PINDUKO lia Yesu hulandu umueko wesanda wa pita kosimbu okuti, ka u kuete esilivilo kokuetu. Upostolo Paulu wa tukula elomboloko liaco poku soneha ndoco: “Ocili okuti, Kristu wa pinduiwa kuava va fa, haeye epako liatete kuava va fa. Omo okuti okufa kueya omo liomunu umuamue, epinduko liava va fa lieyavo lomunu umuamue. Momo, ndeci vosi va fa omo lia Adama, haico vosi va ka muila omuenyo vu Kristu.”—1 Va Korindo 15:20-22, NW.

Yesu wa pinduiwa keteke 16 kosãi ya Nisana kunyamo wa 33 K.K., keteke liaco, oco va Yudea va enda oku lumba apako atete ku Yehova Suku vonembele ko Yerusalãi. Paulu poku tukula Yesu okuti epako liatete, wa situlula okuti ku ka kala omanu vakuavo va ka pinduiwa kolofa.

Volondaka vikuavo Paulu wa lombolola ovina vi eyilila kepinduko lia Yesu. Eye wa amisako loku popia hati: “Omo okuti okufa kueya omo liomunu umuamue, epinduko liava va fa lieyavo lomunu umuamue.” Omo liekandu tua piñala ku Adama, vosi tu fa. Pole, omo okuti Yesu wa eca omuenyo waye wa lipua ndocilumba, epinduko liaye, lia tu yovola kupika wekandu kuenda kolofa. Noke, kelivulu lia Va Roma 6:23, Paulu wa popiavo hati: ‘Onima yekandu oku fa, pole ocali ca eciwa la Suku omuenyo ko pui vu Kristu Yesu Ñala yetu.’

Yesu wa tukula eci olofa lepinduko liaye vi lomboloka kokuetu. Poku litukula eye muẽle, wa popia hati: ‘Omo okuti Mõlomunu wa tulikiwa, wosi u kolela o kuata omuenyo ko pui. Omo Suku a sola calua oluali, wa eca Omõlaye wongunga okuti wosi u kolela ka fi pole, o kuata omuenyo ko pui.’—Yoano 3:14-16.

Sokolola ño, oku kuata omuenyo umue okuti ku yevi evalo, ku tali ohali, ale oku sumua! (Esituluilo 21:3, 4) Elavoko liaco li nena esanju lialua! Ulume umue ukuakukonomuisa Embimbiliya wa popia hati: “Olofa viupa lonjanga omuenyo womunu, pole epinduko li yovola lonjanga omunu kolofa.” Ocili okuti epinduko lia Yesu li lomboloka omuenyo!