یہ 1931ء کی بات ہے۔‏ پیرس کے ایک مشہور تھیٹر میں 23 ملکوں سے لوگ آئے۔‏ بڑی بڑی ٹیکسیوں سے دلکش کپڑوں میں ملبوس لوگ اُتر رہے تھے۔‏ جلد ہی تھیٹر تقریباً 3000 لوگوں سے کھچاکھچ بھر گیا۔‏ یہ لوگ کسی کانسرٹ کے لیے نہیں آئے تھے بلکہ وہ بھائی جوزف رتھرفورڈ کی تقریریں سننے آئے تھے جو اُس وقت مُنادی کے کام کی نگرانی کر رہے تھے۔‏ اُن کی پُرجوش تقریروں کا ترجمہ فرانسیسی،‏ جرمن اور پولش زبانوں میں کِیا گیا۔‏ بھائی رتھرفورڈ کی دم‌دار آواز پورے ہال میں گُونج رہی تھی۔‏

پیرس میں ہونے والے اِس اِجتماع کے بعد سے فرانس میں مُنادی کے کام کو بہت فروغ ملا۔‏ اپنی ایک تقریر میں بھائی رتھرفورڈ نے مختلف ملکوں سے آنے والے نوجوانوں کی حوصلہ‌افزائی کی کہ وہ فرانس میں پہل‌کاروں کے طور پر خدمت کریں۔‏ جان کوُک نامی نوجوان جن کا تعلق برطانیہ سے تھا،‏ اُنہوں نے بتایا کہ وہ بھائی رتھرفورڈ کی اِس نصیحت کو کبھی نہیں بھولے:‏ ”‏نوجوانو،‏ کسی بھی چیز کو اِس بات کی اِجازت نہ دیں کہ وہ آپ کو پہل‌کاروں کے طور پر خدمت کرنے سے روکے۔‏“‏ *

بھائی جان کوُک نے کچھ عرصے تک فرانس میں پہل‌کار کے طور پر خدمت کی اور بعد میں وہ ایک مشنری بن گئے۔‏ دوسرے ملکوں سے تعلق رکھنے والے اَور بھی بہت سے نوجوان بہن بھائیوں نے فرانس میں پہل‌کاروں کے طور پر خدمت کی۔‏ یوں اُنہوں نے پولُس رسول کی مثال پر عمل کِیا جنہوں نے مکدینہ میں مُنادی کرنے کی دعوت قبول کی۔‏ (‏اعما 16:‏9،‏ 10‏)‏ اِس طرح فرانس میں پہل‌کاروں کی تعداد تیزی سے بڑھتی گئی۔‏ 1930ء میں فرانس میں صرف 27 پہل‌کار تھے لیکن 1931ء میں اِن کی تعداد 104 تک پہنچ گئی۔‏ اِن پہل‌کاروں میں سے زیادہ‌تر فرانسیسی زبان نہیں بول سکتے تھے۔‏ یہ پہل‌کار نئی زبان سیکھنے،‏ کم سہولیات میں گزارہ کرنے اور دوسرے مبشروں سے دُور رہنے کے باوجود خوش رہنے کے قابل کیسے ہوئے؟‏

دوسرے ملکوں سے تعلق رکھنے والے پہل‌کار خوش‌خبری سنانے کے لیے ایسے کارڈ اِستعمال کرتے تھے جن پر بائبل کا پیغام لکھا ہوتا تھا۔‏ جرمنی سے تعلق رکھنے والا ایک بھائی جو بڑی دلیری سے پیرس میں خوش‌خبری سناتا تھا،‏ اُس نے کہا:‏ ”‏ہم جانتے تھے کہ ہمارا خدا بہت زورآور ہے۔‏ لیکن پھر بھی کبھی کبھار مُنادی کے دوران ڈر کی وجہ سے ہمارا دل تیزی سے دھڑکنے لگتا تھا۔‏ ہم اِنسانوں سے نہیں بلکہ اِس بات سے ڈرتے تھے کہ کہیں ہم فرانسیسی زبان کا وہ جملہ نہ بھول جائیں جو ہم نے زبانی یاد کِیا تھا۔‏ یہ جملہ تھا:‏ ”‏کیا آپ یہ کارڈ پڑھنا پسند کریں گے؟‏“‏ ہمیں اِس بات کا پورا یقین تھا کہ ہم بہت ہی اہم کام کر رہے ہیں۔‏“‏

جب ہم فلیٹوں میں مُنادی کرتے تھے تو اکثر چوکیدار ہمیں وہاں سے نکال دیا کرتے تھے۔‏ ایک دن برطانیہ سے تعلق رکھنے والی دو بہنوں کا سامنا ایک بہت ہی غصیلے چوکیدار سے ہوا۔‏ اِن بہنوں کو بہت کم فرانسیسی زبان آتی تھی۔‏ اِس چوکیدار نے بڑے غصے میں اُن سے پوچھا کہ وہ کس سے ملنا چاہتی ہیں۔‏ اُس کا غصہ ٹھنڈا کرنے کے لیے ایک بہن نے دروازے پر ایک تحریر کی طرف اِشارہ کِیا۔‏ اِس پر فرانسیسی زبان میں لکھا تھا:‏ ”‏گھنٹی بجائیں۔‏“‏ اِس بہن کو لگا کہ یہ خاتونِ‌خانہ کا نام ہوگا اِس لیے اُس نے چوکیدار سے کہا:‏ ”‏ہم میڈم ”‏گھنٹی بجائیں“‏ سے ملنے آئے ہیں۔‏“‏ چونکہ پہل‌کار اِس طرح کی غلطیوں پر ہنسا کرتے تھے اِس لیے وہ مُنادی کا کام جاری رکھنے کے قابل ہوئے۔‏

1930ء کی دہائی میں فرانس میں بہت سے مقامی لوگوں کو زیادہ سہولیات میسر نہیں تھیں اور دوسرے ملکوں سے آنے والے پہل‌کاروں کی صورتحال بھی کچھ ایسی ہی تھی۔‏ برطانیہ سے تعلق رکھنے والی بہن مونا بروزکا نے بتایا کہ اُنہیں اور اُن کی ساتھی پہل‌کار کو کن مسائل کا سامنا ہوا۔‏ اُنہوں نے کہا:‏ ”‏ہم جہاں رہتے تھے وہاں ہمارے پاس زیادہ سہولیات نہیں تھیں۔‏ ایک بڑا مسئلہ یہ تھا کہ سردیوں میں کمرے کو گرم رکھنے کا کوئی اِنتظام نہیں تھا۔‏ ہمیں اکثر یخ ٹھنڈے کمرے میں رہنا پڑتا تھا۔‏ ہم ایک ٹب میں پانی جمع کر کے رکھتے تھے جس پر برف کی تہہ جم جاتی تھی اور نہانے سے پہلے ہمیں اِسے توڑنا پڑتا تھا۔‏“‏ کیا پہل‌کار ایسی مشکلات کی وجہ سے بےحوصلہ ہو گئے؟‏ بالکل نہیں۔‏ ایک پہل‌کار نے اپنے احساسات کا اِظہار یوں کِیا:‏ ”‏حالانکہ ہمارے پاس اپنا کچھ نہیں تھا لیکن ہمیں کسی چیز کی کمی بھی نہیں تھی۔‏“‏—‏متی 6:‏33‏۔‏

اِن پہل‌کاروں کو ایک اَور مسئلے کا بھی سامنا تھا۔‏ 1930ء کی دہائی کے شروع میں فرانس میں مبشروں کی تعداد 700 سے کم تھی اور مبشر ملک کے مختلف حصوں میں رہتے تھے۔‏ اِن پہل‌کاروں نے دوسرے مبشروں سے دُور رہنے کے باوجود اپنی خوشی کیسے قائم رکھی؟‏ اِس سلسلے میں بہن مونا کی مثال پر غور کریں۔‏ وہ اور اُن کی ساتھی پہل‌کار بھی دوسرے بہن بھائیوں سے کافی دُور علاقے میں رہتی تھیں۔‏ بہن مونا نے بتایا:‏ ”‏چونکہ ہمارے علاقے میں کوئی کلیسیا نہیں تھی اِس لیے ہم دونوں خود ہی مل کر تنظیم کی کتابوں اور رسالوں کا مطالعہ کر لیتی تھیں۔‏ اُس زمانے میں ہم نہ تو کسی سے دوبارہ ملاقات کرتے تھے اور نہ کسی کو بائبل کورس کراتے تھے۔‏ اِس لیے ہمارے پاس شام کو اپنے گھر والوں خاص طور پر دوسرے پہل‌کاروں کو خط لکھنے کا وقت ہوتا تھا۔‏ خط میں ہم پہل‌کار ایک دوسرے کو اپنے تجربات بتاتے تھے اور ایک دوسرے کی حوصلہ‌افزائی کرتے تھے۔‏“‏—‏1-‏تھس 5:‏11‏۔‏

اِن پہل‌کاروں نے مشکلات کے باوجود اپنی خوشی برقرار رکھی۔‏ یہ بات اُن خطوں سے نظر آتی ہے جو پہل‌کاروں نے فرانس میں خدمت کرنے کے بعد برانچ کو لکھے۔‏ اِس سلسلے میں ایک ممسوح بہن عینی کرگین کی مثال پر غور کریں۔‏ اُنہوں نے اپنے شوہر کے ساتھ 1931ء سے 1935ء تک فرانس کے بہت سے علاقوں میں خدمت کی۔‏ اُنہوں نے لکھا:‏ ”‏وہاں ہمارا وقت بہت ہی اچھا گزرا۔‏ ہم سب پہل‌کار ایک دوسرے کے بہت اچھے دوست تھے۔‏ ہم بھی پولُس رسول کی طرح کام کر رہے تھے جنہوں نے کہا:‏ ”‏مَیں نے درخت لگایا اور اپلوؔس نے پانی دیا مگر بڑھایا خدا نے۔‏“‏“‏ جن پہل‌کاروں کو بہت سال پہلے فرانس میں خدمت کرنے کا موقع ملا،‏ اُنہیں یہ جان کر بڑی خوشی ہوتی ہے کہ اُن کی محنت رنگ لائی ہے۔‏—‏1-‏کُر 3:‏6‏۔‏

اِن پہل‌کاروں نے مشکلات کو سہنے اور جوش سے خدمت کرنے کی ایک عمدہ مثال قائم کی۔‏ آج‌کل جو بہن بھائی یہوواہ خدا کی زیادہ خدمت کرنا چاہتے ہیں،‏ وہ اِن پہل‌کاروں سے بہت کچھ سیکھ سکتے ہیں۔‏ آج فرانس میں تقریباً 14 ہزار پہل‌کار ہیں۔‏ اِن میں سے بہت سے دوسری زبان بولنے والے گروپوں یا کلیسیاؤں میں خدمت کر رہے ہیں۔‏ * یہ پہل‌کار بھی اپنی خدمت میں کسی بھی چیز کو حائل نہیں ہونے دیتے۔‏—‏فرانس میں ہماری برانچ کی طرف سے۔‏