Rimliklarga 7:1-25
7 Birodarlar, odam tirik ekan, Tavrot uning ustidan hokimlik qilayotganini nahot bilmasangiz (buni qonunni bilganlar uchun gapiryapman)?
2 Masalan, turmush qurgan xotin eri tirik ekan, unga qonun bo‘yicha bog‘langan bo‘ladi. Mabodo eri hayotdan ko‘z yumsa, shunda u erning qonunidan ozod bo‘ladi+.
3 Bordi-yu, eri tirikligida u o‘zga erkakka tegsa, zino qilgan bo‘ladi+. Lekin eri o‘lsa, uning qonunidan ozod bo‘ladi va boshqa erkak bilan oila qurgan taqdirda ham zinokor sanalmaydi+.
4 Xullas, birodarlarim, sizlar ham Masih badani vositasida Tavrot uchun o‘lib, o‘zgaga — tirilganga+ tegishli bo‘lib qoldingiz+. Shu yo‘sin, biz Xudoni sharaflash uchun samara keltiraylik+.
5 Tana istaklariga binoan umr kechirganimizda, Tavrot orqali oydin bo‘lgan gunohli ehtiroslar tanamizda amal qilib, oqibati o‘lim edi+.
6 Hozir esa bizni qachonlardir mahkam ushlab turgan Tavrot uchun o‘lib, undan ozod bo‘ldik+. Shunday qilib biz eski ma’noda, ya’ni qonunlar bo‘yicha emas+, balki yangi ma’noda — ruh bo‘yicha Allohning qullari bo‘lib qoldik+.
7 Unda nima demoqchimiz? Tavrotning kamchiligi* bormi? Mutlaqo! Lekin Tavrot bo‘lmaganida, gunoh nima ekanligini bila olmasdim+. Masalan, Tavrotda: «Birovning narsasiga ko‘z olaytirmang»+,— deb aytilmaganida, men ko‘z olaytirish nima ekanini bilmay yurardim.
8 Ammo bu amr orqali gunoh menda har qanday istaklarni tug‘dirdi. Sababi, qonunsiz gunoh o‘lik edi+.
9 To‘g‘risini aytganda, qonun bo‘lmagan paytda men tirik edim. Lekin amr paydo bo‘lganda, gunoh tirildi, men esa o‘ldim+.
10 Hayotga olib boradigan amr+ o‘limga eltishini ko‘rdim.
11 Amr orqali gunoh meni yo‘ldan ozdirib, o‘limga duchor qildi.
12 Boisi, Tavrot muqaddas, amr ham muqaddas, adolatli va yaxshidir+.
13 Unda yaxshilik men uchun o‘limga aylanganmi? Aslo! Faqat gunoh o‘limga olib bordi. Shu yo‘sin, yaxshi narsa orqali gunoh menga o‘lim olib kelishi+ hamda amr sababli gunoh qanchalik yomon ekanligi ayon bo‘ldi+.
14 Tavrotni Alloh bergan*, men bo‘lsa gunohning qulligiga sotilgan bandaman, xolos+.
15 Nima qilayotganimni bilmayman: istagan narsamni qilmayman, ammo nimadan nafratlansam, shuni qilaman.
16 Xohlamagan narsani qilsam, Tavrot yaxshi ekaniga qo‘shilaman.
17 Biroq hozir bu narsalarni men emas, balki ichimdagi gunoh qilyapti+.
18 Menda, ya’ni badanimda yaxshi narsa yo‘q, zero yaxshilikni xohlashga xohlayman-u, lekin qila olmayman+.
19 Qilgim kelgan yaxshi narsani qilmayman, lekin istamagan yomon narsani qayta-qayta qilaveraman.
20 Agar xohlamagan narsani bajarsam, unda men emas, menda yashovchi gunoh bajaryapti.
21 Xullas, bundan men o‘zimda ushbu qonunni payqayman: to‘g‘ri bo‘lgan narsani qilmoqchi bo‘lsam, yonimda yomonlik turadi+.
22 Qalbimda Allohning qonunidan zavq olaman+.
23 Tanamda esa boshqa qonunni payqayapman. Bu qonun aqlimdagi qonunga qarshi kurashib+, tanamdagi gunohning qonuniga meni asir qilyapti+.
24 Eh, qanday baxtsiz odamman-a! O‘limga duchor bo‘ladigan mana shu tanamdan meni kim qutqaradi?
25 Allohga shukrlar bo‘lsin, chunki U Hazratimiz Iso Masih orqali meni qutqaradi! Xullasi kalom, ongim bilan Xudoning qonuniga qul bo‘lsam-da, ammo badanim gunoh qonunining qulidir+.
