Evangeli Ya Marko 9:1-50
-
Yesu u a shanduka (1-13)
-
Hu fhodzwa mutukana a re na dimoni (14-29)
-
Zwithu zwoṱhe zwi a konadzea kha ane a vha na lutendo (23)
-
-
Hu dovha ha porofitiwa nga ha lufu lwa Yesu (30-32)
-
Vhafunziwa vha ṱaṱa khani nga uri muhulwane khavho ndi nnyi (33-37)
-
A sa lwi na riṋe u ima na riṋe (38-41)
-
Zwikhukhulisi (42-48)
-
“Ivhani na muṋo” (49, 50)
9 Yesu a dovha a amba navho a ri: “Ngoho ndi a ni vhudza uri, hu na vhaṅwe vho imaho henefha vhane vha sa ḓo fa vha songo thoma vha vhona Muvhuso wa Mudzimu u tshi khou vhusa.”+
2 Nga murahu ha maḓuvha a rathi, Yesu a ṱuwa na Petro, Yakobo na Yohane, a gonya navho thavha ndapfu. A shanduka vha tshi zwi vhona;+
3 zwiambaro zwawe zwa penya, zwa tshena lune ha si vhuye ha vha na muthu na muthihi fhano ḽifhasini ane a nga kona u zwi kuvha zwa tshena nga u ralo.
4 Zwiṅwe hafhu, vha vhona Elia na Mushe vha tshi khou amba na Yesu.
5 Petro a amba na Yesu a ri: “Rabi, ndi zwavhuḓi ri fhano. Kha ri athe madennde mararu, ḽiṅwe ḽi ḓo vha ḽau, ḽiṅwe ḽa vha ḽa Mushe, ḽiṅwe ḽa vha ḽa Elia.”
6 Zwi re zwone ndi uri Petro o vha a sa ḓivhi uri a ite mini, ngauri vho vha vho tshuwa zwihulu.
7 Ha ḓa gole, ḽa vha tibedza, ha pfala ipfi+ ḽi tshi bva kha gole, ḽa ri: “Hoyu ndi Murwa wanga a funwaho.+ Ni mu thetshelese.”+
8 Nga u ṱavhanya musi vha tshi lavhelesa vha vhona Yesu, vhaḽa vhaṅwe vho vha vhe si tsheeho.
9 Musi vha tshi khou tsa thavhani, Yesu a vha laya uri vha si vhudze muthu zwe vha zwi vhona+ u swikela Murwa muthu a tshi vuswa vhafuni.+
10 Vha dzhiela nṱha zwe a zwi amba, fhedzi vha amba nga tshavho nga ha zwine u vuwa hawe vhafuni zwa amba zwone.
11 Vha mu vhudzisa vha ri: “Ndi ngani vhamaṅwalo vha tshi ri hu fanela u ḓa Elia+ u thoma?”+
12 A vha fhindula a ri: “Ndi ngoho uri Elia u ḓo ḓa u thoma, a vusulusa zwithu zwoṱhe,+ fhedzi ndi ngani maṅwalo a tshi amba uri Murwa muthu u fanela u tambudzwa+ zwihulu na u nyadziwa?+
13 Fhedzi ndi a ni vhudza uri Elia o ḓa,+ vha mu ita zwine vha funa, samusi zwo ṅwaliwa nga hae.”+
14 Musi vha tshi swika kha vhaṅwe vhafunziwa, vha vhona vho kuvhanganelwa nga gogo, vhamaṅwalo vha tshi khou ṱaṱa khani navho.+
15 Musi gogo ḽi tshi tou vhona Yesu, ḽa mangala, ḽa mu gidimela uri ḽi mu lumelise.
16 A vha vhudzisa a ri: “Ni khou ṱaṱa khani ya mini?”
17 Muṅwe we a vha e vhukati ha gogo a mu fhindula a ri: “Mufunzi, ndo ḓisa murwa wanga ngauri u na dimoni ḽine ḽa ita uri a si kone u amba.+
18 Hoṱhe hune ḽa mu fara e hone, ḽi mu wisela fhasi, a bvisa bulo mulomoni, a shengekanya maṋo a fhelelwa nga nungo. Ndo humbela vhafunziwa vhau uri vha ḽi pandele, fhedzi vha kundelwa.”
19 Ene a ri: “Inwi vha murafho u si na lutendo,+ ndi ḓo dzula na inwi u swika lini? Ndi ḓo ni konḓelela u swika lini? Mu ḓiseni ngeno kha nṋe.”+
20 Vha ḓisa onoyo mutukana khae. Musi dimoni ḽi tshi vhona Yesu, ḽa wisela mutukana fhasi, ḽa ita uri a rahe-rahe.* A vhumbuluwa a tshi bvisa bulo mulomoni.
21 Yesu a vhudzisa khotsi a onoyo mutukana a ri: “Zwo mu thoma lini?” Khotsi awe a ri: “U bva vhuṱukuni,
22 ḽi dzula ḽi tshi mu posa muliloni na maḓini uri ḽi mu vhulaye. Arali u tshi nga kona u mu fhodza, ri pfele vhuṱungu u ri thuse.”
23 Yesu a amba nae a ri: “U amba mini u tshi ri, ‘Arali u tshi nga kona’? Zwithu zwoṱhe zwi a konadzea kha ane a vha na lutendo.”+
24 Nga u ṱavhanya khotsi a ṅwana a ambela nṱha a ri: “Ndi na lutendo! Nthuse uri ndi vhe na lutendo lwo khwaṱhaho!”+
25 Musi Yesu a tshi vhona uri gogo ḽi khou vha gidimela, a kaidza ḽeneḽo dimoni, a ri: “Iwe dimoni ḽine ḽa ita uri ṅwana a si kone u amba na u pfa, ndi a u vhudza uri, ibva khae, u songo tsha dovha wa dzhena khae.”+
26 Musi ḽo no ṱavha mukosi na u ita uri a rahe-rahe,* ḽa bva khae, zwa nga ṅwana o fa, vhanzhi vha vhuya vha ri: “O lovha!”
27 Yesu a mu fara nga tshanḓa a mu vusa, a ima.
28 Musi o no dzhena nḓuni, vhafunziwa vhawe vha mu vhudzisa vhe nga tshavho vha ri: “Ndi ngani ri songo kona u ḽi pandela?”+
29 Ene a ri: “Wonoyu mufuda wa dimoni u pandelwa nga thabelo fhedzi.”
30 Vha ṱuwa henefho vha fhira nga Galilea, fhedzi o vha a sa ṱoḓi vhathu vha tshi zwi ḓivha.
31 Ngauri o vha a tshi khou funza vhafunziwa vhawe na u vha vhudza uri: “Murwa muthu u ḓo kumedzelwa zwanḓani zwa vhathu, vha ḓo mu vhulaya,+ fhedzi musi o no vhulawa, u ḓo vuwa nga murahu ha maḓuvha mararu.”+
32 Naho zwo ralo, a vho ngo pfesesa zwe a vha a tshi khou zwi amba, vha ofha na u mu vhudzisa.
33 Vha swika Kapernaume. Musi e nga ngomu nḓuni, a vha vhudzisa a ri: “No vha ni tshi khou ṱaṱa khani ya mini nḓilani?”+
34 Vha si fhindule, ngauri vho vha vha tshi khou ṱaṱa khani ya uri muhulwane khavho ndi nnyi.
35 Ngauralo, a dzula fhasi a vhidza vhaapostola vha 12 a amba navho a ri: “Ane a ṱoḓa u vha wa u thoma, u fanela u vha wa u fhedza kha vhoṱhe, a vhe mushumeli wa vhoṱhe.”+
36 A dzhia ṅwana, a mu imisa vhukati havho, a mu kuvhatedza, a amba navho a ri:
37 “Ane a ṱanganedza muṅwe wa avha vhana+ a tshi itela dzina ḽanga u ṱanganedza na nṋe, ane a nṱanganedza, ha ṱanganedzi nṋe fhedzi, u ṱanganedza na we a nthuma.”+
38 Yohane a ri: “Mufunzi, ro vhona muṅwe munna a tshi khou pandela madimoni a tshi shumisa dzina ḽau, ra lingedza u mu thivhela ngauri a si muṅwe washu.”+
39 Yesu a ri: “Ni songo lingedza u mu thivhela, ngauri a hu na ane a nga ita mishumo ya maanḓa a tshi shumisa dzina ḽanga ane a ḓo amba zwithu zwivhi nga nṋe.
40 Ngauri a sa lwi na riṋe u ima na riṋe.+
41 Ngauri ane a ni ṋea maḓi uri ni nwe ngauri ni vha Kristo,+ ngoho ndi a ni vhudza, u ḓo wana malamba awe.+
42 Fhedzi ane a khukhulisa muṅwe wa vhenevha vhana vhane vha vha na lutendo kha nṋe, ndi khwine a tshi vhofhelelwa guyo* mukuloni wawe a poswa lwanzheni.+
43 “Arali tshanḓa tshau tshi tshi u khakhisa, tshi tumule. Ndi khwine u wana vhutshilo wo holefhala nṱhani ha u poswa Gehena,* muliloni u sa dzimiho u na zwanḓa zwivhili.+
44 * ——
45 Arali mulenzhe wau u tshi u khakhisa, u tumule. Ndi khwine u wana vhutshilo wo holefhala nṱhani ha u poswa Gehena*+ u na milenzhe mivhili.
46 * ——
47 Arali ḽiṱo ḽau ḽi tshi u khakhisa, u ḽi laṱe kule.+ Ndi khwine u dzhena Muvhusoni wa Mudzimu u na ḽiṱo ḽithihi nṱhani ha u poswa Gehena* u na maṱo mavhili,+
48 henefho zwivhungu a zwi fi na mulilo a u dzimi.+
49 “Ngauri vhoṱhe vha fanela u shelwa muṋo une wa nga mulilo.+
50 Muṋo ndi wavhuḓi, fhedzi arali muṋo u si tsha pfala uri ndi muṋo, u nga itwa mini uri u dovhe u pfale?+ Ivhani na muṋo,+ ni dzule ni na mulalo nga tshaṋu.”+
Ṱhaluso dzi re magumoni a siaṱari
^ Kana “ḽa mu khwiḓukanya.”
^ Kana “na u mu khwiḓukanya.”
^ Kana “guyo ḽine ḽa moniswa nga donngi.”
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
^ Sedzani Mutevhe Wa Ṱhalutshedzo Ya Maipfi.
