Ndomo uyaki u kasi oku pita ko Ukrania u lekisa, asongui valua vatavo va siata oku litumbika koku sanda ombembua. Kũlĩhĩsa ndomo vamue pokati kasongui vaco va kasi oku kuatisa kolonepa vivali viuyaki:

•   “Asualali vetu vosi va kasi oku teyuila ofeka yavo va tunda, ndeci o Ukrania poku liyaka lovanyãli vayo, yi sukila epandiyo kuenda olopandu . . . Ovitima vietu, olohutilo vietu viutiwa wosi kuenda ekuatiso, olonjanja viosi vi kasi lene.”—Metropolitano Epifânio I de Kiev, ndomo ca lomboluiwa vukanda wasapulo The Jerusalem Post, 16 de março de 2022.

•   Usongui wa velapo wetavo lio Ortodoxa Russa, wa lingila asualali vo ko Russia ohundo yimue Calumingu. Eye wa pinga oco ofeka yaye yi teyuiwe, ‘okuti va Russia ovo lika va pondola oku ci linga,’ osimbu o Moscou yamamako oku ongolola asualali ko Ukrania.”—Reuters, 3 de Abril de 2022.

 Anga Akristão citava okuti va panga onepa kuyaki? Nye Embimbiliya li popia?

 Embimbiliya li popia okuti, olondonge viocili via Yesu Kristu ka vi pangi onepa kovoyaki.

•   “Someha osipata vocilalo cayo, momo vosi va yaka losipata, va ka nyõleha losipata.”—Mateo 26:52.

   Omunu una o kuatisa kovoyaki, o kasi hẽ oku pokola kolondaka via Yesu?

•   “Ndu wĩhi ocihandeleko cokaliye, cokuti vu lisola pokati; ndeci ame ndo soli, ene lisolivo pokati. Poku ci linga, vosi va ka limbuka okuti vulondonge viange, nda wa lisoli pokati.”—Yoano 13:34, 35.

   Anga hẽ omunu o kuatisa kovoyaki o lekisa ocisola Yesu a tukula okuti, oco ondimbukiso yolondonge viaye?

 Oco o kũlĩhe olonumbi vikuavo, tanga ocipama losapi “Uyaki u Litava Lekalo Liakristão”?

 Anga hẽ ca sunguluka Akristão oku yuvula oku panga onepa kuyaki koloneke vilo? Ocili, ca sunguka. Embimbiliya lia popele ale okuti kotembo tu kasi yi tukuiwa okuti, “oloneke via sulako,” kolofeka vialua ku ka kala omanu va ka kuama alongiso a Yesu kuenda ka va ka ‘lilongisa vali uyaki.’—Isaya 2:2, 4, etosi.

•   Oco o kũlĩhe olonumbi vikuavo, tanga ulandu wokoñoño Vutala Wondavululi losapi, “Suku o Tenda Ndati Uyaki?”

 Ndopo Yehova a “Suku yombembua,” o ka talavaya luviali waye wokilu oco a yovole omanu “kohali kuenda kungangala.”—Va Filipoi 4:9; Osamo 72:14.

•   Oco o kũlĩhe ndomo Suku a ka nena ombembua, tala ovideo losapi, Usoma wa Suku u Lomboloka Nye?