sukila oku limbuka ovisimĩlo, kuenda oku kũlĩhĩsa onima ale ovitangi viyilila konjila a nõla. Ku ka sime okuti oku kũlĩha eci ciwa leci cĩvi, ci tẽla. Ukãi umue Ukristão londuko Emma kofeka yo Australia, wa popia ndoco: “Oku sokolola ovina vĩvi nda lingainga vutila, mopia siti, oku kũlĩha olonumbi via Suku, ka ci lomboloka okuti omunu o vi tava. Pole, oku kuata elomboloko lionima yi tunda koku kapako olonumbi viaco, loku kũlĩha ovitangi viyilila koku vi sinila, oco ca velapo.”

Olonumbi Viembimbiliya vina vi lekisa ovitangi vi tunda koku linga ovina ka via sungulukile, vi pondola oku ku kuatisa. Elivulu Liolosapo 5:8, 9 li lungula akuenje oku yuvula ukahonga hati, “ko ka eci unu wene ku vakuene, NW.” Ndomo ca lekisiwa vovinimbu evi, omunu una o litumbika kukahonga, o nyõla ekalo liaye liwa kuenda o pesela unu waye. Handi vali, ci kokavo okuti, omunu una a ka likuela laye ka kuata vali onjongole omo ka sangele ovituwa vina a lavokaile. Oku sokolola ovitangi vio ketimba, kovisimĩlo kuenda kespiritu, viyilila koku sinila ovihandeleko via Suku, ci kuatisa amalẽhe oku nõlapo oku kuama olonumbi via sunguluka komuenyo wavo. *

Umalẽhe umue wa tẽlisa 18 kanyamo, londuko Takao, ko Japãu, wa popia hati: “Ame nda kũlĩha okuti ndi pondola oku linga eci ca sunguluka, pole nda siata oku liyaka loloñei vietimba.” Amalẽhe vosi va kuete ocitangi ndeci, va pondola oku sanga elembeleko omo ka va kasi ulika. Ndaño muẽle upostolo Paulu, una wa kala ukuotõi, wa tava kondaka eyi eci a popia hati: “Eci njongola oku linga ciwa, cĩvi ceci.”—Va Roma 7:21.

Amalẽhe va sukila oku limbuka okuti, olonjanja viosi ka va lingainga ño ovina vĩvi. Eci ci ka va vetiya oku sokolola lutate ovituwa vina va sukila oku kuata. Ci ka va kuatisavo oku lipula ndoco: ‘Ndi yongola hẽ oku kũlĩhĩwa ndomunu o kuete ovituwa viwa haeye ukuekolelo ale, ele ndi yongola oku kũlĩhĩwa ndomunu wa hongua haeye o kuama lika oloñei vietimba?’ Oku kuata ovituwa viwa ci kuatisa amalẽhe oku tambulula lolondunge.