یہ لوگ اِتنے خوش کیوں نظر آ رہے ہیں؟‏ کیونکہ وہ ہمارے ایک اجتماع میں شامل ہیں۔‏ قدیم زمانے میں خدا کے خادم سال میں تین دفعہ بڑے اجتماعوں کے لئے جمع ہوتے تھے۔‏ اِسی طرح ہم بھی کئی موقعوں پر بڑے بڑے گروہوں میں جمع ہوتے ہیں۔‏ (‏استثنا 16:‏16‏)‏ ہر سال ہمارے تین بڑے اجتماع ہوتے ہیں:‏ دو حلقے کے اجتماع جو ایک ایک دن کے ہوتے ہیں اور ایک علاقائی اجتماع جو تین دن کا ہوتا ہے۔‏ ہمیں اِن اجتماعوں سے کیا فائدہ ہوتا ہے؟‏

ہمارا بھائی‌چارہ مضبوط ہوتا ہے۔‏ جب بنی‌اسرائیل ”‏جماعت میں اپنے سارے دل سے [‏یہوواہ]‏ کا شکر“‏ کرتے تھے تو اُنہیں بڑی خوشی ملتی تھی۔‏ اِسی طرح جب ہم خاص موقعوں پر خدا کی عبادت کے لئے جمع ہوتے ہیں تو ہم بھی بہت خوش ہوتے ہیں۔‏ (‏زبور 26:‏12؛‏ 111:‏1‏)‏ اِن موقعوں پر ہم دوسری کلیسیاؤں کے بہن‌بھائیوں اور کبھی‌کبھی تو دوسرے ملکوں کے بہن‌بھائیوں سے ملتے ہیں۔‏ سب لوگ اپنے لئے کھانا لاتے ہیں اور دوپہر کے وقفے کے دوران مل کر کھاتے ہیں۔‏ اِس طرح ہمیں نئے نئے دوست بنانے کا موقع ملتا ہے۔‏ (‏اعمال 2:‏42‏)‏ بڑے اجتماعوں پر ہم اپنی آنکھوں سے دیکھتے ہیں کہ پوری دُنیا میں ہمارے بہن‌بھائیوں میں کتنی محبت اور اتحاد پایا جاتا ہے۔‏—‏1-‏پطرس 2:‏17‏۔‏

ہمارا ایمان مضبوط ہوتا ہے۔‏ جب بنی‌اسرائیل کے اجتماعوں پر پاک صحیفوں کی وضاحت کی گئی تو ”‏وہ اُن باتوں کو جو اُن کے آگے پڑھی گئیں سمجھے۔‏“‏ (‏نحمیاہ 8:‏8،‏ 12‏)‏ ہم بھی اُس تعلیم کی بڑی قدر کرتے ہیں جو اجتماعوں پر خدا کے کلام سے دی جاتی ہے۔‏ اجتماع کا موضوع بائبل سے لیا جاتا ہے۔‏ دلچسپ تقریریں پیش کی جاتی ہیں اور یہ دِکھایا جاتا ہے کہ ہم مختلف صورتحال میں خدا کی مرضی پر کیسے عمل کر سکتے ہیں۔‏ ایسے لوگوں کے انٹرویو بھی لئے جاتے ہیں جو اِس مشکل دَور میں خدا کی مرضی پر چلتے ہیں۔‏ اُن کی باتوں کو سُن کر ہماری بھی ہمت بڑھتی ہے۔‏ علاقائی اجتماع پر ڈرامے بھی پیش کئے جاتے ہیں جن میں کوئی ایسا واقعہ دِکھایا جاتا ہے جس کا بائبل میں ذکر ہوا ہے۔‏ یوں ہم اپنے ذہن میں اُس واقعے کی تصویر بنا سکتے ہیں اور اِس سے بہت کچھ سیکھ سکتے ہیں۔‏ ہر اجتماع پر ایسے لوگوں کو بپتسمہ دیا جاتا ہے جو اِس بات کا اقرار کرنا چاہتے ہیں کہ اُنہوں نے خود کو خدا کے لئے وقف کِیا ہے۔‏

• ہمارے اجتماع خوشی کے موقعے کیوں ہوتے ہیں؟‏

• آپ کو ہمارے کسی اجتماع پر آنے سے کیا فائدہ ہوگا؟‏