Техника қурилмалари тобора ривожланиб кетаётган ушбу замонда бошқарувчилар, ҳамкасблар ва мижозлар сиздан ҳафта ичида 7 кун мобайнида 24 соат ишлашингизни кутишади. Бундай шароитларда иш ва шахсий ҳаёт ўртасида чегара ўрнатиш жуда мушкул. Бошқача қилиб айтганда, ишга ва ҳаётингизнинг бошқа соҳаларига, жумладан оилангизга қанча вақт ажратиш кераклигини аниқлаш осонмас.

•  Нимани билиш лозим?

•  Қўл келадиган маслаҳатлар

•  Жуфтликлар фикри

•  Муҳокама учун саволлар

• Техника қурилмалари иш ва оила ўртасидаги чегараларни йўққа чиқармоқда. Натижада, ишдан кейин ҳар бир қўнғироқ, электрон почта ёки тармоқлар орқали келадиган хабарларни худди ўчириш зарур бўлган ёнғиндек қабул қиласиз.

  «Ишдан кейин уйга келиб, оилангиз билан бирга вақт ўтказадиган ҳаёт ўтмишда қолиб кетди. Буни фақат орзу қилиш мумкин. Ишдан қўнғироқлару хабарлар никоҳни иккинчи ўринга суриб қўйяпти». (Женетт)

• Ҳеч нарса ўзидан-ўзи ҳал бўлмайди. Бирон чора кўриш даркор. Аниқ режангиз бўлмаса, ишингиз оилавий ҳаётингизга доимо суқилиб кираверади.

  «Одатда биринчи бўлиб турмуш ўртоғингизга бепарво бўласиз. Балки: “У мени тушунади, кечиради. Кейинроқ бирга вақт ўтказармиз”,— деб ўйлаётгандирсиз». (Холли)

• Никоҳ биринчи ўринда бўлиши керак. Муқаддас Китобда шундай ёзилган: «Аллоҳ бирга қўшганини бандаси ажратмасин». (Матто 19:6) Сиз ва умр йўлдошингизни биронта киши «ажратишига» йўл қўймайсиз экан, ишга ҳам асло йўл қўйманг.

  «Баъзи мижозларнинг фикрича, пул тўлашса, улар билан доим алоқада бўлишим керак. Лекин мен учун оилам муҳимроқ. Шунинг учун, уларга ишдан ташқари вақтда иш билан боғлиқ хабарларга жавоб бермайман, кейинроқ боғланаман, деб айтаман». (Марк)

  Ўзингиздан сўранг: «Ишларим мен ҳақимда нимани ошкор этмоқда? Мен учун нима муҳимроқ? Оиламми? Ёки ишимми?»

• Ишингизга йўқ деб айтишдан қўрқманг. Худонинг Каломида: «Ўз ҳаддини биладиганларга донолик хосдир»,— дея ёзилган. (Ҳикматлар 11:2, изоҳ) Ўз ҳаддини биладиган инсонлар гоҳида қайсидир ишлардан воз кечиш ёки уларни бошқаларга топшириш кераклигини тушунишади.

  «Мен водопроводчиман. Агар менга мурожаат қилишса, демак, вазият жиддий. Муайян пайтда ишимни қила олмаслигимни тушунсам, мижозимни ҳамкасбимга йўналтираман». (Кристофер)

  Ўзингиздан сўранг: «Умр йўлдошим яккаланиб қолмаслиги учун иш вақтидан ташқари бериладиган ишни рад этишга тайёрманми? Турмуш ўртоғим бунга қандай жавоб беради?»

• Бирга вақт ўтказишни режалаштиринг. Муқаддас Китобда қуйидагича айтилган: «Ҳар бир нарсанинг ўз вақти бор». (Воиз 3:1) Ишда қанча кўп банд бўлсангиз, оилангиз учун алоҳида вақт ажратишингиз ва бунга ҳеч нима тўсқинлик қилмаслигига қўлингиздан келганини қилишингиз лозим.

  «Одатда иш кўпайиб кетганда, эрим билан қачон бирга вақт ўтказишимизни дарров келишиб оламиз. Бу шунчаки бирга овқатланиш ёки кўчада айланиш бўлиши мумкин. Ҳеч нарса бизга халақит беришига йўл қўймаймиз». (Дебора)

  Ўзингиздан сўранг: «Ҳеч нимага чалғимай, умр йўлдошим билан бирга вақт ўтказишни мунтазам равишда режалаштиряпманми? Турмуш ўртоғим бунга қандай жавоб беради?»

• Ўчириш тугмасини босинг. Муқаддас Китобда айтилишича, «қайси нарсалар муҳимроқ эканини фарқлаб» туришимиз зарур. (Филиппиликларга 1:10) Иш масалалари билан чалғимаслик учун гоҳида ўз электрон қурилмаларингизни ўчириб тура оласизми?

  «Вақтида тўхташни ва ишдан кейин ишламасликни мақсад қилиб олганман. Бунинг учун телефонимдаги барча товушларни ўчириб қўяман». (Жереми)

  Ўзингиздан сўранг: «Бошлиғим ёки мижознинг хабарларини доимо билиб туришим керак, деб ўйлаяпманми? Турмуш ўртоғим бунга қандай жавоб беради?»

• Мослашувчан бўлинг. Муқаддас Ёзувларда: «Мулоҳазакор эканингиз ҳамма одамларга маълум бўлсин»,— деб ёзилган. (Филиппиликларга 4:5) Албаттаки, гоҳида иш никоҳга суқилиши мумкин. Масалан, турмуш ўртоғингизнинг иши доимо алоқада бўлишини талаб этар. Мулоҳазакор бўлиб, у қўлидан келмайдиган нарсани талаб қилманг.

  «Эримнинг кичик бизнеси бор ва тез-тез ишдан кейин ҳал қилиш керак бўлган зарурий масалалар туғилиб қолади. Баъзида роса аччиғим чиқади. Лекин бирга кўп вақт ўтказганимиз сабабли, буни тушунишга ҳаракат қиламан». (Беверли)

  Ўзингиздан сўранг: «Умр йўлдошим қанчалар банд эканини тушуниб, ҳаддан ташқари кўп нарсани талаб қилмаяпманми? Турмуш ўртоғим бунга қандай жавоб беради?»

Аввал қуйидаги саволларни алоҳида, кейин эса бирга кўриб чиқинглар:

• Турмуш ўртоғингиз иш масалаларини уйда ҳал қилишни давом эттираётганингиздан норозилик билдиряптими? Ҳа, бўлса, унинг фикрига қўшиляпсизми?

• Иш ва шахсий ҳаёт ўртасида чегара бўлиши учун айнан қандай чора кўра оласиз?

• Умр йўлдошингиз ишини ишда қолдирмаётгандай туюляптими? Ҳа, бўлса, аниқ бир вазиятларни эслай оласизми?

• Турмуш ўртоғингиз иш ва шахсий ҳаёт орасида чегара билмаяпти, деб ҳисоблаяпсизми? Ҳа, бўлса, сизнингча у қандай чора кўриши лозим?