سرِورق کا موضوع | بائبل قائمودائم رہی
جب خراب ہونے کا خطرہ تھا
مسئلہ:بائبل کو تحریر کرنے اور اِس کی نقلنویسی کرنے کے لیے پپائرس اور چمڑے سے بنے طوماروں کو اِستعمال کِیا گیا۔ * (2-تیمُتھیُس 4:13) اِس طرح کے مواد کو اِستعمال کرنے کا ایک خطرہ کیا تھا؟
پپائرس کے طومار آسانی سے پھٹ سکتے ہیں اور اِن کا رنگ اُڑ سکتا ہے۔ تحقیقدان رچرڈ پارکنسن اور سٹیون کوئیرکی نے کہا: ”پپائرس سے بنے طومار وقت گزرنے کے ساتھ ساتھ ریزہ ہو سکتے ہیں۔ اگر اِنہیں لپیٹ کے کہیں محفوظ کِیا جائے تو اِن پر کائی لگ سکتی ہے اور نمی آ سکتی ہے۔ اور اگر اِنہیں زمین میں دبا دیا جائے یا کسی غار میں رکھا جائے تو اِنہیں چوہے اور کیڑے مکوڑے کھا سکتے ہیں، خاص طور پر سفید چیونٹیاں۔“ جب پپائرس کے طوماروں کو دریافت کِیا گیا تو اِن میں سے کچھ تیز روشنی اور حبس کی وجہ سے خراب ہونے لگے۔
چمڑے کے طومار پپائرس کے طوماروں سے پائیدار ہوتے ہیں۔ لیکن اگر اِن کا خیال نہ رکھا جائے یا اِنہیں کسی ایسی جگہ پر رکھا جائے جہاں شدید گرمی، تیز روشنی اور حبس ہو تو یہ بھی خراب ہو سکتے ہیں۔ * چمڑوں کو کیڑے مکوڑے بھی کھا سکتے ہیں۔ ایک کتاب میں اِس حوالے سے بتایا گیا کہ ایسی صورتوں میں قدیم نسخوں کے ”بچنے کا کم ہی اِمکان ہے۔“ (”ایوری ڈے رائٹنگ اِن دی گریکو رومن ایسٹ“) لیکن اگر بائبل کے نسخے وقت گزرنے کے ساتھ ساتھ خاک ہو جاتے تو کیا اِس کا پیغام بھی اِس کے ساتھ ہی ختم نہیں ہو جاتا؟
بائبل کیسے محفوظ رہی:خدا نے بنیاِسرائیل کے ہر بادشاہ کو یہ حکم دیا تھا کہ وہ شریعت کی ”ایک نقل اپنے لئے ایک کتاب میں اُتار لے“ جو کہ بائبل کی پہلی پانچ کتابیں تھیں۔ (اِستثنا 17:18) اِس کے علاوہ نقلنویسوں نے بائبل کے اِتنے زیادہ نسخے تیار کیے کہ پہلی صدی عیسوی میں اِسرائیل میں، یہاں تک کہ مقدونیہ جیسے دُور علاقے میں یہودیوں کی ہر عبادتگاہ میں صحیفوں کی نقلیں موجود تھیں۔ (لُوقا 4:16، 17؛ اعمال 17:11) لیکن اِن قدیم نسخوں میں سے بعض ہمارے زمانے تک کیسے محفوظ رہے؟
نئے عہدنامے پر تحقیق کرنے والے عالم فلپ کمفرٹ کہتے ہیں: ”یہودی اکثر طوماروں کو محفوظ رکھنے کے لیے اِنہیں مٹی کے مرتبانوں میں رکھتے تھے۔“ لگتا ہے کہ مسیحی بھی ایسا کرتے رہے۔ اِس لیے بائبل کے کچھ قدیم نسخے مٹی کے مرتبانوں سے دریافت ہوئے۔ اِس کے علاوہ یہ خشک علاقوں اور غاروں یا ایسی جگہوں سے دریافت ہوئے جہاں روشنی نہیں پڑتی تھی۔
نتیجہ:بائبل کے ہزاروں قدیم نسخے جن میں سے کچھ تو 2000 سال سے بھی زیادہ پُرانے تھے، آج تک موجود ہیں۔ کسی اَور قدیم کتاب کے اِتنے نسخے نہیں ملے جتنے کہ بائبل کے۔
^ پیراگراف 3 پپائرس ایک آبی پودا ہے۔
^ پیراگراف 5 مثال کے طور پر امریکہ کی آزادی کی قرارداد چمڑے کے بنے کاغذ پر لکھی گئی۔ تقریباً 250 سال بعد اِس کا رنگ اِس قدر اُڑ گیا کہ اب اِسے پڑھنا بہت مشکل ہو گیا ہے۔