Ekisoda 33:1-23
33 Yehova a dovha a amba na Mushe a ri: “Ṱuwa hafha fhethu na vhathu vhe wa vha ranga phanḓa wa vha bvisa shangoni ḽa Egipita. Tshimbila u ye shangoni ḽe nda anela Abrahamu, Isaka na Yakobo nda ri: ‘Ndi ḓo ḽi ṋea vhana* vhau.’+
2 Ndi ḓo ruma muruṅwa uri a ni range phanḓa,+ ndi ḓo pandela Vhakanana, Vhaamori, Vhahethe, Vhapheresi, Vhahevi na Vhayebusi.+
3 Tshimbilani ni ye shangoni ḽi elelaho mafhi na mutoli.+ Fhedzi nṋe a thi nga ṱuwi na inwi, ngauri ni na tshikhuna,*+ ndi nga ni fhelisa nḓilani.”+
4 Musi vhathu vha tshi pfa eneo maipfi a vhaisaho, vha thoma u ṱungufhala, a hu na na muthihi wavho we a ambara zwithu zwawe zwa madzanga.
5 Ngauralo, Yehova a amba na Mushe a ri: “Vhudza Vhaisiraele uri: ‘Ni na tshikhuna.+ Hu si kale ndi nga ḓa vhukati haṋu nda ni fhelisa.+ Bvulani zwithu zwaṋu zwa madzanga, musi ndi tshi kha ḓi humbula zwine nda ḓo ni ita.’”
6 Vhaisiraele vha litsha u ambara* zwithu zwavho zwa madzanga ngei Thavhani ya Horebe, a vho ngo tsha dovha vha zwi ambara.
7 Mushe a dzhia dennde ḽawe a ḽi atha nga nnḓa ha madennde, kulenyana na madennde, a ḽi vhidza uri ndi dennde ḽa muṱangano. Muṅwe na muṅwe we a vha a tshi ṱoḓa u vhudzisa Yehova+ o vha a tshi ya denndeni ḽa muṱangano, ḽe ḽa vha ḽi nnḓa ha madennde.
8 Musi Mushe a tshi bvela nnḓa ha dennde, vhathu vhoṱhe vho vha vha tshi takuwa vha ima muṋangoni wa madennde avho, vho vha vha tshi lavhelesa Mushe u vhuya u swika a tshi dzhena denndeni.
9 Musi Mushe a tshi dzhena denndeni, gole+ ḽo vha ḽi tshi tsela fhasi, ḽa ima muṋangoni wa dennde musi Mudzimu a tshi khou amba na Mushe.+
10 Musi vhathu vhoṱhe vha tshi vhona gole muṋangoni wa dennde, vhoṱhe vha takuwa vha losha muṋangoni wa dennde ḽawe.
11 Yehova a amba na Mushe vho livhana zwifhaṱuwo,+ u fana na musi muthu a tshi khou amba na muṅwe muthu. Musi a tshi vhuyelela madenndeni, Yoshua+ murwa wa Nunu, ane a vha muḓinḓa wawe na mushumeli wawe,+ o vha a sa ṱuwi henefho denndeni.
12 Mushe a amba na Yehova a ri: “Wo mmbudza uri: ‘Ranga phanḓa avha vhathu,’ fhedzi a wo ngo mmbudza ane nda fanela u ṱuwa nae. Zwiṅwe hafhu, wo ri: ‘Ndi ḓivha dzina ḽau,* ndi a u takalela.’
13 Arali u tshi ntakalela, ndi humbela uri u ite uri ndi ḓivhe nḓila dzau,+ uri ndi u ḓivhe u bvele phanḓa u tshi ntakalela. U humbule uri ulu lushaka ndi vhathu vhau.”+
14 Mudzimu a ri: “Ndi ḓo ṱuwa na iwe,+ ndi ḓo u ṋea mulalo.”+
15 Mushe a ri: “Arali iwe u sa ṱuwi na riṋe, u songo ita uri ri ṱuwe fhano.
16 Zwi ḓo vhonala hani uri u a ntakalela, nṋe na vhathu vhau? Naa a si nga u ṱuwa na riṋe+ uri nṋe na vhathu vhau ri vhonale ro fhambana na vhaṅwe vhathu vhoṱhe vha re kha ḽifhasi?”+
17 Yehova a amba na Mushe a ri: “Ndi ḓo ita zwenezwi zwe wa nkhumbela zwone ngauri ndi a u takalela, ndi ḓivha dzina ḽau.”
18 Mushe a ri: “Ndi humbela uri u ntsumbedze vhugala hau.”
19 Fhedzi Mudzimu a ri: “Ndi ḓo ita uri u vhone vhuthu hanga hoṱhe, ndi ḓo u ḓivhadza uri dzina ḽanga ndi Yehova;+ ndi ḓo takalela ane nda ṱoḓa u mu takalela, nda khathutshela ane nda ṱoḓa u mu khathutshela.”+
20 Fhedzi a dovha a ri: “U nga si kone u vhona tshifhaṱuwo tshanga, ngauri a hu na muthu ane a nga mmbona a tshila.”
21 Yehova a dovha a ri: “Hafha tsini hanga hu na fhethu. Ima nṱha ha tombo.
22 Musi vhugala hanga vhu tshi fhira, ndi ḓo u vhea bakoni ḽa tombo, ndi ḓo u tsireledza nga tshanḓa tshanga u swika ndi tshi fhira.
23 Nga murahu ndi ḓo bvisa tshanḓa tshanga, u ḓo vhona muṱana wanga. Fhedzi tshifhaṱuwo tshanga u nga si tshi vhone.”+
Ṱhaluso dzi re magumoni a siaṱari
^ Thevhedz., “mbeu.”
^ Thevhedz., “no omisa mitsinga.”
^ Thevhedz., “vha bvula.”
^ Kana “Ndo u nanga.”
