Bugu Ya U Thoma Ya Samuele 9:1-27
-
Samuele u ṱangana na Saulo (1-27)
9 Ho vha hu na muṅwe munna wa lushaka lwa Benyamini we a vha a tshi pfi Kishi,+ murwa wa Abiele, murwa wa Tseroro, murwa wa Bekoratha, murwa wa Aphia wa Mubenyamini,+ munna we a vha o pfuma vhukuma.
2 O vha e na murwa ane a pfi Saulo+ we a vha e muswa, o naka, hu si na munna o nakaho u mu fhira kha Vhaisiraele, o lapfa u fhira vhathu vhoṱhe.
3 Musi donngi dza Kishi khotsi a Saulo dzi tshi xela, Kishi a amba na murwa wawe Saulo a ri: “Ndi khou humbela uri u dzhie muṅwe wa vhaḓinḓa ni ye u ṱoḓa donngi.”
4 Vha fhira nga dzinguni ḽa thavhani dza Efuraimi na shangoni ḽa Shalisha, fhedzi vha si dzi wane. Vha fhirela shangoni ḽa Shalima, fhedzi na henefho vha si dzi wane. Vha buḓekanya na shango ḽoṱhe ḽa Vhabenyamini, fhedzi na henefho vha si dzi wane.
5 Vha swika shangoni ḽa Tsufi, Saulo a amba na muḓinḓa wawe a ri: “Kha ri hume uri khotsi anga a sa ḓo thoma u vhilaela nga ha riṋe nṱhani ha u vhilaela nga ha donngi.”+
6 Fhedzi muḓinḓa a fhindula a ri: “Hu na mushumeli wa Mudzimu kha hoyu muḓi, munna ane a huliswa. Zwoṱhe zwine a zwi amba zwi a itea.+ Kha ri ye henengei zwino. Khamusi a nga ri vhudza nḓila ine ra tea u fara yone.”
7 Saulo a amba na muḓinḓa wawe a ri: “Arali ra ya kha onoyo munna, ri ḓo mu ṋea mini? A ri tshee na vhurotho mikhwamani yashu; a hu na tshine ra nga tshi ṋea mushumeli wa Mudzimu wa ngoho sa tshifhiwa. Ndi mini tshine ra vha natsho?”
8 Muḓinḓa a dovha a fhindula Saulo a ri: “Ndo fara tshipiḓa tshithihi kha zwiṋa tsha shekele* dza siḽiva. Ndi ḓo mu ṋea tshone, u ḓo ri vhudza nḓila ine ra tea u fara yone.”
9 (Zwifhingani zwa kale ngei Isiraele, muthu o vha a tshi amba hezwi musi a tshi ya u vhudzisa Mudzimu: “Iḓani ri ye ha muvhoni.”+ Ngauri muporofita wa tshino tshifhinga o vha a tshi vhidzwa muvhoni.)
10 Nga zwenezwo, Saulo a amba na muḓinḓa wawe a ri: “Ndi zwone. Kha ri ṱuwe.” Ngauralo, vha ṱuwa vha ya muḓini we mushumeli wa Mudzimu wa ngoho a vha e khawo.
11 Musi vha tshi khou gonya tshivhanga vha tshi khou ya muḓini, vha ṱangana na vhasidzana vha tshi khou ya u ka maḓi. Vha amba navho vha ri: “Naa afha fhethu hu na muvhoni?”+
12 Vha fhindula vha ri: “U hone. Khouḽa u phanḓa haṋu. Ṱavhanyani, ngauri ṋamusi o ḓa muḓini, ngauri ṋamusi vhathu vha khou ṋekedza tshiṱhavhelo+ fhethu ha vhurabeli.+
13 Musi ni tshi tou dzhena muḓini, ni ḓo mu wana a sa athu u gonya fhethu ha vhurabeli u itela u ḽa. Vhathu a vha nga ḽi a sa athu u swika, ngauri ndi ene ane a fhaṱutshedza tshiṱhavhelo. Musi zwenezwo zwo no itwa, vho rambiwaho vha nga ḽa. Gonyani zwino ni ḓo mu wana.”
14 Nga zwenezwo, vha gonya muḓini. Musi vha tshi swika vhukati ha muḓi, vha ṱangana na Samuele a tshi khou gonya fhethu ha vhurabeli.
15 Nga tsha mulovha tsha hone Saulo a sa athu u swika, Yehova o vha o no vhudza Samuele a ri:
16 “Matshelo nga tshenetshi tshifhinga ndi ḓo ruma munna a bvaho shangoni ḽa Vhabenyamini.+ U mu ḓodze uri a vhe murangaphanḓa wa vhathu vha Isiraele;+ u ḓo tshidza vhathu vhanga zwanḓani zwa Vhafilisita. Ndo vhona u tambula ha vhathu vhanga, ngauri tshililo tshavho tsho swika kha nṋe.”+
17 Musi Samuele a tshi vhona Saulo, Yehova a mu vhudza uri: “Khoyu munna we nda u vhudza nga hae nda ri: ‘Hoyu ndi ene ane a ḓo vhusa vhathu vhanga.’”+
18 Ngauralo, Saulo a ṱangana na Samuele vhukati ha khoro, a ri: “Ndi khou humbela uri u mmbudze uri nnḓu ya muvhoni i ngafhi?”
19 Samuele a fhindula Saulo a ri: “Ndi nṋe muvhoni. Nthangeni phanḓa ni ye fhethu ha vhurabeli, inwi vhanna ni ḓo ḽa na nṋe ṋamusi.+ Ni ḓo ṱuwa nga matsheloni, ndi ḓo ni vhudza zwoṱhe zwine na ṱoḓa u zwi ḓivha.*
20 Dziḽa donngi dze dza xela maḓuvha mararu o fhiraho,+ u songo vhilaela nga hadzo ngauri dzo wanala. Naa zwithu zwoṱhe zwavhuḓi zwa Isiraele ndi zwa nnyi? Naa a si zwau na vha nnḓu yoṱhe ya khotsi au?”+
21 Saulo a fhindula a ri: “Naa a thi Mubenyamini wa lushaka luṱukusa kha tshaka dza Isiraele,+ muṱa wahashu a si u nyadzeaho kha miṱa yoṱhe ya lushaka lwa Benyamini? Ndi ngani wo amba na nṋe nga yeneyo nḓila?”
22 Ngauralo, Samuele a isa Saulo na muḓinḓa wawe kamarani ya u ḽela a vha dzudza fhethu ha vhaḓivhalea vho rambiwaho; ho vha hu na vhanna vha ṱoḓaho u vha 30.
23 Nga murahu Samuele a amba na mubiki a ri: “Ḓisa iḽa ṋama ye nda u ṋea, nda u vhudza uri: ‘I vhetshele thungo.’”
24 Nga zwenezwo, mubiki a ḓisa tshizwa na zwe zwa vha zwi khatsho, a zwi vhea phanḓa ha Saulo. Samuele a ri: “Ngei ṋama ye wa vha wo vhetshelwa yone thungo. I ḽa ngauri vho vha vho i vhetshela iwe u itela tshenetshi tshiitea uri u ḽe na vho rambiwaho.” Saulo a ḽa na Samuele nga ḽeneḽo ḓuvha.
25 Nga zwenezwo, vha tsa fhethu ha vhurabeli+ vha ya muḓini, a bvela phanḓa a tshi amba na Saulo vhe kha ṱhanga.
26 Vha vuwa nga maḓautsha, Samuele a vhidzela Saulo nṱha ha ṱhanga a ri: “Ḓilugise uri u kone u ṱuwa.” Nga zwenezwo, Saulo a ḓilugisa a bvela nnḓa na Samuele.
27 Musi vha tshi khou tsela mikanoni ya muḓi, Samuele a amba na Saulo a ri: “Vhudza muḓinḓa+ wau uri a fhirele phanḓa,” ngauralo a fhirela phanḓa. “Fhedzi iwe ima henefha, uri ndi kone u u vhudza zwe Mudzimu a amba.”
Ṱhaluso dzi re magumoni a siaṱari
^ Shekele nthihi i lemela gramu dza 11,4. Sedzani Ṱhume. B14.
^ Thevhedz., “zwoṱhe zwi re mbiluni dzaṋu.”
