Calumingu keteke 5 ya Susu wo 2014, Serge Gerardin wa kala oku enda kohongele yimbo Yolombangi Via Yehova ocipepi lolupale luo Paris ko França, kuenje wa mõla ocilunga cimue. Eye wa popia hati: “Ekãlu limue lia veta vocimano ceyau kuenje lia kupuka. Ekãlu lia veta keyau, lia vata ondalu kuenje lia viluka.”

Serge tunde eci a iñila kupange woku ima ondalu eci ku mõleha, ocilunga cimue pa pita ale 40 kanyamo. Omo okuti eye usongui kupange waco, eye wa yayulako oku eca ekuatiso. Eye wa popia hati: “Nda kala konele yikuavo yetapalo, pole, nda pinga komunu wa kala oku endisa oco a talame, kuenje nda lupukila kekãlu lia kala oku pia.” Serge wa yeva omanu va kala oku litetela vokati kekãlu loku kaluka hati: “Tu popeli! Tu popeli!” Serge wa amisako hati: “Nda walele okasaku longalavata kuenda sia kuatele ocimãleho lacimue coku liteyuila kondalu. Pole, eci nda yeva oku litetela kuaco, ca ndi valuisa okuti vekãlu mua kala omanu va sukila ekuatiso!”

Serge eci a ñuala ekãlu, wa mõla omunu umue okuti ka kaile vali oku litetela, wo upamo loku u tuala kocitumãlo cimue ca kolapo. Serge wa popia hati: “Eye wa ndi sapuila hati vekãlu handi muli omanu vavali.” Velivala liaco, akãlu alua a talama. Pole, omo liowuya wondalu, omanu ka va tẽlele oku amẽla ocipepi.”

Omanu vamue va kala oku endisa akãlu, veya lovimãleho viavo viokuima ondalu oco va kuatise. Lekuatiso lia Serge, va tẽla oku tepulula ulienge wondalu. Ulume wa kala oku endisa wa sakatela vekãlu. Omo liaco, Serge lomanu vakuavo vavilula ekãlu kuenje vo upamo loku u tuala kocitumãlo cakoka.

Serge wa lombolola hati, “noke ulienge wa livokiya!” Pole handi, vekãlu mua salele omunu wa sakatela. Ulume umue okuti upange waye oku imavo ondalu eci ku mõleha ocilunga cimue, wa talama oco a kuatise. Serge hati, “ndo sapuila okuti, ekãlu ndopo lituika”, omo liaco “tua nõlapo oku u kuata vovoko loku u nãlamo”. Noke liekukutu limosi, ekãlu liatuika.

Kuenje ocimunga cavakuakuima ondalu ceya oco va ime andalu kuenda yifulumelu vieya oku kuatisa vana va lemehiwa. Serge eye tambula tete ekuatiso omo lioku livalula loku pia londalu. Eci Serge a tiukila vokalela oco a ende kohongele yimbo, omanu va lupukila kokuaye oco vo pandule.

Serge wa sanjuka calua omo lioku eca ekuatiso liaco. “Eye wa popia hati, kovaso a Suku yange, Yehova, nda kuata ocikele coku popela omanu. Nda sanjuka calua poku limbuka okuti nda kuatisa oku popela omanu vaco.”