Bugu Ya U Thoma Ya Samuele 10:1-27
10 Samuele a dzhia mudzio wa mapfura, a a shela kha ṱhoho ya Saulo.+ A mu khisa a ri: “Yehova o u ḓodza uri u vhe murangaphanḓa+ wa vhathu vhawe.+
2 Musi u tshi ṱuwa fhano u ḓo wana vhanna vhavhili tsini na tombo ḽa Rahele+ shangoni ḽa Vhabenyamini ngei Tselitsa, vha ḓo amba na iwe vha ri: ‘Donngi dze wa vha u tshi khou dzi ṱoḓa dzo wanala, zwino khotsi au ha tsha vhilaela nga ha donngi,+ fhedzi u khou vhilaela nga ha iwe. U ri: “Ndi ḓo ita mini zwino murwa wanga a sa vhuyi?’”
3 U bva henefho u tshimbile u swike murini muhulu wa Thaboro, hune wa ḓo ṱangana na vhanna vhararu vha tshi khou gonya Bethele+ nḓuni ya Mudzimu wa ngoho, muṅwe u ḓo vha o hwala zwibudzana zwiraru, muṅwe o hwala ḽofo tharu dza vhurotho, muṅwe o hwala mvuvhelo khulu ya waini.
4 Vha ḓo u vhudzisa mutakalo, vha u ṋea ḽofo mbili, u dzi ṱanganedze.
5 Nga murahu ha zwenezwo, u ye tshikwarani tsha Mudzimu wa ngoho, hune ha vha na tshigwada tsha maswole a Vhafilisita. Musi u tshi swika muḓini, u ḓo ṱangana na tshigwada tsha vhaporofita tshi tshi khou tsa fhethu ha vhurabeli, phanḓa havho hu tshi khou lidzwa tshilidzo tshi re na ṱhale na murumba na tshiṱiringo na haripa, ngeno vhaporofita vha tshi khou porofita.
6 Muya wa Yehova u ḓo u ṋea maanḓa,+ wa porofita navho, vhumuthu hau ha shandulwa.+
7 Musi zwenezwo zwithu zwo no itea, u ite zwoṱhe zwine wa nga zwi kona ngauri Mudzimu wa ngoho u na iwe.
8 Ngauralo, nthange phanḓa u tsele Giligala,+ ndi ḓo u tevhela henefho uri ndi ṋekedze zwiṱhavhelo zwa u fhiswa na zwiṱhavhelo zwa u pfumedzana. U nndindele maḓuvha a sumbe u swika ndi tshi ḓa ha iwe, ndi ḓo u vhudza zwine wa fanela u zwi ita.”
9 Musi Saulo a tshi tou ṱuwa henefho he ha vha hu na Samuele, Mudzimu a thoma u shandula Saulo a vha na vhuṅwe vhumuthu, zwenezwo zwithu zwoṱhe zwo itea nga ḽeneḽo ḓuvha.
10 Vha bva henefho vha ya tshikwarani, Saulo a ṱangana na tshigwada tsha vhaporofita. Nga u ṱavhanya muya wa Mudzimu wa mu ṋea maanḓa,+ a thoma u porofita+ navho.
11 Musi vhane vha mu ḓivha vha tshi mu vhona a tshi khou porofita e na vhaṅwe vhaporofita, vha vhudzisana vha ri: “Hu khou itea mini nga murwa wa Kishi? Naa Saulo na ene ndi muṅwe wa vhaporofita?”
12 Muṅwe munna wa muḓini wonoyo a ri: “Fhedzi khotsi avho ndi nnyi?” Ngauralo, ha vha na murero une wa ri: “Naa Saulo na ene ndi muṅwe wa vhaporofita?”+
13 Mafheleloni a fhedza u porofita, a ya fhethu ha vhurabeli.
14 Nga murahu shaka ḽa Saulo ḽa amba nae na muḓinḓa wawe ḽa ri: “No vha no ya ngafhi?” Saulo a ri: “Ro vha ro ya u ṱoḓa donngi,+ fhedzi musi ri sa dzi wani ra ya ha Samuele.”
15 Shaka ḽa Saulo ḽa vhudzisa ḽa ri: “Ndi khou humbela uri u mmbudze, Samuele o u vhudza mini?”
16 Saulo a fhindula shaka ḽawe a ri: “O ri vhudza uri donngi dzo no wanala.” Fhedzi Saulo ho ngo mu vhudza zwe Samuele a mu vhudza nga ha vhuhosi.
17 Samuele a kuvhanganya vhathu phanḓa ha Yehova ngei Mitsipa+
18 a amba na Vhaisiraele a ri: “Zwe Yehova Mudzimu wa Isiraele a amba ndi hezwi: ‘Ndi nṋe we nda bvisa Vhaisiraele Egipita na we a ni tshidza zwanḓani zwa Vhaegipita+ na zwanḓani zwa mivhuso yoṱhe ye ya vha i tshi khou ni tsikeledza.
19 Fhedzi ṋamusi no laṱa Mudzimu+ waṋu we a ni tshidza kha khombo dzoṱhe na mitsiko yoṱhe, inwi na ri: “Aiwa, ri vhetshele khosi ya u ri vhusa.” Zwino imani phanḓa ha Yehova u ya nga tshaka dzaṋu na nga zwigwada zwa vhathu vha zwigidi.’”
20 Nga zwenezwo, Samuele a sendedza tshaka dzoṱhe dza Isiraele tsini,+ ha nangwa lushaka lwa Benyamini.+
21 Ngauralo, a sendedza tsini lushaka lwa Benyamini nga miṱa yalwo, ha nangwa lushaka lwa Matiri. Mafheleloni ha nangwa Saulo murwa wa Kishi.+ Fhedzi musi vha tshi ya u mu ṱoḓa vha si mu wane.
22 Vha vhudzisa Yehova vha ri:+ “Naa onoyo munna o no swika?” Yehova a fhindula a ri: “Khouḽa, o dzumbama vhukati ha mihwalo.”
23 Ngauralo, vha gidima vha mu bvisa henefho. Musi a tshi ima vhukati ha vhathu, o vha o lapfa, vhaṅwe vhathu vho vha vha tshi mu guma kha mahaḓa.+
24 Samuele a amba na vhathu vhoṱhe a ri: “Naa ni khou mu vhona we Yehova a mu nanga+ na uri a hu na ane a fana nae vhukati ha vhathu vhoṱhe?” Vhathu vhoṱhe vha vhidzelela vha ri: “Khosi nga i lalame!”
25 Ngauralo, Samuele a vhudza vhathu zwine mahosi a ḓo zwi ṱoḓa khavho,+ a zwi ṅwala kha bugu, a i vhea phanḓa ha Yehova. Samuele a vhofholola vhathu vha ṱuwa, muṅwe na muṅwe a ya nḓuni yawe.
26 Saulo na ene a ya hayani ha hawe ngei Gibia, a tshi khou fhelekedzwa nga vhahali vhe Yehova a ṱuṱuwedza mbilu dzavho.
27 Fhedzi vhaṅwe vhanna vha sa ḓivhalei vha ri: “U ḓo ri tshidza hani onoyu?”+ Ngauralo, vha mu nyadza vha si mu ṋee tshifhiwa na tshithihi.+ Fhedzi Saulo a si ambe tshithu nga hazwo.*
Ṱhaluso dzi re magumoni a siaṱari
^ Thevhedz., “O vha a tshi tou nga muthu a sa koni u amba.”
