Ondaka yatiamẽla kolofa, yi yokokisa calua. Omanu va yuvula oku vangula ondaka yaco. Ndaño tu yuvula oku vangula ondaka yaco pole, tu pondola oku pita locitangi caco. Kuenda esumuo li tunda kolofa, li vala calua.

Lacimue ci pondola oku tu pongiyila oku fisa olonjali vietu, ohueli, ale omõletu. Vocipikipiki citava okuti ku iya ocilunga cimue. Lomue o tẽla oku yuvula esumuo li tunda kolofa kuenda esumuo liaco li pondola oku nena evalo lialua.

António una wa fisa isiaye eci a tusuiwa lekãlu, wa lombolola hati: “Oku fisa ngandiove, ci kasi ndu okuti umue wa yika epito lionjo yove kuenje olosapi wa viambata. Ove ku pondola vali oku tiukila konjo ndaño vekukutu limosi. Wa siala lika lonjivaluko. Eli, ekalo limue liokaliye. Ndaño okuti utima wove pamue ka u tava kocisimĩlo caco, pole, lacimue o pondola oku linga oco o pongolole ekalo liaco.”

Ukãi umue o tukuiwa hati Dorothy, okuti eci a siala ocimbumba wa kuata 47 kanyamo, wa sandiliya atambululo atiamẽla kolofa. Eye wa kala ulongisi ketavo liaye. Ndaño okuti Vocalumingu wa enda oku longisa omãla okuti noke yokufa tu pondola oku amamako lomuenyo, pole, ka kũlĩhĩle eci ci pita lomunu eci a fa. Dorothy ka sangele atambululo a suapo. Eye wa pulisa usongui wetavo liaye lio Angilikana hati: “Nye ci pita letu eci tu fa?” Usongui wo tambulula hati: “Lomue wa ci kũlĩha. Tu sukila ño oku kevelela, kuenda oku ci mola.”

Anga hẽ, tu sukila ño oku “kevelela kuenda oku ci mola”? Anga hẽ, kuli cimue ci pondola oku tu kuatisa oku kũlĩha nda olofa ovio esulilo liovina viosi ale sio?