Dotoronomio 11:1-32
11 “U fune Yehova Mudzimu wau,+ u dzule u tshi ita zwe wa mu fhulufhedzisa, u tevhedze maitele awe, mahaṱulele awe na ndaela dzawe.
2 Ni a zwi ḓivha uri ṋamusi ndi khou amba na inwi, a thi khou amba na vhana vhaṋu vhane vha si ḓivhe kana vhe vha si vhone ndayo ya Yehova Mudzimu waṋu,+ vhuhulu hawe+ na tshanḓa tshawe tsha maanḓa.+
3 A vho ngo vhona vhuṱolo hawe na mishumo yawe ye a i ita Egipita kha Farao khosi ya Egipita, na kha shango ḽawe ḽoṱhe;+
4 kana zwe a ita kha mmbi dza Egipita, kha bere dza Farao na kha gariki dzawe dza nndwa, dze dza kumbiwa nga maḓi a Lwanzhe Lutswuku musi mmbi i tshi khou vha pandamedza, Yehova a i fhelisa tshoṱhe.+
5 A vho ngo vhona zwe a ni ita ngei sogani u vhuya u swika afha fhethu,
6 kana zwe a ita Dathani na Abiramu, vharwa vha Eliaba murwa wa Rubeni, musi ḽifhasi ḽi tshi vulea ḽa vha mila na vha miṱa yavho yoṱhe, madennde avho, na muṅwe na muṅwe we a vha tevhela, Vhaisiraele vhoṱhe vha tshi zwi vhona.+
7 No vhona yeneyi mishumo mihulu yoṱhe ye Yehova a i ita.
8 “Ni tevhedze ndaela dzoṱhe dzine nda khou ni ṋea dzone ṋamusi, uri ni vhe na maanḓa ni wetshele kha ḽeneḽo shango ni ḽi dzhie,
9 uri ni lalame+ shangoni ḽe Yehova a anela vhomakhulukuku waṋu na vhana* vhavho,+ shango ḽi elelaho mafhi na mutoli.+
10 “Ngauri shango ḽine na khou ya u ḽi dzhia a ḽi fani na shango ḽa Egipita ḽine na khou bva khaḽo, he na vha ni tshi zwala mbeu na shuma vhukuma u itela u sheledza tsimu nga mulenzhe waṋu* nga nḓila i fanaho na musi ni tshi sheledza tsimu ya miroho.
11 Fhedzi shango ḽine na khou wetshela khaḽo uri ni ḽi dzhie ndi shango ḽi re na dzithavha na magovha.+ Ḽi sheledzwa nga maḓi a mvula a bvaho ṱaḓulu;+
12 ndi shango ḽine Yehova Mudzimu waṋu a ḽi ṱhogomela. Maṱo a Yehova Mudzimu waṋu a dzula o ḽi lavhelesa, u bva ṅwaha u tshi thoma u swika u tshi fhela.
13 “Arali na thetshelesa nga vhuronwane ndaela dzine nda khou ni ṋea dzone ṋamusi na funa Yehova Mudzimu waṋu na mu shumela nga mbilu yaṋu yoṱhe na nga zwoṱhe zwine na vha zwone,+
14 ndi ḓo ita uri mvula i ne shangoni ḽaṋu nga tshifhinga tsho vhewaho, mvula ya tshifhefho na mvula ya luṱavula, ni ḓo kuvhanganya thoro dzaṋu, waini yaṋu ntswa na mapfura aṋu.+
15 Ndi ḓo medza hatsi masimuni aṋu u itela zwifuwo zwaṋu, ni ḓo ḽa na fura.+
16 Ni ṱhogomele uri mbilu dzaṋu dzi si ungeledzwe na pambuwa na shumela miṅwe midzimu na i gwadamela.+
17 Zwa sa ralo, Yehova u ḓo ni sinyutshela a vala ḽiṱaḓulu uri mvula i si tsha na,+ mavu a si tsha medza zwibveledzwa zwao na ṱavhanya na fa shangoni ḽeneḽo ḽavhuḓi ḽine Yehova a khou ni ṋea ḽone.+
18 “Haya maipfi anga a tea u dzula mbiluni dzaṋu na mihumbuloni yaṋu ni a vhofhelele kha zwanḓa zwaṋu sa tshihumbudzi, a vhe luswayo lune na lu vhofhelela kha phanḓa dzaṋu.+
19 Ni dovhe ni a funze vhana vhaṋu, ni a ambe musi no dzula nḓuni dzaṋu, musi ni tshi khou tshimbila nḓilani, musi ni tshi ya u eḓela na musi ni tshi vuwa.+
20 Ni a ṅwale kha fureme dza nnḓu dzaṋu na kha khoro dzaṋu,
21 uri inwi na vhana vhaṋu ni lalame+ shangoni ḽe Yehova a anela vhomakhulukuku waṋu,+ tenda ḽiṱaḓulu ḽi tshi kha ḓi vha nṱha ha ḽifhasi.
22 “Arali na tevhedza yeneyi ndaela ine nda khou ni ṋea yone na ita zwine ya amba, uri ni fune Yehova Mudzimu waṋu+ na u tshimbila nḓilani dzawe dzoṱhe na u mu nambatela,+
23 Yehova u ḓo pandela dzenedzi tshaka dzoṱhe phanḓa haṋu,+ ni ḓo dzhia mashango a tshaka khulwane dzo ḓalaho u ni fhira.+
24 Hoṱhe hune na ḓo tshimbila hone hu ḓo vha haṋu.+ Mukano waṋu u ḓo bva sogani u swika Libanoni, u bva Mulamboni wa Yufuratha, u swika lwanzheni lwa thungo ya vhukovhela.*+
25 A hu na muthu ane a ḓo imedzana na inwi.+ Yehova Mudzimu waṋu u ḓo ita uri vhathu vha ḽeneḽo shango ḽine na khou tshimbila khaḽo vha ni ofhe,+ sa zwe a ni fhulufhedzisa.
26 “Vhonani ṋamusi ndi vhea phaṱhutshedzo na samba phanḓa haṋu:+
27 Ni ḓo fhaṱutshedzwa arali na thetshelesa ndaela dza Yehova Mudzimu waṋu dzine nda khou ni ṋea dzone ṋamusi,+
28 na samba arali na sa thetshelesa ndaela dza Yehova Mudzimu waṋu,+ na pambuwa kha nḓila ine nda khou ni laya uri ni i fare ṋamusi na tevhela miṅwe midzimu ine ni si i ḓivhe.
29 “Musi Yehova Mudzimu waṋu a tshi ni dzhenisa shangoni ḽine na ḓo dzula khaḽo, ni fhaṱutshedze vhathu ni Thavhani ya Garitsimi na u vha sema ni Thavhani ya Ebali.+
30 Naa dzenedzo thavha a dzi ho seli ha Yorodane thungo ya vhukovhela, shangoni ḽa Vhakanana vhane vha dzula Araba, u livhana na Giligala, thungo ha miri mihulu ya More?+
31 Ngauri ni khou wela Yorodane hune na ḓo dzhena na dzhia shango ḽine Yehova Mudzimu waṋu a khou ni ṋea ḽone.+ Musi ni tshi dzhia ḽeneḽo shango ni dzule khaḽo,
32 ni ite vhungoho ha uri ni tevhedze maitele oṱhe na mahaṱulele zwine nda khou ni ṋea zwone ṋamusi.+
Ṱhaluso dzi re magumoni a siaṱari
^ Thevhedz., “mbeu.”
^ Kana “u sheledza nga mulenzhe waṋu,” zwine zwa amba muṅwe mufuda wa u gwedzha nga mulenzhe, hu sa londwi uri ndi vhili ḽa maḓi kana u bwa migero ya maḓi na u i vula.
^ Ndi Lwanzhe Luhulu lwa Meditherenieni.
