Ndi Vha Hani Muṅwe wa Ṱhanzi dza Yehova?
Vhukando vhune ha ṱoḓea u itela u vha muṅwe wa Ṱhanzi dza Yehova ho ṱaluswa nga Yesu nahone vhu wanala kha Mateo 28:19, 20. Dzenedzo ndimana dzi ṱalusa zwine muthu a tea u zwi ita uri a vhe mufunziwa wa Kristo, zwi katela u amba kana u ṱanziela nga ha Yehova.
Vhukando ha U Thoma: Gudani zwine zwa funzwa nga Bivhili. Yesu o laedza vhatevheli vhawe uri vha ‘ite vhafunziwa nahone vha vha funze.’ (Mateo 28:19, 20) Ipfi ḽo ṱalutshedzelwaho nga uri “mufunziwa” nga lwa thevhedzaipfi ḽi amba “mugudi.” Bivhili, zwihuluhulu pfunzo dza Yesu Kristo dzine dza wanala henefho, i na mafhungo ane na a ṱoḓa uri ni tshile nga nḓila i takadzaho na i fushaho. (2 Timotheo 3:16, 17) Ri ḓo takalela u ni thusa u guda zwine zwa funzwa nga Bivhili ri tshi shumisa mbekanyo yashu ya mahala ya u guda Bivhili.—Mateo 10:7, 8; 1 Vhathesalonika 2:13.
Vhukando ha Vhuvhili: Shumisani zwine na zwi guda. Yesu o amba uri vhane vha guda vha tea u dovha vha ‘tevhedza zwoṱhe zwe a vha laya.’ (Mateo 28:20) Hezwi zwi amba uri musi ni tshi guda Bivhili a no ngo tea u songo dzhenisa nḓivho—ni tea u ita tshanduko khulwane kha nḓila ine na humbula na u ḓifara ngayo. (Mishumo 10:42; Vhaefesa 4:22-29; Vhaheberu 10:24, 25) Vhane vha tevhedza zwe Yesu a laya vha ṱuṱuwedzelwa u dzhia tsheo ya u mu tevhela nga u ṋekedza vhutshilo havho kha Yehova Mudzimu.—Mateo 16:24.
Vhukando ha Vhuraru: Lovhedzwani. (Mateo 28:19) Bivhilini, ndovhedzo i vhambedzwa na mbulungo. (Vhambedzani Vharoma 6:2-4.) I shuma sa tshiga tsha u fa kha buḓo ḽa kale ḽa vhutshilo na u thoma buḓo ḽiswa. Nga zwenezwo, u lovhedzwa haṋu ndi u tenda khagala uri no ṱhaphudza vhukando vhuvhili ho ṱaluswaho nga Yesu nahone ni khou humbela Mudzimu uri a ni ṋee luvalo lwo kunaho.—Vhaheberu 9:14; 1 Petro 3:21.
Ndi ḓo zwi ḓivha hani arali ndo lugela u lovhedzwa?
Ambani na vhahulwane vha tshivhidzo. Vha ḓo amba na inwi u itela vhungoho ha uri ni a pfesesa zwine zwa katelwa, ni a shumisa zwe na zwi guda na uri no ḓiṋekedza kha Mudzimu nga u ḓifunela.—Mishumo 20:28; 1 Petro 5:1-3.
Naa honovhu vhukando vhu a shuma kha vhana vha vhabebi vha Dziṱhanzi?
Ee. Ri alusa vhana vhashu “nga u vha laya na u vha ṱuṱuwedzela zwa Yehova,” u tendelana na ndaela ya Bivhili. (Vhaefesa 6:4) Naho zwo ralo, musi vha tshi aluwa, vha tea u ḓidzhiela theo ya u guda, u ṱanganedza na u shumisa zwine zwa funzwa nga Bivhili vha sa athu fanelea u lovhedzwa. (Vharoma 12:2) Muṅwe na muṅwe u tea u ḓidzhiela tsheo musi zwi tshi ḓa kha vhurabeli.—Vharoma 14:12; Vhagalata 6:5.
You May Also Like
NGA HA RIṊE
Pfunzo ya Bivhili I Farwa Hani?
Shangoni ḽothe, Ṱhanzi dza Yehova vha ḓivhelwa mbekanyamushumo ya mahala ya pfunzo ya Bivhili. Vhonani nḓila ine ya farwa ngayo.
MBUDZISO DZINE DZA ANZELA U VHUDZISWA
Ngudo Ya Bivhili Ndi Mini?
Musi ni tshi khou guda na Ṱhanzi dza Yehova nga mahala, ni nga shumisa Bivhili iṅwe na iṅwe ine na i takalela. Ni nga vhidza vha muṱani ha waṋu kana khonani dzaṋu uri na vhone vha vhe hone musi ni tshi guda.
MBUDZISO DZA BIVHILI DZO FHINDULWA
Naa Zwo Tea U Vha Muraḓo Wa Vhurereli Ho Dzudzanyeaho?
Naa muthu a nga gwadamela Mudzimu e eṱhe?
PFUNZO DZA BIVHILI
Lingedzani Heyi Ngudo Ya Bivhili
Gudani Bivhili nga mahala ni tshi khou thuswa nga muṅwe wa Ṱhanzi dza Yehova.