Vhurifhi Ha Vhuvhili Ha Petro 3:1-18
3 Vhafunwa, hovhu ndi vhurifhi ha vhuvhili vhune nda khou ni ṅwalela, u fana na zwe nda zwi ṅwala kha ha u thoma, ndi khou ni humbudza zwine zwa ḓo ni thusa uri ni vhe na muhumbulo wo tshaho,+
2 uri ni humbule zwe zwa ambiwa kale nga vhaporofita vhakhethwa na zwe zwa funzwa nga Murena ane a ri tshidza. No funzwa zwenezwi hu tshi shumiswa vhaapostola.
3 Tsha u thoma, ḓivhani uri maḓuvhani a vhufhelo hu ḓo vha na vhane vha ḓo ni goḓa, vha tshi langwa nga nyemulo dzavho,+
4 vha ḓo ri: “Zwe zwa fhulufhedziswa nga ha u vha hone hawe zwi ngafhi?+ U bva tshee vhomakhulukuku washu vha fa, zwithu zwoṱhe zwi kha ḓi bvela phanḓa nga nḓila i fanaho na musi zwithu zwi tshi thoma u sikwa.”+
5 Ngauri a vha ṱoḓi u humbula uri kale ipfi ḽa Mudzimu ḽo ita uri hu vhe na ḽiṱaḓulu na ḽifhasi ḽo bvaho kha maḓi;+
6 na uri shango ḽa tshenetsho tshifhinga ḽo fheliswa musi ḽi tshi ḓala nga maḓi.+
7 Ḽeneḽo ipfi ḽi ḓo ita uri ḽiṱaḓulu na ḽifhasi zwi re hone zwino zwi fhiswe nga mulilo, zwo lindela ḓuvha ḽa khaṱhulo hu tshi fheliswa vhathu vha sa ofhi Mudzimu.+
8 Fhedzi vhafunwa, ni songo hangwa uri ḓuvha ḽithihi kha Yehova* ndi miṅwaha ya tshigidi, miṅwaha ya tshigidi ndi ḓuvha ḽithihi.+
9 Yehova* ha lengi u ita zwe a fhulufhedzisa,+ samusi vhaṅwe vha tshi vhona u nga u a lenga, fhedzi ha ni fheleli mbilu ngauri ha ṱoḓi na muthihi a tshi fheliswa, fhedzi u tama vhoṱhe vha tshi rembuluwa.+
10 Ḓuvha ḽa Yehova*+ ḽi ḓo ḓa sa mbava,+ hu ḓo pfala mubvumo muhulu musi ḽiṱaḓulu ḽi tshi lovha,+ fhedzi zwithu zwi re ṱaḓulu na kha ḽifhasi zwi ḓo swa zwa ṋoka, ḽifhasi na mishumo i re khaḽo zwi ḓo bviselwa khagala.+
11 Samusi zwenezwi zwithu zwoṱhe zwi tshi ḓo ṋokiswa. Ni humbulisise nga ha nḓila ine na fanela u ḓifara ngayo na zwine na tea u zwi ita. Ni vhe vhakhethwa, ni ite mishumo ine ya sumbedza uri no ḓikumedzela kha Mudzimu,
12 musi no lindela na u dzula ni tshi humbula u vha hone ha ḓuvha ḽa Yehova,*+ nga tshifhinga tshine ḽiṱaḓulu ḽa ḓo fhiswa+ nga mulilo na zwithu zwi re ṱaḓulu na kha ḽifhasi zwa ṋokiswa nga mulilo u fhisaho zwihulu!
13 Fhedzi hu na ḽiṱaḓulu ḽiswa na ḽifhasi ḽiswa zwe ra zwi lindela u ya nga zwe a zwi fhulufhedzisa,+ henefho hu ḓo itwa zwo lugaho fhedzi.+
14 Vhafunwa, samusi no lindela zwenezwi zwithu, itani zwine na nga kona uri mafheleloni ni wanwe ni si na madondo, ni sa solei, ni na mulalo.+
15 Zwiṅwe hafhu, ni dzhie u sa fhela mbilu ha Murena washu sa u tshidzwa, samusi na Paulo wahashu a funwaho o ni ṅwalela a tshi shumisa vhuṱali he a ṋewa,+
16 musi a tshi amba nga ha zwenezwi zwithu samusi a tshi ita nga u ralo kha marifhi awe oṱhe. Fhedzi zwiṅwe khao zwi a konḓa u zwi pfesesa, vhathu vha sa ḓivhi* na vha si na lutendo lwo khwaṱhaho* vha khou shanda zwenezwi zwithu, samusi vha tshi shanda Maṅwalo oṱhe, zwi ḓo ita uri vha fheliswe.
17 Vhafunwa, samusi ni na yeneyi nḓivho, ni ṱhogomele uri ni si xedzwe navho nga vhutshinyi ha vhathu vha si na mulayo, zwa ita uri ni si ime no khwaṱha.+
18 Fhedzi bvelani phanḓa ni tshi wana nga ho engedzeaho vhuthu vhuhulu na nḓivho ya Murena na Mutshidzi washu Yesu Kristo. Nga a vhe na vhugala zwino na nga hu sa fheli. Amen.
