Mirero 10:1-32
10 Mirero ya Salomo.+
Ṅwana wa vhuṱali u takadza khotsi awe,+Wa tsilu u ṱungufhadza mme awe.
2 Lupfumo lwo waniwaho nga vhuvhi a lu vhuyedzi,Fhedzi u luga ndi hone hune ha tshidza kha lufu.+
3 Yehova ha nga iti uri muvhuya a farwe nga nḓala,+Ha nga ṋei vhavhi zwine vha zwi tama.
4 Zwanḓa zwa mubva zwi ḓisa vhushai,+Zwa mushumi wa biko zwi a pfumisa.+
5 Ṅwana wa ṱhalukanyo u kuvhanganya zwiliṅwa tshilimo,Ane a ḓifara nga nḓila i shonisaho u vha o eḓela nga tshifhinga tsha khaṋo.+
6 Phaṱhutshedzo ndi dza muvhuya,+Fhedzi mulomo wa muvhi u dzumba khakhathi.
7 Dzina ḽavhuḓi* ḽa muvhuya ndi ḽone ḽine ḽa ḓo fhaṱutshedzwa,+Fhedzi ḽa muvhi ḽi ḓo lovha.+
8 Wa mbilu ya vhuṱali u ṱanganedza ndayo,*+Fhedzi ane a amba zwa vhutsilu u ḓo kandekanywa.+
9 Ane a tshimbila nga u fhulufhedzea u ḓo tshimbila o tsireledzea,+Fhedzi ane a kombamisa nḓila dzawe u ḓo waniwa.+
10 Ane a sunyedza nga vhukwila u ṱungufhadza vhaṅwe,+Ane a amba zwa vhutsilu u ḓo kandekanywa.+
11 Mulomo wa muvhuya ndi tshisima tsha vhutshilo,+Fhedzi mulomo wa muvhi u dzumba khakhathi.+
12 Vengo ndi ḽone ḽine ḽa vusa khani,Fhedzi lufuno lu fukedza vhutshinyi hoṱhe.+
13 Vhuṱali vhu wanala mulomoni wa a re na ṱhalukanyo,+Fhedzi ṱhamu ndi ya muṱana wa tsilu.+
14 Vho ṱalifhaho vha vhulunga nḓivho,+Fhedzi mulomo wa tsilu u a ḓitshinya.+
15 Lupfumo lwa mupfumi ndi muḓi wawe wo tsireledzwaho nga mbondo.
Vhashai vha tshinyadzwa nga vhushai havho.+
16 Mushumo wa muvhuya u isa vhutshiloni;Fhedzi khaṋo ya muvhi i isa tshivhini.+
17 Ane a ṱanganedza ndayo u isa vhaṅwe nḓilani ya vhutshilo,*Fhedzi ane a nyadza musi a tshi kaidzwa u xedza vhaṅwe.
18 Ane a dzumba vengo ḽawe u amba mazwifhi,+Ane a phaḓaladza zwitshele* ndi tsilu.
19 Ane a ambesa ha kundwi u tshinya,+Fhedzi ane a langa mulomo wawe o ṱalifha.+
20 Lulimi lwa muvhuya lu nga siḽiva yavhuḓi vhukuma,+Fhedzi mbilu ya muvhi a i vhuyedzi.
21 Mulomo wa muvhuya u ṱuṱuwedza* vhanzhi,+Fhedzi tsilu ḽi fa nga u shaya ṱhalukanyo.+
22 Phaṱhutshedzo dza Yehova dzi ita uri muthu a pfume,+Ha dzi engedzi* nga vhuṱungu.*
23 Musi tsilu ḽi tshi ḓidzhenisa kha vhuḓifari vhu shonisaho ḽi vhona zwi mutambo,Fhedzi vhuṱali ndi ha munna wa ṱhalukanyo.+
24 Zwine muvhi a zwi ofha zwi ḓo mu ḓela;Fhedzi zwine muvhuya a zwi tama u ḓo ṋewa.+
25 Musi ḓumbu ḽi tshi fhira, muvhi u ḓo vha a si tsheeho,+Fhedzi muvhuya u tou nga mutheo wa lini na lini.+
26 Zwine viniga ya ita kha maṋo na zwine vhutsi ha ita kha maṱo,Ndi zwine mubva a ita kha o mu rumaho.*
27 U ofha Yehova zwi engedza vhutshilo,+Fhedzi miṅwaha ya muvhi i ḓo fhungudzwa.+
28 Zwine vhavhuya vha zwi lavhelela zwi ḓisa dakalo,+Fhedzi zwine vhavhi vha zwi fhulufhela zwi ḓo lovha.+
29 Nḓila ya Yehova ndi vhushavhelo kha a si na mulandu,+Fhedzi i amba u fheliswa kha vhaitazwivhi.+
30 Muvhuya ha nga ḓo fheliswa,+Fhedzi vhavhi a vha tsha ḓo dzula kha ḽifhasi.+
31 Mulomo wa muvhuya u bveledza* vhuṱali,Fhedzi lulimi lu sa ḓivhalei lu ḓo tumulwa.
32 Mulomo wa muvhuya u ḓivha zwi takadzaho,Fhedzi wa muvhi a u ḓivhalei.
Ṱhaluso dzi re magumoni a siaṱari
^ Kana “Bvumo.”
^ Thevhedz., “ndaela.”
^ Kana khamusi, “u kha nḓila i yaho vhutshiloni.”
^ Kana “mavhari-vhari.”
^ Kana “livhisa.”
^ Kana “ingi.”
^ Kana “u ṱungufhala; u tambula.”
^ Kana “kha mutholi wawe.”
^ Kana “u aṋwa mitshelo ya.”
