Nda kulila vo sanjala yimue ya vĩha calua volupale luo Turku. Mãi yange wa lingaile olomapalo vioku veta olonuku okuti, wa kemãlele calua kuenje, ame la manjange tua litumbikavo komapalo yaco. Noke nda kuata ovitangi kosikola nda tangela omo lioku sanumũla ovama, kuenda sia kuatele ohele yoku yaka omo liongusu yalua nda kuata. Eci nda kala umalẽhe, nda linga ukamba lamalẽhe vamue va kala ovingumba, kuenje tua enda oku sanumũla ovama alua. Nda fetikavo oku yevelela ovisikilo vio heavy-metal, kuenda nda yonguile oku kala onjimbi ya kemãla yo rock.

Noke nda landa ovikuata vioku sika loloñoma, kuenda nda sovola ocimunga cimue. Kuenje nda linga usongui wocimunga caco. Poku imba ovisungo viaco loku piluka, nda enda oku lekisa ovituwa vĩvi. Omo okuti ocimunga cetu ca lingainga ungangala, kuenda tua kala ovisambinja, tua kũlĩhĩwile calua lomanu. Noke, tua fetika oku sikila kovaso yomanu valua. Tua kapa ovisikilo vietu valonga ovisungo, kuenje elonga lia sulako tua lipitulula. Kesulilo lianyamo ekũi tunde ko 1980, tua endele ko Estados Unidos oco tu kũlĩhĩwe. Eci tua pitĩlako, tua imbila ovisungo vietu vo Nova Yorke, kuenda ko Los Angeles kuenje, osimbu ka tua tiukilile ko Finlândia, tua sapela la vakuakupanga alonga ovisikilo.

Ndaño nda solele oku kala vocimunga ca vakuakusika, pole nda yonguile oku kuata esanju komuenyo. Nda sumuĩle calua poku mola ndomo vakuakupanga alonga ovisikilo va lekisa epela. Kuenda nda sumuĩlevo lomuenyo ũvi nda ambatele. Nda simĩle siti, omo nda kala omunu ũvi, ndi ka timĩhiwa vondalu yifelu. Kuenje nda seteka oku sanga atambululo amue valivulu osi atavo. Noke nda likutilila ku Suku oco a ñuatise, ndaño nda simĩle okuti lalimue eteke ndi ko sanjuisa.

Oco ndi kuate olombongo vioku litekula, nda fetika oku talavaya voseketa yovikanda. Eteke limue, nda sapela la umue ekamba lio kupange, okuti Ombangi ya ­Yehova. Nda linga apulilo alua kokuaye. Omo wa ndi tambulula Lovisonehua ca ndi komõhisa calua kuenje nda tava okuti o ndi longisa Embimbiliya. Noke yolosemana vimue tunde eci nda fetika oku lilongisa, ocimunga cetu ca tambula elaleko limue liwa lioku ngalavala elonga liovisikilo ko Estados Unidos. Nda simĩle siti lia kala epuluvi lioku kuata omuenyo uwa.

Nda vangula la manji wa kala oku ndi longisa Embimbiliya, okuti ndi yongola oku ngalavala elonga liovisikilo, kuenje eci ndi mãla oco ndi kapako noke olonumbi Viembimbiliya. Eye ka lekisile ovisimĩlo viaye, pole wa ndi tuma oku tanga olondaka via Yesu vi sangiwa kelivulu lia Mateo 6:24. Olondaka viaco vi popia ndoco: “Lomue o tẽla oku vumba vacime vavali.” Eci nda limbuka esilivilo liolondaka via Yesu nda komõha calua. Kuenje, noke yoloneke vimue, ulongisi wange eye wa komõha vali enene! Momo ndo sapuila siti, nda siapo ocimunga covisikilo, omo ndi yongola oku kuama Yesu!

Embimbiliya lia kala ndolumuĩlo lua situlula atime vetimba liange. (Tiago 1:22-25) Nda limbuka okuti, nda kuata ovituwa vĩvi ndeci, epela kuenda ocipululu. Nda enda oku popia olondaka ka via sungulukile, oku sanda ovama, oku sipa, kuenda oku nyua ovina vi koluisa. Eci nda limbuka okuti ovituwa viange ka vi litava lolonumbi Viembimbiliya, nda simĩle siti, si pondola oku vi siapo. Haimo lumue, nda fetika oku linga apongoloko a sukiliwa.—Va Efeso 4:22-24.

Kefetikilo, nda livetela evelo omo liovina vĩvi nda lingaile kosimbu. Pole, Ombangi ya Yehova ya kala oku ndi longisa, ya ndi kuatisa naito, naito. Eye wa ndi lekisa eci Embimbiliya li popia kelivulu lia Isaya 1:18, kuna ku popia ndoco: “Ndaño akandu ene a kusuka ngẽ ndonanga yohusu, a yela ndocikokoto; ndaño a kusuka ndohusu a linga ndutele.” Ocinimbu eci lovinimbu vikuavo Viembimbiliya, via ndi kuatisa oku limbuka okuti Isietu wokilu, ukuahenda, kuenda o yongola oku sakula apute a vana va likekembela akulueya kuavo.

Eci nda kũlĩha loku sanjukila Unu wa Yehova, nda yonguile oku tumbika omuenyo wange kokuaye (Osamo 40:8) Nda papatisiwa kunyamo wo 1992, kohongele yolofeka Yolombangi Via Yehova, ya lingiwila ko São Petersburgo, ko Rusia.

Nda livala ukamba lafendeli valua va Yehova. Olonjanja vimue, tua siata oku sika ovisungo via sunguluka, haivio ombanjaile ya tunda ku Suku. (Tiago 1:17) Esumũlũho limue lia velapo nda tambula, olohuela vietu lukãi wange Kristina. Ame kumue laye, tua siata oku lingila kumosi ovina vialua, ci kale kapuluvi esanju, ci kale kapuluvi ovitangi, eci ndi sumua calua.

Nda sia lingile Ombangi ya Yehova, cilo nda si kasi vali komuenyo. Kosimbu nda kuata ovitangi vialua. Pole, cilo omuenyo wange u kuete ocimãho, kuenda ndi sima siti, ovina viosi via pongoloka.