Vho Clodean ndi muṅwe wa Ṱhanzi dza Yehova nahone vha dzula henefha Afurika Tshipembe, vho vha vho valelwa sibadela uri vha itwe muaro. Vho vha vhe na thaidzo nnzhi dza mutakalo nahone vho vha tshi tea u ita phetho ya uri vha ḓo lafhiwa hani. Musi vha sa athu u itwa muaro, vho vha vha tshi ḓipfa vho neta, vha tshi khou pfa vhuṱungu nahone vhe na mutsiko. Zwo vha zwo tou ralo na musi vho no itwa muaro. Musi ho no fhela vhege dzi ṱoḓaho u vha fumi vho no humela hayani, vho vha vha sa koni u dzula zwavhuḓi. Nahone nga nṱhani ha dziedzi ḽa COVID-19, vhathu vho vha vha sa koni u ya u vha dalela.

 Vho Clodean vho vha vha sa ṱoḓi vhuimo havho vhu tshi vha tsikeledza, nga zwenezwo vho humbela Yehova uri a vha ṋee maanḓa a u khuthadza vhaṅwe. Musi vha tshi vho kona u dzula, vho founela murathu wa muṅwe mufumakadzi we a vha e muhura wavho, we a vha o litsha u guda na Ṱhanzi dza Yehova. Vho Clodean vho mu khuthadza vha tshi shumisa Bivhili nahone zwo mu ṱuṱuwedza uri a ṱoḓe u bvela phanḓa na ngudo yawe. Vho mu ṱalutshedza mbuyelo dzine ra dzi wana nga u ya miṱanganoni ya tshivhidzo, na u mu thusa uri a kone u ṱanganela na tshivhidzo tsha henefho a tshi shumisa videoconference. Onoyo mufumakadzi o ya miṱanganoni a tshi shumisa videoconference, a ita na u fhindula musi hu tshi vhudziswa mbudziso.

 Vho Clodean vho ita na u huwelela kha murahu wa onoyo mufumakadzi, we na ene a vha a tshi khou ṱoḓa u guda Bivhili. Onoyo mufumakadzi o vha vhudza nga ha vhaṅwe vhane vha khou ṱoḓa u guda. Ha vha na mvelelo dzifhio? Vho Clodean vho thoma pfunzo dza Bivhili na vhaṅwe vhafumakadzi vhaṋa. Fhedzi mafhungo avho ha gumi henefho.

 Nga nṱhani ha uri Vho Clodean vho sumbedza u vha na ndavha na vhaṅwe, zwo vha thusa uri vha kone u thoma pfunzo dza Bivhili na vhaṅwe vhafumakadzi vha fumi nga tshifhinga tsha dziedzi ḽa COVID-19. Tshivhalo tsha vhafumakadzi vhe vha vha vha tshi khou guda navho ndi 16. Vhaṅwe vha vhenevho vhafumakadzi vha a ya miṱanganoni tshifhinga tshoṱhe vha tshi shumisa videoconference. Nge Vho Clodean vha dzula vho farakanea, zwo vha thusa uri vha si vhilaedziswe nga vhuimo havho. Vho amba uri u khuthadzwa nga “Mudzimu wa u khuthadza hoṱhe” ndi zwone zwo vha thusaho uri vha kone u khuthadza vhaṅwe.—2 Vhakorinta 1:3, 4.

 Vhagudiswa vha Vho Clodean vha ḓipfa hani nga zwe Vho Clodean vha vha gudisa zwone? Muṅwe wavho u ri: “Ndo vhuyelwa nga nḓila nnzhi. Fhedzi zwe nda zwi funesa ho vha u guda dzina ḽa Mudzimu. Zwenezwo zwo ita uri ndi kone u sendela tsini na Yehova.” Mufumakadzi wa u thoma we Vho Clodean vha mu founela u itela u guda nae, zwa zwino u khou ḓilugisela u lovhedzwa. Dzenedzi tshenzhelo dzi ita uri Vho Clodean vha takale nga maanḓa nahone vha khou fhola.