Evangeli Ya Luka 18:1-43
18 A vha vhudza tshifanyiso tshine tsha sumbedza uri ndi zwa ndeme u dzula vha tshi rabela vha sa neti,+
2 a ri: “Kha muṅwe muḓi ho vha hu na muhaṱuli we a vha a sa ofhi Mudzimu, a sa ṱhonifhi muthu.
3 Ho vha hu na tshilikadzi kha wonoyo muḓi, ye ya vha i tshi dzula i tshi ya khae i tshi ri, ‘Ita uri ndi haṱulwe nga nḓila yo teaho kha swina ḽanga.’
4 A fhedza tshifhinga a sa ṱoḓi u thusa yeneyo tshilikadzi, fhedzi nga murahu a elekanya a ri, ‘Naho ndi sa ofhi Mudzimu kana u ṱhonifha muthu,
5 fhedzi ngauri yeneyi tshilikadzi i khou ndina, ndi ḓo ita uri i haṱulwe nga nḓila yo teaho uri i si dzule i tshi ḓa i tshi nthemisa ṱhoho nga u nkhumbela.’”+
6 Nga zwenezwo, Murena a ri: “Naa no zwi pfa zwe muhaṱuli a songo lugaho a zwi amba?
7 Naa Mudzimu a nga si ite uri vhanangiwa vhawe vha mu lilelaho vhusiku na masiari+ vha haṱulwe nga nḓila yo teaho, a sa vha fheleli mbilu?+
8 Ndi a ni vhudza ndi ri, u ḓo ita uri vha haṱulwe nga nḓila yo teaho nga u ṱavhanya. Hone musi Murwa muthu a tshi vhuya, naa u ḓo wana hu na vhathu vha re na lutendo ḽifhasini?”
9 Ho vha hu na vhaṅwe vhane vha ḓifhulufhela uri vho luga, vha tshi dzhia vhaṅwe vhe si tshithu. A vha vhudza tshifanyiso a ri:
10 “Ho vha hu na vhanna vhavhili vhe vha ya thembeleni u rabela, muṅwe o vha e Mufarisei muṅwe e muthelisi.
11 Mufarisei a ima a rabela mbiluni a ri, ‘Mudzimu, ndi livhuwa uri a thi fani na vhaṅwe vhathu vha mavemu, vha songo lugaho, phombwe kana hoyu muthelisi.
12 Ndi ḓidzima zwiḽiwa luvhili nga vhege; ndi bvisa tshafumi kha zwoṱhe zwine nda zwi wana.’+
13 Fhedzi muthelisi o vha o ima kule, a sa ṱoḓi na u lavhelesa ṱaḓulu, a tshi khou ḓisola,* a tshi ri, ‘Mudzimu, nkhathutshele, ndi muitazwivhi.’+
14 Ndi a ni vhudza ndi ri, musi onoyo munna a tshi humela hayani, o vha o luga phanḓa ha Mudzimu u fhira Mufarisei.+ Ngauri ane a ḓihudza u ḓo ṱukufhadzwa, ane a ḓiṱukufhadza u ḓo huliswa.”+
15 Vhathu vha mu ḓisela vhana vhavho uri a vha vhee zwanḓa,* fhedzi musi vhafunziwa vhawe vha tshi zwi vhona, vha vha kaidza.+
16 Fhedzi Yesu a amba uri vhana vha ḓiswe khae, a ri: “Litshani vhana vha ḓe kha nṋe, ni songo vha thivhela. Ngauri Muvhuso wa Mudzimu ndi wa vhane vha nga vhenevha.+
17 Ngoho ndi a ni vhudza ndi ri, ane a si ṱanganedze Muvhuso wa Mudzimu u fana na ṅwana, a nga si dzhene khawo na luthihi.”+
18 Muṅwe wa vhavhusi a mu vhudzisa a ri: “Mufunzi wavhuḓi, ndi ite mini uri ndi wane vhutshilo vhu sa fheli?”+
19 Yesu a ri: “Ndi ngani u tshi ri ndi wavhuḓi? Ndi Mudzimu fhedzi ane a vha wavhuḓi.+
20 Milayo u a i ḓivha ine ya ri: ‘U songo vha phombwe,+ u songo vhulaya,+ u songo tswa,+ u songo amba vhuṱanzi ha u zwifha,+ hulisa khotsi au na mme au.’”+
21 Onoyo munna a ri: “Hezwo zwoṱhe ndo zwi ita u bva vhuṱukuni.”
22 Musi Yesu a tshi pfa zwenezwo, a amba nae a ri, “Hu tshee na tshiṅwe tshithu tshine wa fanela u tshi ita: Rengisa zwoṱhe zwine wa vha nazwo u ṋee vhashai tshelede, ndi hone u tshi ḓo vha na lupfumo ngei ṱaḓulu; u ḓe u ntevhele.”+
23 Musi a tshi pfa zwenezwo, a ṱungufhala zwihulu, ngauri o vha o pfumesa.+
24 Yesu a mu sedza a ri: “Zwi ḓo konḓa vhukuma uri vho pfumaho vha dzhene Muvhusoni wa Mudzimu!+
25 Zwi ḓo konḓela mupfumi u dzhena Muvhusoni wa Mudzimu, zwi ḓo tou nga gamela i tshi lingedza u dzhena nga lubuli lwa ṋeleṱe.”+
26 Vhe vha zwi pfa vha ri: “Ndi nnyi ane a nga tshidzwa?”+
27 Yesu a ri: “Zwithu zwi sa konadzei kha vhathu zwi a konadzea kha Mudzimu.”+
28 Fhedzi Petro a ri: “Ro sia zwithu zwashu ra u tevhela.”+
29 Yesu a ri: “Ngoho ndi a ni vhudza ndi ri, ane a sia nnḓu, mufumakadzi, vharathu kana vhakomana, vhabebi kana vhana a tshi itela Muvhuso wa Mudzimu+
30 u ḓo wana zwinzhi kha tshino tshifhinga. U ḓo wana na vhutshilo vhu sa fheli shangoni* ḽiswa.”+
31 A vhidzela thungo vhaapostola vha 12 a amba navho a ri: “Ri khou gonya Yerusalema, zwoṱhe zwe zwa ṅwaliwa nga vhaporofita nga ha Murwa muthu zwi ḓo itea.+
32 Vha ḓo mu kumedzela kha vhathu vha dzitshaka,+ vha mu goḓa,+ vha mu tambudza na u mu pfela nga mare.+
33 Musi vho no mu rwa, vha ḓo mu vhulaya;+ fhedzi u ḓo vuswa nga ḓuvha ḽa vhuraru.”+
34 Naho zwo ralo, a vho ngo pfesesa zwe a vha a tshi khou zwi amba, ngauri zwo vha zwo vha dzumbama, vha si pfesese uri Yesu o vha a tshi khou amba nga ha mini.
35 Musi Yesu a tshi swika tsini na Yeriko, a ṱangana na muṅwe munna we a vha a sa vhoni o dzula tsini na nḓila a tshi khou humbela.+
36 Musi a tshi pfa gogo ḽi tshi khou fhira henefho, a vhudzisa uri hu khou itea mini.
37 Vha mu vhudza uri: “Yesu wa Nazaretha u khou fhira!”
38 Ene a vhidzelela a ri: “Murena, Murwa wa Davida, nkhathutshele!”
39 Vha re phanḓa ha ḽeneḽo gogo vha mu kaidza, vha ri a fhumule, fhedzi a tou ṋaṋa u vhidzelela a ri: “Murwa wa Davida, nkhathutshele!”
40 Yesu a ima a amba uri vha mu ḓisele onoyo munna. Musi o no sendela tsini, Yesu a mu vhudzisa a ri:
41 “Ndi u itele mini?” Ene a ri: “Murena, ita uri ndi vhone.”
42 Yesu a ri: “Dovha u vhone; lutendo lwau lwo u fhodza.”+
43 Nga u ṱavhanya a thoma u vhona, a mu tevhela a tshi khou renda Mudzimu.+ Vhathu vhoṱhe vha tshi vhona zwenezwo, vha renda Mudzimu.+
Ṱhaluso dzi re magumoni a siaṱari
^ Thevhedz., “a tshi khou ḓirwa khana.”
^ Kana “uri a vha fhaṱutshedze.”
^ Sedzani Mutevhe Wa Ṱhalutshedzo Ya Maipfi.
